RONDA PROBINSYA

Inilipat sa evacuation center ang 200 pamilyang nasunugan sa Barangay Sta Cruz, Dasmariñas, Cavite.

Ayon sa mga otoridad ang nasabing sunog ay nagmula sa isang lampara sa isa sa mga bahay.

Tumagal naman ng dalawang oras ang nasabing sunog na inaalam pa kung magkano ang kabuuang danyos.

Naaktuhang naglalaro sa dagat sa Bacoor, Cavite ang mahigit 50 kabataan at kanilang mga magulang nitong Easter weekend.

Kasunod na rin ito nang isinagawang operasyon ng mga tauhan ng Bacoor City Agriculture Office-Deputy Fish Watden at Philippine Coastguard Bacoor.

Pinauwi rin naman ng mga otoridad ang 44 na menor de edad at 10 nasa tamang edad na nahuli sa iba’t ibang bahagi ng Bacoor Bay mula Biyernes Santo hanggang Linggo ng Pagkabuhay.

Ayon kay Joshua Villaluz, agricultural technologist fishery law enforcement ng Department of Agriculture, balak sana nilang magpaalala lamang sa mga residenteng huwag maligo sa baybayin dahil sa lockdown subalit napansin nila ang pagdagsa ng mga tao lalo na ang kabataan sa paliguan at marami ang hindi naka face mask.

Isinailalim sa 10-day lockdown ng local government ng ilagan, Isabela ang 22 barangay nito dahil sa pagtaas ng kaso ng COVID-19.

Ayon sa Ilagan, Isabela LGU, sinimulan nilang ipatupad ang lockdown noong holy thursday at magtatagal hanggang sa April 10.

Sa loob ng mga araw na ito, magsasagawa umano ng disinfection at contact tracing ang lokal na pamahalaan upang mapigilan ang patuloy na pagsirit ng COVID-19 cases sa kanilang lugar.

Nagpatupad ng stricter protocol measures ang naturang LGU sa mga barangay na ito kasunod ng ulat ng OCTA research team na kabilang ang Isabela sa 10 rehiyon at probinsya na may pinakamataas na kaso ng COVID-19 sa pagpasok ng buwan ng Abril.

Ipinatutupad narin ngayon sa Ilagan, Isabela, ang liquor ban at curfew simula alas-otso ng gabi hanggang ala-singko ng umaga.

Samantala, pinayagan namang magbukas ang ilagan public market, ngunit tanging 200 katao lamang ang maaaring makapasok at makapamili ng kanilang mga kinakailangan.

Napupuno na rin ang mga ospital sa lalawigan ng Laguna kasabay ng patuloy na pagtaas ng kaso ng COVID-19 sa bansa.

Ayon kay Governor Ramil Hernandez, mayroong siyam na provincial hospital ang Laguna at malapit na itong mapuno dahil sa patuloy na pagdating ng mga pasyente.

Samantala, inaasahan namang makatatanggap ng tulong pinansyal ang 2.7 million na low income families sa probinsya bilang bahagi ng programa ng gobyerno dahil sa ipinatupad na enhanced community quarantine kung saan kabilang ang Laguna.

Nagpositibo sa COVID-19 si Marawi City Mayor Majul Gandamra.

Sa kaniyang mensahe sa kaniyang nasasakupan, sinabi ng alkalde na dinapuan pa rin siya ng nakakahawang sakit sa kabila ng mahigpit niyang pagsunod sa mga health protocols.

Mula Lunes hanggang Biyernes aniya ay nagtutungo siya sa kaniyang opisina para i-monitor ang progress ng rehabilitasyon ng Marawi at tuwing Sabado umano dumadaan siya sa antigen test bago umuwi sa kaniyang pamilya.

At nito ngang Sabado ay lumabas ang resulta na positibo siya kaya’t napagpasyahan na niyang sumailalim din sa RT-PCR terst kung saan parehas ang resulta dahilan para siya ay mag quarantine.

Maliban aniya sa dry cough ay wala ng ibang sintomas pang nararamdaman si Gandamra.