MULING humarap sa mga mamamahayag ang mga tindero at tindera sa Divisoria Public Market para iparating ang kanilang mga hinaing matapos ibenta ng local government unit (LGU) ng Maynila nang mahigit P1.4 bilyon ang nasabing establisimyento.
Ayon kay Emmanuel Plaza, pangulo ng kooperatiba ng mga market vendor, sa pamamagitan ng isang resolusyon at public auction ay naibenta umano ni Mayor Francisco ‘Isko Moreno’ Domagoso sa Festina Holdings ang palengke na tinatayang may sukat na 3,700 square meters noon pang 2020.
Ang controversial sale ng patrimonial property ng lungsod ay sinasabing ginawa para pondohan ang mga proyekto sa gitna ng COVID-19 pandemic.
Ngunit binatikos ng grupo sina Councilor Joel Chua, Vice Mayor Maria Shielah ‘Honey’ Lacuna-Pangan, Councilor Ernesto Isip, Jr. at iba pang miyembro ng city council matapos makalusot ang deal nang hindi man lang umano sila kinonsulta.
Binigyang-diin ni Plaza na karamihan sa kanila ay dekada nang nagtitinda sa Divisoria Public Market at mawawalan sila ng pagkakakitaan kung palalayasin sila sa kani-kanilang mga stalls.
Nabatid na noong Nobyembre 11, 2020 ay ipinabatid sa kanila ng Market Adminstration Office na isasara ang public market simula Enero 31, 2021 upang bigyang-daan ang konstruksiyon ng itatayong bagong gusali sa Tabora St., Comercio St., M.De Santos St., at Sto. Cristo St. sa Binondo.
Bukod dito, inabisuhan din sila na i-turn-over ang kanilang mga stalls at kung mayroon silang mga updated na permits at licenses ay maaari umano silang makakuha ng puwesto sa Pritil Market.
Dahil dito, minsan pang nanawagan si Plaza sa Senado at Malacañang na gumawa ng kaukulang aksyon ukol sa kanilang problema.
Binansagan din nila sina Moreno at Lacuna bilang mga ‘Berdugo ng mga Vendors’.
Sa ngayon, pinag-aaralan na rin ng grupo kung ano ang posibleng mga kasong isasampa nila laban sa mga naturang opisyal.
