Sinampahan ng kasong tax evasion ng BIR o Bureau of Internal Revenue sa Department of Justice ang Our Lady of Lourdes International Medical Center Incorporated na nakabase sa Olongapo City.
Batay sa reklamong inihain ng BIR sa DOJ, bigo ang naturang ospital na magbayad ng karampatang buwis na nagkakahalaga ng 15.7 Milyong Piso mula taong 2015 hanggang sa taong kasalukuyan.
Makailang ulit na inabisuhan ng BIR ang pangulo ng nasabing ospital na si Dr. Noel Jusay Lacsamana at iba pang opisyal nito subalit hindi ito tumutugon sa nasabing paki-usap ng ahensya na bayaran ang mga pagkakautang na buwis.
Ito na ang ika-111 reklamo na naisampa ng BIR sa ilalim ng kanilang RATE o Run After Tax Evaders program na sinimulan nuon pang taong 2013.
