Nagdeploy na ang Philippine National Police ng mga tracker team upang tuntunin at arestuhin si Senador Ronald “Bato” dela Rosa.
Kinumpirma ni PNP Chief, Gen. Jose Melencio Nartatez Jr., na ang deployment ay may koordinasyon sa Department of Justice at National Bureau of Investigation.
Ayon kay General Nartatez, inatasan ang lahat ng police units na mahigpit na ipatupad ang operational procedures at respeto sa karapatang pantao sa pagsisilbi ng arrest order.
Tiniyak naman ng hepe ng pambansang pulisya na isisilbi nila ang mandamiento de aresto nang propesyunal, walang “political bias,” at kahit pa isang dating PNP chief ang kanilang aarestuhin.
Kahapon lamang ay kinumpirma na ni Justice Secretary Frederick Vida na kapwa inatasan ang PNP at NBI na arestuhin si dela Rosa sa gitna ng inilabas na arrest warrant ng International Criminal Court kaugnay sa drug war ng Duterte administration.
