Tiyak na pakikinabangan ng sambayanang Pilipino ang dagdag buwis na ipapataw sa mga sigarilyo sa ilalim ng Universal Health Care Law.
Ayon kay Senate Minority Leader Franklin Drilon, aabot sa 15 bilyong piso ang inaasahang makokolekta mula dagdag na buwis.
Isama pa rito ang 195 bilyong pisong kukunin mula sa pambansang budget kaya’t sapat na ito upang ipatupad ang nasabing batas.
Batay sa ulat ng Department of Finance, tinatayang nasa 257 bilyong piso ang kailangang pondo para sa universal healthcare program.
Kasunod nito, sinabi ni Drilon na target ng Senado na maipasa ang panukalang pagtataas ng buwis sa mga produktong tabako bukas, Hunyo 3.
