SPORTS

Lalo pang lumaki ang tiyansa ng koponang Meralco Bolts na makapasok sa PBA Playoffs dahil sa twice to beat advantage.

Ito’y makaraang pataubin ng Bolts ang koponang Phoenix Fuel Masters sa iskor na 81-66 kung saan bumida si Base Amer na nakapagbulso ng dalawampung (20) puntos.

Dahil dito, nasa pitong (7) panalo at isang (1) talo na ang kartada ng Bolts habang tatlong (3) panalo at limang (5) talo naman ang sa Phoenix.

Samantala, taob ang koponang NLEX Road Warriors sa kamay ng Blackwater Elite sa iskor na 104-98.

Bumida sa nasabing laban si Greg Smith ng Blackwater nang makapagbulso siya ng dalawampu’t apat (24) na puntos gayundin si KG Canaleta habang dalawampu’t dalawang (22) puntos naman ang naibuslo ni Mike diGregorio.

Dahil dito, dalawang (2) panalo at anim (6) na talo na ang kartada ng Blackwater habang bokya naman sa kartada ang NLEX sa nakalipas na walong (8) laban nito.

By Jaymark Dagala

Photo Credit: PBA Media Bureau 

Nanganganib na palitan ng ibang manlalaro si naturalized Filipino player at dati ring NBA Player na si Andray Blatche sa laban ng Gilas Pilipinas para sa Southeast Asia Basketball Association o SEABA Championship.

Ito ay matapos maantala ang pagdating ni Blatche para sa ensayo ng Gilas.

Ayon kay Gilas Head Coach Chot Reyes, nakahanda siyang bitiwan si Blatche lalo na kung ito ang pagmumulan ng aberysa sa laro ng Gilas.

Nakatakda sanang dumating sa bansa si Blatche noong Lunes ngunit na-delay ito matapos na dumalo sa binyag ng kanyang anak.

Batay sa abiso ng handler ni Blatche, darating umano ang basketbolista sa Biyernes o isang linggo bago ang simula ng SEABA Championship.

By Ralph Obina

Wagi ang La Salle Lady Spikers matapos talunin ang Ateneo Lady Eagles sa Game 1 ng UAAP o University Athletics Association of the Philippines Season 79 Women’s Volleyball Tournament Finals sa Smart Araneta Coliseum kagabi.

Ipinamalas ni Kim Fajardo ang kanyang husay kung saan nailista nito ang 37 excellent sets kasama ang 10 puntos na tinampukan ng pitong (7) aces para dalhin ang Lady Spikers sa 1-0 bentahe sa best-of-three championship series.

Pinangunahan naman ni open hitter Ernestine Tiamzon ang attack line matapos magpako ng 15 hits, habang nag-ambag ng 14 puntos si Season 78 Finals MVP Kim Kianna Dy para sa solidong opensa ng La Salle.

Sampung (10) puntos naman ang idinagdag ni Desiree Cheng at pinagsamang 15 puntos nina middle hitters Mary Joy Baron at Aduke Ogunsanya.

Samantala, bumandera sa hanay ng Lady Eagles si Jhoana Maraguinot na may 16 puntos, gayundin sina Bea de Leon na umukit ng 14 markers at Michelle Morente na gumawa ng 11 kills.

By Meann Tanbio

Photo Credit: GoArchers / Facebook

Bumaba na sa pwesto bilang Pangulo ng Indiana Pacers si Larry Bird.

Nilinaw naman ng NBA na ang pag-alis ni Bird ay walang kinalaman sa kalusugan nito o sa kanyang team.

Sinabi ni Bird na bukas pa rin siya sa mga advisory role ngunit mas nais niya ngayon ang makapag-explore ng trabaho sa labas ng basketball.

Matatandaang halos dalawang (2) dekada ring naging Pangulo ng Pacers si Bird na nagsimula noong 2003.

By Ralph Obina

Nasungkit ng defending champion Cleveland Cavaliers ang unang panalo a secound round ng NBA Playoffs kontra Toronto Raptors.

Pinataob ng Cavs ang kalabang Raptors sa iskor na 116-105.

Nanguna sa panalo ng Cavs si Lebron James na tumipa ng tatlumpu’t limang (35) puntos.

Ang game two sa pagitan ng Cavs at Raptors ay gaganapin sa darating na Huwebes oras dito sa Pilipinas.

By   Ralph Obina   

Photo Credit: cleveland.com 

Wagi ang Gilas Pilipinas kontra PBA All-Stars Visayas sa iskor na 125-112 para sa final leg ng 2017 PBA All-Star week na ginanap sa Hoops Dome sa Cebu.

Pinangunahan ni Calvin Abueva ang panalo ng Gilas kung saan nakapagbuslo siya ng 26 points at pitong (7) rebounds.

Kumamada naman ng labing-siyam (19) na puntos si LA Tenorio para sa PBA All-Star Visayas at apat (4) na assists, habang si James Yap ay umiskor ng 18 points at 17 puntos naman ang naiambag ni Jeff Chan.

Samantala, itinanghal si Terrence Romeo bilang most valuable player.

By  Meann Tanbio

Photo Credit: PBA Images

Nasungkit ng National Capital Region (NCR) ang ika-labingtatlong kampeonato nito sa katatapos lamang na 60th palarong pambansa sa San Jose de Buenavista, Antique.

Humakot ng 98 gold medals, 66 silver at 45 bronze ang NCR. na sinundan ng CALABARZON na mayroong 41 gold, 57 silver at 57 bronze medals habang 3rd place ang host region na Western Visayas na may 38 gold, 29 silver at 40 bronze medals.

Namayagpag ang secondary boys basketball, secondary girls basketball at secondary football teams ng NCR.

Samantala, nagpasalamat naman ang mga organizer sa pangunguna ng Department of Education sa matagumpay na pagho-host ng Antique sa naturang sports event.

By Drew Nacino / (Photo Courtesy of Department of Education Facebook Page)

Pinadapa ng Boston Celtics ang Chicago Bulls sa score na 105-83 sa NBA Playoffs dahilan upang umusad ito sa susunod na round.

Kumamada ng 23 points si Avery Bradley para sa Celtics kaya’t maagang natapos ang kanilang Best-of-Seven Eastern Conference Series.

Makakaharap ng Boston ang Washington Wizards na dumurog naman sa Atlanta Hawks sa score na 115-99.

By Jelbert Perdez