Isinugod sa ospital ang halos 12 bata matapos umanong malason sa ininom na juice na ipinamahagi ng lokal na pamahalaan ng Taytay, Rizal.
Nabatid na nakaranas nang pagkahilo, pagsusuka at pananakit ng tiyan ang mga bata matapos uminom ng golden coolers juice drink na gawa ng PTC Foodsphere Asia Corporation.
Lumalabas sa imbestigasyon na ang nasabing juice ay halos isang taon nang expired base sa packaging date nito.
Ang insidente ay iniimbestigahan na ng Taytay Municipal Government sa pangunguna ni Mayor Joric Gacula.
Ipinaliwanag ni Gacula na inorder nila ang juice direkta sa manufacturer para sa itinakdang pamamahagi nito noong February 25.
Humingi naman ng paumanhin ang kumpanya at inabsuwelto ang Taytay LGU sa nangyari kasabay ang pagtiyak na sasagutin nito ang lahat ng danyos sa gitna na rin ng kanilang pag-iimbestiga sa insidente.