Mahigpit na seguridad at disaster preparations, pinaplantsa na para sa SONA 2026 ni PBBM
Tiniyak ni House Sergeant-at-Arms Brigadier General Ferdinand Melchor Dela Cruz na mahigpit ang ipatutupad na seguridad at disaster preparedness para sa ikalimang State of the Nation Address ni Pangulong Ferdinand Marcos Jr., sa July 27.
Ayon kay Gen. Dela Cruz, tuloy-tuloy ang koordinasyon sa iba’t ibang law enforcement agencies, upang matiyak ang maayos at ligtas na pagdaraos ng okasyon.
Anya, magde-deploy ang Philippine National Police ng sapat na bilang ng mga pulis sa paligid ng Batasang Pambansa, habang ang Presidential Security Command ang mangunguna sa seguridad sa loob ng Batasan Complex.
Bukod dito, naghanda rin ang Kamara para sa posibleng sama ng panahon, lindol, at iba pang kalamidad, upang matiyak ang kaligtasan ng Pangulo at ng lahat ng dadalo sa SONA.
Sa huli, kinumpirma ni Dela Cruz na ila-lockdown ang Batasan Complex simula July 23, habang isasagawa ang huling walkthrough sa July 25 bilang bahagi ng pinal na seguridad at contingency preparations para sa SONA.—sa panulat ni Reabelle Medina
