RONDA PROBINSYA

Magpapakawala ng tubig ang Magat dam bukas,ika-20 ng Abril.

Ito’y sang-ayon sa utos ng National Irrigation Administration (NIA) bilang paghahanda sa dami ng ulang dala ng Bagyong Bising.

Mababatid na batay sa datos na inilabas ng ating weather bureau na nasa 190.42 cubic meter ang lebel ng tubig sa Magat dam o halos tatlong metro ang kulang bago maabot ang kritikal na lebel nito na 193 metro.

Bukod dito, binabantayan din ang lebel ng tubig sa iba pang mga dam gaya ng Angat, Ipo, La Mesa, at Ambuklao dam na malapit na ring maabot ang kritikal na lebel.

Halos 8,0000 pamilya o nasa mahigit 28,000 indibidwal ang nailikas ng provincial government ng Catanduanes kaugnay ng Bagyong Bising.

Ipinabatid ito sa DWIZ ni Catanduanes Governor Joseph Cua na nagsabi ring mas ramdam nila kagabi hanggang kaninang umaga ang malakas na hanging dala ng Bagyong Bising.

Wala pa aniya siyang nakukuhang official report mula sa tatlong bayan sa lalawigan na apektado ng Bagyong Bising.

Isinailalim sa hard general community quarantine (GCQ) ang buong bayan ng San Isidro sa lalawigan ng Isabela.

Ito, ayon kay Police Captain Ricson Cabautan, OIC ng San Isidro Police, ay para mapigilan ang pagkalat ng coronavirus disease 2019 (COVID-19) dahil hindi makontrol ng lokal na pamahalaan ang galaw ng mga tao partikular ng mga motorista kaya’t tumataas ang kaso ng virus sa nasabing bayan.

Dahil dito, mahigpit na ipinatutupad ang travel restriction sa mga residente kabilang ang checkpoint sa bawat barangay .

Epektibo pa rin ang total liquor ban at mahigpit na ipinagbabawal ang mass gathering.

Patay ang isang 44 taong gulang na lalaki at tatlong iba pa ang sugatan matapos matabunan ng gumuhong lupa sa ginagawang kalsada sa Sitio Putol, Brgy. Caticlan, Malay, Aklan.

Kinilala ang nasawi na si Modesto Appellido habang nasugatan naman sina Jade Daryl Castillo, Jay Castillo at Darius Castillo na pawang trabahador ng Gurrea Construction Company.

Batay sa imbestigasyon, naghuhukay ang mga construction worker sa mataas na bahagi ng lugar gamit ang isang backhoe nang biglang gumuho ang malambot parte ng lupa.

Ayon sa Malay MDRRMO, maaaring lumambot ang kalsada dahil sa pag-ulan noong nakaraang araw.

Nadagdagan ng 48 ang bilang ng mga nasawi sa COVID-19 sa Baguio City.

Ayon sa Public Information Office o PIO, naitala ang mga nasabing kaso sa loob lamang ng mahigit dalawang linggo.

Sinasabing naitala ang pinakamaraming insidente ng pagkasawi noong Abril 9 na umabot sa siyam.

Ang pinakamatanda umanong pumanaw ay edad 80 habang 31 naman ang pinakabata.

Samantala, inamin naman ni disease expert Dr. Bernard Demot na karamihan sa mga nagpapakonsulta sa lungsod ay malala na nang lumapit sa doktor o ospital.

Nadakip ng mga awtoridad ang isang kilabot umanong estapadora sa Cebu.

Kinilala ni PNP-CIDG director Maj. Gen. Albert Ignatius Ferro ang suspek na si Katherine Posas Diao na nasakote sa City Homes sa Basak, Lapu-Lapu City.

Sinasabing naaresto si Diao sa bisa ng warrant of arrest na ipinalabas ni Presiding Judge Mario Duaves ng Davao City Regional Trial Court, Branch 15.

Nabatid na isa si Diao sa mga incorporators ng Organico Agri-business Venture na binansagang “big time scammer” sa lungsod ng Davao at iba pang parte ng Mindanao.