Iginiit ng Malakanyang na hindi nila babaguhin ang istilo ng pamahalaan sa kampanya ng administrasyon kontra iligal na droga.
Ang nasabing pahayag ay bunsod ng lumabas na resulta sa survey ng SWS o Social Weather Station na nagsasasabing karamihan sa mga Pinoy ay naniniwalang pinatay ang mga sangkot sa iligal na droga kahit sumuko na ang mga ito.
Ayon kay Presidential Spokesperson Ernesto Abella, hindi magpapa-apekto ang pamahalaan sa resulta ng nasabing survey at itutuloy pa rin nila ang giyera kontra iligal na droga.
Dagdag pa ni Abella, mistulang kontra umano ang lumabas na survey sa napakataas na approval rating na nakukuha ng Pangulong Rodrigo Duterte na may kaugnayan sa laban ng administrasyon kontra iligal na droga.
Palasyo suportado ang panawagan ng senado vs EJK’s
Nakikiisa ang Malakanyang sa inilabas na Resolution No. 518 ng senado na nanawagan sa gobyerno na itigil na ang drug related killings sa bansa.
Sinabi ni Presidential Spokesperson Ernesto Abella, wala silang nakikitang masama sa ipinahayag na pagkabahala ng senado sa mga patayan at pagkondena nito sa EJK’s o extra judicial killings.
Gayunman, iginiit ni abella na hindi ‘state – sanctioned’ o polisiya ng estado ang EJK taliwas sa konklusyon ng Senate Committee on Justice and Human Rights na nagsagawa ng imbestigasyon sa mga nangyaring patayan.
Dagdag pa ni Abella, hindi kinukunsinte ng Pangulong Rodrigo Duterte ang mga pulis na lumalabag at umaabuso sa kanilang tungkulin.
Patunay daw dito ang kooperasyon ng gobyerno sa imbestigasyon ng senado laban sa mga nagkakasalang mga pulis at papanagutin ang mga ito lalo na kung may kinalaman sa operasyon kontra iligal na droga.
