Sumisigaw ng tulong ang mga residente ng Agusan Del Sur matapos maramdaman duon ang bagsik na dala ng Bagyong Vicky.
Kabilang ang nasabing lalawigan na nasa ilalim ng tropical storm warning signal number 1 ng PAGASA kabilang ang 32 lugar sa bansa.
Sa bayan ng Rosario, halos nasa bubungan na ng mga bahay ang taas ng tubig baha kaya’t na-trap na ruon ang mga residente na basang basa na sa ulan.
Hindi na rin madaanan ang national highway sa nabanggit na bayan dahil sa taas ng tubig kaya’t marami ring motorista ruon ang tila naistranded na.
Lubog na rin sa baha ang mga bayan ng prosperidad gayundin ang lungsod ng bayugan dulot din ng walang tigil na mga pag-ulan .
Gayunman, kumikilos na ang Agusan Del Sur Provincial Police Office upang umalalay sa mga istranded na residente at nakapagkasa na rin sila ng rescue and relief operations.
Dahil dito, sinuspinde na ni San Francisco Mayor Solomon Rufila ang pasok sa mga tanggapan ng gubyerno gayundin sa ilang pribadong establisyemento sa lugar mula pa kahapon dahil sa walang tigil na pag-ulan.