Kumikilos na ang pamahalaang lokal ng Navotas upang baguhin ang kanilang ordinansa sa pagtatakda ng curfew hour para sa mga kabataan.
Ayon kay Navotas City Mayor John Rey Tiangco, agad siyang sumulat sa konseho matapos mapag-alaman ang desisyon ng Korte Suprema na nagbabasura sa kanilang ordinansa sa curfew hour.
Partikular na sinita ng Supreme Court ang probisyon sa ordinansa na nagbabawal sa mga kabataang dumalo sa simbang gabi nang walang kasamang kaanak na nasa tamang edad at kawalan ng exemptions sa isyu ng pagdalo sa mga rally ng mga kabataan.
Sinabi ni Tiangco na mahalaga para sa kanila ang curfew hour para sa mga kabataan upang maiiwas ang mga ito sa kaguluhan.
“Karamihan diyan ay mga riot, wala namang problema doon sa pagpaparusa, pasok naman tayo doon, kulang lang po sa exceptions na nilagay natin, binigyan ng specific, halimbawa Simbang Gabi, politcal rallies at ibang pagpupulong na hindi nalagyan ng exceptions.” Pahayag ni Tiangco.
(Ratsada Balita Interview)