RONDA PROBINSYA

Isa na namang high-value target ang nasawi makaraang manlaban umano sa mga awtoridad sa isinagawang buy-bust operation sa Tagum City, Davao Del Norte.

Ayon sa Philippine Drug Enforcement Agency (PDEA), nakatunog si Alihul Kamsa na mga pulis ang kanyang ka-transaksiyon kaya’t napatay ito sa Barangay Magugpo West.

Sinasabing idineklarang dead on arrival sa ospital si Kamsa na nakuhanan ng tatlong gramo ng hinihinalang shabu at isang baril.

Kilala umanong tulak ng droga sa lugar ang napatay na suspek.

Ipinanawagan ng pamahalaang panlalawigan ng Negros Occidental na i-akyat sa general community quarantine (GCQ) ang kanilang lugar mula sa kasalukuyang MGCQ.

Ayon sa mga lokal na opisyal, nagkakaroon ng “overwhelming spike” ng COVID-19 cases sa probinsya kaya dapat lamang itong aksiyunan ng Western Visayas Regional Inter-Agency Task Force (RIATF) at Regional Task Force (RTF) for Covid-19.

Sa kabuuang, sinasabing mayroon nang 2,939 active cases sa Western Visayas.

Batay naman sa panibagong quarantine status na inanunsiyo ni Presidential Spokesperson Harry Roque, nasa MGCQ pa rin ang Negros Occidental hanggang Abril 30.

Kasado na ang hard general community quarantine (HGCQ) sa Jones, Isabela bunsod ng dumaraming kaso ng COVID-19 sa lugar.

Nabatid na umabot na sa 358 ang kabuuang bilang ng mga tinamaan ng coronavirus sa nasabing bayan kung saan 134 ang aktibong kaso.

Ayon sa lokal na pamahalaan, epektibo ang HGCQ hanggang ika-30 ng Abril.

Niyanig ng 6.1 magnitude na lindol ang Davao Occidental.

Namataan ang sentro ng lindol, 148 kilometers southwest ng bayan ng Sarangani.

Ayon sa Philippine Institute of Volcanology and Seismology (PHIVOLCS), ganap na ala-singko ‘y medya ng hapon kahapon nang yanigin ang nabanggit na lugar.

Tectonic umano ang origin ng lindol at may lalim na 314-kilometer.

Naramdaman naman ang intensity III sa General Santos City habang intensity II sa Monkayo, Davao De Oro, at intensity I sa Alabel, Sarangani.

Wala namang nasaktan o napinsala sa nangyaring pagyanig kung saan asahan na umano ang mga aftershocks.

Sugatan ang anim na indibidwal sa salpukan ng motorsiklo at tricycle sa Barangay Calabagas, San Vicente, Camarines Norte.

Ayon sa pulisya, dinala sa rural health unit ang mga sugatan na nasa maayos nang lagay ngayon.

Sa imbestigasyon, papunta sa poblacion ng San Vicente ang menor de edad na driver ng motorsiklo at angkas nito habang maghahatid sana ng kahon-kahong suka sa karatig-bayan ang tricycle nang mangyari ang aksidente.

Sinasabing sa lakas ng salpukan, bumaliktad ang tricycle at nabasag ang ilang bote ng suka habang nagtamo ng mga sugat sa katawan ang tatlo pang sakay nito.

Nangako ang pamilya ng menor de edad na rider na sasagutin ang gastos sa pagpapagamot ng mga biktima kaya’t hindi magsasampa ng kaso ang mga ito.

Halos 200 empleyado ng munisipyo ng Looc sa Romblon ang naka-quarantine dahil sa COVID-19.

Dahil dito, ayon kay municipal mayor Lisette Arboleda, paralisado ang operasyon ng kanilang munisipyo.

Aniya, naka-quarantine ang lahat ng department heads habang nagpositibo naman ang ilan sa mga ito.

Kahit negatibo na aniya sa COVID-19 ang karamihan, kailangan pang tapusin ang quarantine kaya’t pilay ang operasyon ng pamahalaang lokal, kabilang ang kanilang palengke.

Maliban dito, sinabi ni Arboleda na naka-lockdown din ang bagong munisipyo hanggang sa Abril 19.

Patay ang hinihinalang miyembro ng New People’s Army (NPA) at sinasabing sangkot sa illegal drug trade sa isinagawang operasyon ng pulis at militar sa Leyte.

Kinilala ang nasawi na si Nicolas Ibanyez aka “Botoy” na pinaghihinalaang dating NPA guerilla at kalauna’y nasangkot na rin sa gun-for-hire at illegal drug trade.

Ayon kay 802nd Infantry Brigade Spokesperson Captain Kaharudin Cadil, magsisilbi sana ng warrant of arrest ang mga pulis at militar sa isang nagngangalang Marlon Mendoza para sa kinakaharap na kaso nito na frustrated murder sa barangay Anislagan sa bayan ng Calubian.

Si Mendoza ay nagta trabaho kay Ibanyez una umanong nagpaputok ang dalawa sa tropa dahilan para gumanti ng putok ang mga ito na tumagal ng limang minuto.

Nakatakas si Mendoza habang nasawi naman si Ibanyez.