Sinupalpal ni Senate Blue Ribbon Committee Chair Erwin Tulfo ang patutsada ni Senador Alan Peter Cayetano na itutuloy nila sa minorya ang imbestigasyon sa flood control scandal.
Una nang hinikayat ni Cayetano ang Malakanyang na atasan si Senador Tulfo na ituloy ang imbestigasyon sa flood control scam matapos lumabas ang ulat na iimbestigahan ng NBI ang sinasabing anomalya sa hosting ng Pilipinas sa 2019 Southeast Asian Games.
Gayunman, iginiit ni Senador Tulfo na dapat maghintay si Senador Cayetano sa imbestigasyon ng komite sa kontrobersyal na flood control scam.
Tiniyak ni Tulfo na hindi titigilan ng Senado ang imbestigasyon pero kanyang kinuwestiyon kung sino pa ba ang gustong paimbestigahan ng kapwa senador.
Nilinaw din ng chairman ng komite na ang mga pangalan ng mga senador, kongresista, at mga contractor na sangkot sa mga anomalya ay naisumite na noon pa.
Dahil gumugulong na rin anya ang mga kaso sa korte, wala nang saysay na ulit-ulitin ang mga lumang isyu sa mataas na kapulungan.—sa panulat ni Reabelle Medina
