Nilinaw ni Labor Secretary Silvestre Bello III na kanila lamang sinuspende ang pagpapadala ng mga bagong Overseas Filipino Worker’s (OFW’s) sa Kuwait at hindi nagpatupad ng ‘deployment ban’.
Ito ay sa gitna ng isasagawang imbestigasyon ng Department of Labor and Employment (DOLE) kaugnay ng kaso ng pitong (7) OFW’s na nasawi sa Kuwait na una nang ikinabahala ni Pangulong Rodrigo Duterte.
Ayon kay Bello, inatasan na aniya ang Philippine Overseas Employment Administration (POEA) na pansamantalang itigil ang pag-proseso ng overseas employment certificate ng OFW’s na magtutungong Kuwait.
Nilinaw din ni Bello na hindi maaapektuhan ng suspensyon ang OFW’s na kasalukuyang nagtatrabaho sa Kuwait.
Una nang inihayag ng Pangulong Rodrigo Duterte na plano niyang kausapin ang Kuwaiti officials matapos masawi ang mga Pilipinang nagtatrabaho dito.
Matatandaan na nagpahayag ang Pangulo ng ban sa pagpapadala ng mga mangagawang Pinoy lalo na ng mga kababaihang domestic helpers sa bansang Kuwait noong pagbubukas ng Overseas Filipino Bank sa Maynila.