RONDA PROBINSYA

Pinangunahan mismo ni Transportation Secretary Arthur Tugade ang pagpapasinaya sa bagong gawang taxiway sa Mactan-Cebu international airport sa lungsod ng Lapu-Lapu.

Sa isang pahayag, sinabi ni Tugade na ang naturang taxiway ang malaking milestone para sa mas maayos at ligtas na paggalaw ng mga dadaan ditong sasakyang panghimpapawid.

Mababatid na ang naturang proyekto ay nagkakahalaga ng P222-M.

Kasunod nito, ang naturang taxiway ang magiging dahilan para mapag-accommodate ang paliparan ng 50 mga eroplano kada oras mula sa kasalukyang 35.

Nasabat ng mga awtoridad ang P4.6 milyong halaga ng hinihinalang marijuana mula sa tatlong lalaki sa ikinasang operasyon sa lungsod ng Tarlac.

Ayon sa Philippine National Police Drug Enforcement Group (PDEG), nahuli ang mga hindi pinangalanang suspek sa Barangay San Nicolas.

Sinasabing kabilang sa mga nakumpiska mula sa mga ito ang nasa 24 bricks ng dried marijuana, 26 rolled dried marijuana leaves, at dalawang bote ng cannabis oil.

Sa hiwalay namang operasyon sa Concepcion, Tarlac, isang magkapatid ang nakuhanan ng P3.4 milyon halaga ng hinihinalang shabu.

Sasampahan ang mga suspek ng kasong paglabag sa Republic Act 9165 o Comprehensive Dangerous Drugs Act of 2002.

Kasado na ang granular lockdown sa dalawang purok sa Iriga City, Camarines Sur makaraang magdulot ng matinding hawahan ng COVID-19 ang mga nag-inumang residente.

Ayon kay City Social Welfare and Development Officer Maridel Verrosa noong Abril 29 nag-umpisa ang lockdown sa Zone 1 at 2 sa Barangay Santiago.

Natuklasan na sampung tao ang nagpositibo sa coronavirus dahilan upang ikasa ang mahigpit na quarantine measure.

Sinasabing halos 300 pamilya naman ang apektado ng naturang lockdown.

Patay ang isang lalaki habang dalawa naman ang nalapnos ang katawan makaraang aksidenteng makuryente ang mga ito sa Barangay Balogo, Pigca­wayan sa North Cotabato.

Ayon sa mga awtoridad, nakilala ang mga nasawi na si Jesus Tagaan habang nadamay ring nakuryente sina Maynard Igcalinos at Rene Igcalinos na mga residente ng Kalakakan, Pikit.

Batay sa nakuhang impormasyon mula sa Municipal Disaster Risk Reduction and Management Office, aksidenteng nakuryente ang mga biktima sa ginagawang water system sa nabanggit na lugar.

May dala umanong tubo si Tagaan na sumabit sa live wire kaya’t nakuryente ito habang nadamay naman ang dalawa pang kasamahan nito.

Samantala, sugatan din sa insidente si Police Staff Sergeant Atilano Arandilla lll nang tumulong ito para ma-rescue ang mga biktima.

Dinampot ng mga tauhan ng PNP Criminal Investigation and Detection Group-City Field Unit ang isang senior citizen dahil sa pag-iingat ng mga baril at bala sa kanyang bahay sa lungsod ng Olongapo.

Ayon sa mga PNP-CIDG, ang suspek na si Noriel Mendoza, 60 taong gulang, ng Barangay Barretto ay nahaharap sa kasong paglabag sa Republic Act No. 10591 o Comprehensive Firearms and Ammunition Regulation Act.

Nabatid na sa bisa ng search warrant, pinasok ng mga pulis ang bahay ni Mendoza ay nasamsam mula rito ang isang kalibre .38 na revolver, apat na bala ng kalibre .38, isang improvised shotgun at dalawang bala ng shotgun.

Nakadetine na ngayon ang suspek sa detention cell ng PNP-CIDG.