Kinontra ng isang election lawyer ang plano ng mga supporter ni Senador Grace Poe na gawing substitute ang ina nitong si Susan Roces sakaling i-disqualify ng Commission on elections ang presidential candidacy ng mambabatas.
Ipinaliwanag ni Atty. Romulo Macalintal na hindi maaaring pumalit si Roces kay Poe dahil tanging mga kandidato na nominado ng isang rehistradong political party ang maaaring mag-substitute sa oras na may ma-diskwalipika, umatras o mamatay.
Ayon kay Macalintal, sa kaso ng senador na isang independent candidate ay hindi papayagan ang substitution sa oras na idiskwalipika.
Ipinaliwanag din ni attorney Mac na ang kasong laban kay Poe sa COMELEC ay mga petisyon upang kanselahin ang kanyang certificate of candidacy.
Sakali anyang matalo sa anumang kaso si Poe ay otomatikong ibabasura ng poll body ang kanyang kandidatura na tila walang inihaing COC kaya’t kahit i-nominate siya ng isang partido ay imposibleng magkaroon ng substitution.
By: Drew Nacino
