Mas lalo pang gumuho kung hindi man tuluyang nawala ang kredibilidad ng testigong si Edgar Matobato matapos ang pagtatanong ng mga Senador dito sa senate hearing kahapon
Ayon kay Senador Panfilo Lacson maraming pahayag si Matobato na nakakalito tulad ng kung binigti ba, chinop chop o nilaslas ang lalamunan o pinagsasaksak ang isa nilang pinaslang
Bukod dito napansin din ni Lacson na panay pa ang sulyap ni Matobato kina Senador Antonio Trillanes at Leila de Lima bago sumagot sa mga tanong na patunay na halatang nangangapa sa isasagot
Pinakamaganda aniya ang inihayag ni Senador Manny Pacquiao na kapag nagsasabi ng totoo ang isang tao hindi niya makakalimutan ang mga detalye subalit kapag itinuro o kasinungalingan lang, talagang mahirap matandaan
Sinabi naman ni Senador Sonny Angara na mabigat ang akusasyon ni Matobato subalit hindi tugma ang mga inilahad nitong impormasyon sa dalawang beses na pagharap sa senate hearing
Gayunman bahala na aniya ang mga komite na magpasya kung anong rekomendasyon at aksyon ang gagawin sa nasabing usapin
By: Judith Larino / Cely Bueno
