Binuweltahan ni House Prosecutor at Bicol Saro Party-list Rep. Terry Ridon ang defense team sa pagpilit na may “kamay” o kumpas umano ni Pangulong Ferdinand Marcos Jr. ang imbestigasyon ng Department of Justice (DOJ) at National Bureau of Investigation (NBI) hinggil sa bantang pagpapapatay ni Vice President Sara Duterte.
Tinawag na “no-brainer” ni Ridon ang mga hirit ng kabilang panig dahil nakakatawa aniya ang mga naging katanungan ng depensa.
Malinaw para kay Ridon na nais ipakita ng depensa na pinapakialaman umano ng Office of the President ang trabaho ng NBI at DOJ.
Iginiit ni Ridon na pinatunayan na ni NBI Dir. Atty. Jeremy Lotoc na ibinalik ng DOJ ang kanilang unang ulat dahil sa kakulangan sa dokumento.
Patunay aniya ito na dumaan sa tamang proseso at walang pampolitikang panghihimasok mula sa Malacañang. | via Geli Mendez (Patrol 30)
