RONDA PROBINSYA

Libreng cake at pastries.

Ganyan ang ipinamahagi sa isang community pantry sa Barangay Poblacion, Candelaria, Quezon na sinasabing nilahukan ng mga aabot sa 30 home bakers.

Ang Community Cake and Pastries Pantry ay inilatag ng magkakaibang sina Roxanne Ornoza, Inna Isabel Alegre at Kiana Henson na anila’y layong magbigay-saya sa kanilang mga kababayan sa tulong ng kanilang talento sa pagbe-bake.

Nakatawag-pansin din sa publiko ang kakaiba at nakakaaliw na mga caption sa mga cake tulad ng “Tikim-tikim lang mahal ang insulin,” “Kumain ayon sa timbang,” “Kumain ayon sa diabetes,” “Kain lang hindi lamon,” at “Kain ayon sa Umay.”

Hindi naman umano inasahan ng magkakaibigan na wala pang isang oras ay naubos ang kanilang 1,000 libreng cake at pastries matapos dumugin ng tinatayang dalawang daang residente.

Magiging isolation facility ang Monte Maria Shrine sa Batangas City.

Pahayag ni Batangas Provincial health Officer Dr. Rose Ozaeta, mismong ang pamunuan ng Monte Maria ang nag-alok sa provincial government na gawin itong isolation facility bilang tulong sa laban ng LGU kontra COVID-19.

Ang nasabing shrine ang itinuturing na pinakamataas na statue ng Mama Mary sa buong mundo.

Tinatayang 2,000 asymptomatic COVID-19 patients na naka-home quarantine ang kailangang mailipat sa bagong isolation facility.

Dahil dito, naghahanap ang Batangas provincial government ng mga doctor at nurse para sa nasabing pasilidad.

Arestado ang isang 85-anyos na lalaki matapos umanong barilin ang kanyang 27-anyos na apo sa loob ng kanilang bahay sa bayan ng Sta. Fe sa Davao Del Norte.

Nakaaway umano ng suspek na si alyas Cardo ang kanyang apo na si alyas Niel dahil sinasabing pinalitan ng biktima ang guide bar ng chainsaw ng kanyang lolo.

Bunga nito, binaril ng suspek ang biktima gamit ang .357 revolver kung saan idineklara itong dead-on-arrival sa ospital.

Nakakulong na ang nasabing lolo at nakatakdang sampahan ng kaukulang kaso.

Namahagi ng bangus fry sa mga mangingisda  ang lokal na pamahalaan ng lungsod ng Dagupan.

Ayon kay Mayor Marc Brian Lim, ito’y bilang paggunita sa taunang Bangus Festival na taliwas ito sa nakaugaliang magarbong pagdiriwang ng okasyon.

Kasabay ng simpleng selebrasyon, tinatayang 1,000 bangus fingerlings ang binendisyunan bago pakawalan sa Dawel River.

 Aabot naman sa 60,000 bangus fry ang naipamahagi sa mga mangingisda ng Barangay Salapingao sa nasabing lungsod.

Namahagi ang Department of Agriculture sa mga farmers association (FA) ng libreng binhi ng mga mais sa ilang bahagi ng CALABARZON.

Ito’y upang mapalakas ang pag-ani ng mga mais sa naturang rehiyon.

Ayon sa DA-4A, namahagi sila ng aabot sa 300 kilograms na hybrid glutinous corn seeds, 96 na bag ng mga yellow corn seeds, at 100 bag naman ng hybrid yellow corn seeds sa sa Malabanan Sur FA sa Candelaria at Sariaya Corn FA sa Quezon, at San Pablo City Corn FA noong ika-28 ng Abril.

Maliban pa sa mga binhi na ipinamigay, namahagi rin sila ng mga fertilizer, urea fertilizer, at mga bote ng insecticide.

Samantala, nagpasalamat naman ang mga magsasaka na nakatanggap ng naturang binhi at sinabing sana’y magpatuloy pa ang tulong na ibinibigay sa mga magsasaka sa bansa.

Hinimok ng anak nang pinaslang na aktibistang si Jory Porquia si Justice Secretary Menardo Guevarra na hayaan ang inter agency task force on extra judicial killings na mag-imbestiga sa nasabing kaso.

Magugunitang si Porquia, coordinator para sa Bayan Muna Party List ay pinaslang noong April 30, 2020 sa kaniyang inuupahang bahay sa Iloilo City ng mga hindi pa nakikilalang suspek.

Ayon kay Lean Porquia, anak ng aktibista, hindi sila nakunsulta o nilapitan man lang ng anumang team ng mga otoridad na nag-iimbestiga umano sa kaso ng kanyang ama na patunay na ayaw ng mga itong maresolba ang krimen o matukoy ang sangkot dito at panagutin ang mga ito.

Ipinabatid ng batang Porquia na bago nasawi ang ama inanunsyo ng mga local police sa radyo na isasailalim sa surveillance ang kanyang ama.

Dahil dito umaapela ang pamilya Porquia sa DOJ para pabilisin ang imbestigasyon sa kaso at pasagutin ang gobyerno sa mga alegasyon ng extra judicial killings.

Malagim ang sinapit ng isang motorcycle rider makaraang makaladkad ng trailer truck na ikinasawi nito sa bayan ng Alicia sa lalawigan ng Isabela.

Ayon sa Alicia Municipal Police, nakilala ang biktima na si Agelito Mapalo, 43 taong gulang.

Sa imbestigasyon, parehong tinatahak ng truck at motorsiklo ang national highway sa Barangay Paddad nang sumabit ang motor sa tapalodo ng trailer truck kaya’t nakaladkad ito ng ilang metro.

Naisugod pa sa ospital ang biktima ngunit idineklara ring dead on arrival.

Nakakulong na ngayon ang truck driver at nakatakdang sampahan ng kaukulang kaso.

Libreng pagkaing halal.

Ganyan ang alok ng isang community pantry na inilunsad ng isang grupo ng mga Muslim doctors sa Barangay Tetuan, lungsod ng Zamboanga.

Pahayag ni Dr. Abdul Javar Esturco, mga tulad niyang doktor ang unang nag-ambag para makabili ng mga handang pagkain sa nasabing pantry.

Wala rin aniyang pinipiling bigyan ang kanilang pantry, mapa-Muslim man o Kristiyano, bilang ambag nila sa bayanihan ngayong pandemya lalo’t ipinagdiriwang nila ngayon ang buwan ng Ramadan.

Patay ang dalawang tulak umano ng droga matapos manlaban sa mga awtoridad sa Barangay Soledad, Santa Rosa, Nueva Ecija.

Kinilala ni Nueva Ecija Police Provincial Office director Col. Jaime Santos ang isa sa mga nasawi na si Manny de Guzman habang inaalam pa ang pagkakakilanlan ng isa pang lalaki.

Nabatid na unang nagpaputok ang mga suspek kaya’t napatay sila ng mga pulis.

Maliban sa mga baril at limang daang pisong buy-bust money, narekober din sa pinangyarihan ng insidente ang 270,000 pesos na halaga ng hinihinalang shabu.