Ibinala ng Philippine Chamber of Agriculture and Food Incorporated na posibleng magpataas ng food manufacturing costs at makaapekto sa agricultural exports ng bansa ang ipinanukalang Philippine Nutrient Profile Model ng Department of Health.
Layunin ng nasabing nutrient profile na mabawasan ang mga non-communicable disease tulad ng obesity at diabetes sa pamamagitan ng paglalagay ng warning labels sa mga produktong mataas sa sugar, sodium, saturated fat, at total fat.
Ayon kay PCAFI President Danilo Fausto, masyadong mahigpit ang naturang panukala na maaaring magdulot ng dagdag-gastos sa mga food manufacturer at pagtaas ng presyo ng mga produktong pang-export tulad ng dried mangoes at durian.
Gayunman, nanawagan ang PCAFI kay Pangulong Ferdinand Marcos Jr. na huwag munang aprubahan ang panukala hangga’t walang mas malawak na konsultasyon at regulatory impact assessment para masukat ang epekto nito sa presyo ng pagkain at ekonomiya. —sa panulat ni Jordan Gutierrez
