Hindi parin naibibigay ng Land Transportation Franchising and Regulatory Board (LTFRB) ang fuel subsidy para sa 156 na libong benepisyaryo kabilang na dito ang mga driver ng UV express, taxi at tricycle maging ang mga delivery rider.
Ayon kay LTFRB Executive Director Maria Kristina Cassion, hindi pa nakararating sa kanilang ahensya ang pirmadong resolusyon mula sa Commission on Elections (Comelec) para maibigay na nila sa mga drivers at jeepney operators ang fuel subsidy.
Sinabi ni Cassion na nagpadala na ng liham ang Department of Transportation (DOTr) sa tanggapan ng Comelec upang makuha ang kailangang dokumento.
Dagdag pa ni Cassion, dapat na may sapat na legal basis bago mai-release ang pondo mula sa Landbank dahil kakailanganin umano ito sa disbursement ng kanilang ahensya upang walang maging problema sa Commission on Audit (COA).
Tiniyak naman ni Cassion na nakahanda at maayos na ang iba pang mga kailangan para mabilis na maipamahagi ang subsidy sakaling makuha na ang pirmadong resolusyon.
Sa ngayon nasa mahigit 111,000 pa lang ang nabibigyan ng ayuda mula sa 377,000 na mga nakalistang tsuper para sa naturang programa. —sa panulat ni Angelica Doctolero
