Hindi katanggap-tanggap para kay House Prosecutor at Bicol Saro Party-list Terry Ridon ang panawagang ibalik sa Pilipinas ang “kamay na bakal” kasunod ng insidente ng pananaksak sa isang rider sa Caloocan City.
Sa pulong balitaan, sinabi ni Ridon na hindi dapat bumalik ang bansa sa panahon ng extrajudicial killings (EJK), na hanggang sa ngayon ay nililitis pa rin sa The Hague, Netherlands.
Ayon sa mambabatas, “cute” aniyang tingnan sa mga post sa social media na dapat ubusin ang mga kriminal, ngunit ipinakita lamang dito ang nakaraan na marami ring inosenteng buhay ang nawala.
Bilang halimbawa, binanggit niya ang kaso ni Kian Delos Santos at iba pang kabataang nasawi sa anti-drug campaign.
Samantala, sinabi naman ni House Impeachment Adviser at Spokesperson Robert Ace Barbers na kung mapatutunayang guilty at repeat offender ang suspek, nararapat lamang na habambuhay itong makulong.
Gayunpaman, iginiit ni Barbers na ang pananaksak ay hindi usapin ng kung sinong administrasyon ang nakaupo.
Aniya, ang tunay na solusyon ay ang maayos na imbestigasyon, matibay na ebidensya, at papanagutin ang may sala sa ilalim ng batas. | via Gel Mendez (Patrol 30)
