Sumakabilang buhay na ang alkalde ng Famy, Laguna matapos dapuan ng COVID-19.
Ayon sa Public Affairs Office ng Laguna ang 53 anyos na si Mayor Edwin Pangilinan ay isinugod sa ospital noong March 15 dahil sa hirap huminga at nagpositibo sa COVID-19 noong araw ding yun.
Ipinabatid ng kampo ni Pangilinan na kasabay nitong nasawi ang 76 na taong gulang na inang si Lucena dahil din sa hirap sa paghinga.
Tinamaan ng COVID-19 si Batangas 2nd District Rep. Raneo Abu.
Ayon kay Abu, nagpa-swab test siya noong Marso 25 at makalipas ang isang araw ay lumabas agad ang resulta na positibo siya.
Bilang pagsunod sa regulasyon ng Inter-Agency Task Force (IATF), agad na nagtungo sa isolation facility si Abu upang magpagaling kahit siya ay sinasabing asymptomatic.
May biyahe na mula Bicol region patungong Northern Samar.
Ayon kay Achilles Galindes ng Philippine Ports Authority (PPA), maliban sa Matnog Port sa Sorsogon, dumating na rin sa pantalan ng bayan ng Castilla ang MV Lite Ferry 11 ng Lite Shipping Corporation na nakabase sa Cebu.
Nabatid na noong Huwebes pa umarangkada ang mga biyahe ng barko pa-Northern Samar.
Papayagan ang shipping company na magdagdag ng barko, depende sa dagsa ng mga pasahero sa nasabing lugar.
Kasado na ang surgical lockdown simula ngayong araw hanggang Abril 10 sa dalawang lugar sa Barangay Balabag na matatagpuan sa Boracay Island sa Malay, Aklan.
Ayon sa Malay local government unit (LGU), saklaw ng enhanced community quarantine o ECQ ang Zone 5 at 6 ng Barangay Balabag kung saan apektado ang ilang hotel at resort.
Dahil dito, tanging ang mga may quarantine pass ang papayagang lumabas sa mga apektadong barangay.
Samantala, nilinaw ng lokal na pamahalaan na posibleng tanggalin ang lockdown depende sa COVID-19 situation sa mga nasabing lugar.
Isasalang sa libreng operasyon sa North Cotabato Provincial Hospital ang isang lalaking taga-Kidapawan City upang matanggal ang blade ng kutsilyo na higit isang taon na palang nakabaon sa kanyang katawan.
Pahayag ni Dr. Joel Nelton Sungcad, hinihintay na lang na umuwi ng Kidapawan mula Agusan del Sur si Kent Ryan Tomao para maoperahan.
Matatandaang dinala sa nasabing ospital si Tomao noong Enero 2020 makaraang masaksak ng grupo ng mga binatilyo sa kanilang lungsod.
Ngunit hindi ito inopera dahil sinabi ng doktor na mababaw lamang ang kanyang tama kaya’t tinahi ito agad at pinauwi.
Noong nakaraang linggo lamang nalaman ni Tomao na may nakabaong blade ng kutsilyo sa kanyang katawan matapos magpa-x-ray bilang requirement sa inaplayan niyang trabaho.
Nagbabala ang pamahalaang panlalawigan ng Laguna sa mga may-ari ng resort sa kanilang lugar na tatanggap pa rin ng mga bisita ngayong Semana Santa.
Ito ang inihayag sa DWIZ ni Laguna Gov. Ramil Hernandez kasunod ng anunsyo ng malakaniyang na isailalim muli sa enhanced community quarantine (ECQ) ang mega Manila sumula Lunes, Marso 29.
Ayon sa gubernador, posibleng maharap sa pagpapasara at matanggalan ng lisensya ang mga resort owner na hindi tatalima sa kautusan ng gubyerno.
Dahil dito, pinapayuhan ni Hernandez ang mga may-ari ng mga resort na mag-alok ng re-booking sa kanilang mga kliyente na una nang naglatag ng kanilang reservation.
Pumanaw na ang nakadetineng dating Calauan, Laguna Mayor Antonio Sanchez.
Ito ang kinumpirma ng Bureau of Corrections (BuCor), anila dakong alas-8:30 kaninang umaga nang dalhin si Sanchez sa National Bilibid Prison hospital, pero idineklara rin itong dead on arrival.
Sa ngayon, nakatakdang isailalim sa autopsy ang katawan ni Sanchez.
Mababatid na hinatulan ng reclusion perpetua o habang buhay na pagkakakulong si sanchez dahil sa kasong rape at murder.
At kamakailan ay muling niyanig ni Sanchez ang sambayanan matapos na ianunsyo ng Justice Department na pupwede itong makalaya sa pamamagitan ng good conduct time allowance (GCTA).
Nangangalahati na ang ginagawang rehabilitasyon ng pamahalaan para sa muling pagbangon ng mga biktima ng karahasan sa Marawi City.
Ito ang ini-ulat ni bangon Marawi Task Force Chairman at department of Human Settlements and Urban Development Sec. Eduardo Del Rosario.
Muling bumisita si Del Rosario sa itinuturing na Islamic City sa bansa na pinadapa ng halos pitong buwang bakbakan sa pagitan ng militar at Maute Terrorist Group
Para kay Del Rosario, mabilis nang maituturing ang pag-usad ng rehabilitasyon ng marawi na naunsyami dahil sa ilang buwang lockdown dulot ng COVID-19 pandemic.
Kabilang sa mga nakumpleto na ay ang road network sa loob ng ground zero gayundin ang mga permanenteng pabahay para sa mga pamilyang nawalan ng tahanan.
Ipinagbabawal na ng pamahalaang bayan ng Malibcong sa Abra ang pangangaso at pagkatay ng mga baboy ramo.
Ito’y makaraang mangamatay ang mga baboy – ramo sa mga bayan ng malibcong at tineng sa nasabing lalawigan na labis na ikinabahala ng mga residente ruon.
Nabatid na nagpositibo sa African Swine Flu (Asf) ang mga nakitang karne ng baboy ramo sa bulubunduking bahagi ng Barangay Lat-Ey.
Kasunod nito, nagpulong na ang provincial veterinary office, mga livestock coordinator at municipal agricultural offices sa mga apektadong lugar sa lalawigan.
Ibinunyag ng pamahalaang panlalawigan ng Negros Occidental na may mga umuwing residente sa kanilang lugar na nagsumite ng pekeng COVID-19 test results.
Dahil dito, ayon kay Governor Eugenio Jose Lacson, oobligahin na nila ang lahat ng mga uuwing residente na sumalang sa swab test pagdating ng kanilang probinsya.
Ayon kay Lacson, inamin ng ilang mamamayan ng Kabankalan City na nagbayad sila kapalit ng negatibong test result.
Sinabi naman ni Provincial Administrator Rayfrando Diaz na hawak na ng kanyang tanggapan ang walong fake RT-PCR tests at pinag-aaralan pa nila kung anong legal na hakbang na maaari nilang gawin ukol dito.