Patay ang isang turistang Chinese habang tatlong iba ang sugatan matapos tumaob ang kanilang sinasakyang bangka sa bahagi ng Boracay sa Aklan.
Kinilala ang nasawing Chinese tourist na si Hongfang Kuai habang sugatan naman sina Lu Kuaile, Gao Yue at Lou Meimei.
Ayon sa Philippine Coast Guard (PCG), nasa bahagi ng karagatang sakop ng barangay Balabag ang bangka para sa island hopping activity nang tumaob ito dahil sa malakas na hangin at alon.
Sakay ng bangka ang 25 turista kasama ang dalawang Pilipino, dalawang tripulante at isang skipper.
Tiniyak naman ng Coastguard na nasa maayos nang kalagayan ang iba pang sakay ng bangka kabilang ang tatlong sugatan.
