Umaasa ang Department of Health (DOH) na tataas ang bilang ng mga mababakunahan sa isasagawang special vaccination week na sisimulan sa Setyembre a-26 na tatagal hanggang a-30.
Aminado ang DOH na isang buwan mula nang ilunsad ang “PinasLakas Campaign” ng Pamahalaan, ay hindi parin naaabot ang target na bilang na 5 milyon hanggang 21 milyon ng mga nabakunahan para sa unang booster shot.
Ayon kay Health Officer-In-Charge (OIC) Maria Rosario Vergeire, ramdam nila na marami na ang gustong maibalik sa normal ang sitwasyon ng bansa partikular na ang pagtanggal ng facemask pero hindi pa umano ito ang tamang panahon para alisin ang mandatoryong pagsusuot nito.
Iginiit ni Vergeire na dapat paring mag-ingat ang publiko partikular na ang mga senior citizen at vulnerable individuals dahil nananatili parin ang virus kung saan, marami nang kumakalat na panibagong variant ng COVID-19.
Dagdag pa ni Vergeire na kailangan mapataas ang pagbabakuna at panatilihin parin ang pagsusuot ng facemask na isa sa pinaka-importante batay narin sa naging rekomendasyon ng World Health Organization (WHO).
Sinabi ni Vergeire na sa ngayon, target ng Pamahalaan ang mga lugar na may mababang bilang sa pagbabakuna upang maiwasan at mabawasan ang mga nagkakasakit sa bansa.
