Tutol si House Justice Committee Chairperson at lead prosecutor Gerville Luistro sa panukalang payagan ang mga senator-judges na lumahok o bumoto sa pamamagitan ng online participation sa impeachment trial laban kay Vice President Sara Duterte.
Ayon kay Luistro, mabigat at mahalaga ang impeachment proceedings kaya kinakailangang personal na dumalo ang mga senador upang ganap nilang magampanan ang kanilang tungkulin bilang impeachment court.
Bagama’t iginiit niyang iginagalang ng prosecution panel ang panukala ni Sen. Rodante Marcoleta na payagan ang remote voting para kay Sen. Ronald “Bato” dela Rosa, kailangan pa rin umanong isaalang-alang ang integridad ng proseso ng paglilitis.
Binigyang-diin din ni Luistro na mahalagang personal na makita ng mga senator-judges ang mga testigo, dokumento, at video evidence na ihaharap sa impeachment trial. —sa panulat ni Jordan Gutierrez
