Nagpahiwatig si Dating Pangulo at ngayon ay Manila Mayor Erap Estrada na malaki ang posibilidad na si Sen. Grace Poe ang suportahan nya sa nalalapit na 2016 elections.
Sa isang panayam sinabi ni ERAP na alam naman ng publiko ang katauhan ni Poe at kung sino ang ama nito na itinuring nya na isang kapatid na ang tinutukoy ay ang namayapang aktor na si Fernando Poe Jr.
Nalulungkot lamang si Estrada sa paglitaw ng iba’t ibang kontrobersiya laban sa senadora samantalang ang hangad lamang nito ay iangat ang bansa.
Lumitaw ang isyu ng pagiging ampon at hindi pagiging natural-born Filipino at kakulangan sa 10-year residency requirement ni Poe nang magdeklara itong tatakbo sa pagkapangulo sa susunod na taon.
Naniniwala si Estrada na dito ipinanganak ang senadora at bagama’t napulot sa simbahan ay inalagaan at itinuring na parang tunay na anak ng namayapang aktor bukod pa sa pinag-aral hanggang sa abroad.
By: Mariboy Ysibido
