Sumampa na sa 8,472,637 ang kabuuang bilang ng mga commuters na naserbisyuhan ng libreng sakay sa Metro Rail Transit Line 3 (MRT-3).
Ayon sa pamunuan ng MRT-3, naitala ang nasabing bilang simula March 28 hanggang April 30, 2022.
Pinakamaraming naitalang pasahero noong April 8, na mayroong 335,993.
Ang ‘libreng sakay’ sa MRT-3 ay bilang bahagi ng pagtatapos ng rehabilitasyon nito at bilang tulong na rin sa publiko sa gitna ng tumataas na presyo ng petrolyo at mga bilihin.
Tatagal ang libreng sakay hanggang sa Mayo 30, mula alas-4:40 ng madaling araw hanggang alas-10:10 ng gabi.
