RONDA PROBINSYA

Pumalo na sa higit 2,000 katao ang stranded sa iba’t-ibang pantalan sa bansa dahil sa Bagyong Bising.

Sa pinakahuling datos na inilabas ng Philippine Coast Guard (PCG), kabuuang 2,055 na ang mga na-stranded na indibidwal; 16 na sasakyang pandagat; at higit 800 mga rolling cargoes ang hindi pinayagang makabyahe dahil sa sama ng panahon.

Bukod dito, aabot sa 48 barko at 26 na mga motorbangka ang lumikas para pumunta sa mas ligtas na lugar.

Sa huli, nagpaalala ang PCG sa publiko na mag-ingat ngayong may bagyo at huwag kakalimutang sumunod sa mga umiiral na health protocols kontra COVID-19.

Ipinag-utos na ang pagsasagawa ng mga pre-emptive evacuation sa ilang lugar sa Bicol Region at Samar Province dahil sa inaasahang may kalasakang pagtama doon ni Bagyong Bising.

Ito ang inihayag ng regional council sa kasagsagan ng third pre-disaster risk assessment meeting na pinangunahan ng National Disaster Risk Reduction and Management Council (NDRRMC).

Ayon sa Regional Disaster Risk Reduction and Management Councils (RDRRMC) for Bicol, na nagpapatupad na sila ngayon ng initiated pre-emptive evacuation sa mga lugar ng Camarines Sur, Catanduanes, at Sorsogon.

Samantala, ganito rin umano ang ipinatutupad ngayon ng RDRRMC for Eastern Visayas sa ilang lugar ng Northern Samar, at Eastern Samar.

Sinabi naman ng iba’t-ibang ahensya ng gobyerno na nakaantabay na ang kanilang mga response teams and resources sakaling kailanganin sa panahon ng pananalasa ni Bagyong Bising.

Inihayag naman ng NDRRMC na nasa P182-M worth ng food packs ang nakastandby na sa iba’t-ibang warehouse ng DSWD sa buong bansa.

Nagpositibo sa red tide ang mga lamang dagat na makukuha sa ilang anyong tubig sa iba’t-ibang bahagi ng bansa.

Sa inilabas na ulat ng Bureau of Fisheries and Aquatic Resources (BFAR), hindi anila ligtas ang mga lamang dagat o shellfish sa coastal waters ng Dauis at Tagbilaran City sa Bohol; Tambobo Bay sa Negros Oriental; coastal waters sa Calubian sa Leyte; Dumangquillas bay sa Zamboanga Del Sur at iba pa.

Paliwanag ng BFAR, ang mga shellfish sa mga nabanggit na anyong katubigan ay positibo sa paralytic shellfish poison.

Partikular na ipinagbabawal ng BFAR ang pagkain ng alamang.

Sa kabila nito, ligtas namang kainin ang isda, pusit, hipon, at alimango basta’t maayos lamang itong huhugasan.