RONDA PROBINSYA

Inaresto ng mga otoridad ang 18 menor de edad sa Pagsanjan, Laguna matapos maaktuhang lumabag ang mga ito sa ipinatutupad na health and safety protocols sa lugar.

Ayon kay Laguna Police Provincial Director Col. Serafin Petalio II, naaktuhan ng kanyang mga tauhan ang mga naarestong menor de edad na naglalaro ng bilyar nang walang suot na face masks at hindi sumusunod sa social distancing.

Pahayag ni Petalio, napakadelikado ng ginawang pagbabalewala ng mga kabataang ito dahil puwede aniya silang mahawa o makahawa ng COVID-19.

Sa ngayon, inisyuhan na aniya nila ng ticket of violation at pinagsabihan ang mga ito.

Samantala, mahigit 100 indibidwal naaman ang inaresto sa Biñan, Laguna matapos mahuli sa aktong hindi nakasuot ng tama ang kanilang mga face masks at face shields.

Sa ilalim ng city ordinance, lahat ng mga health protocol violators ay maaring pagmultahin ng nasa limang libong piso at pagkabilanggo ng halos dalawang buwan.

Dagdag pa ni Petalio, nagbilin na umano sya sa lahat ng chief of police sa iba’t ibang police station sa lalawigan ng laguna na paigtingin ang pagbabantay laban sa mga health protocol violators, alinsunod aniya sa bilin ng pamunuuan ng pulisya at direktiba ni Pang. Rodrigo Duterte.

Sumiklab ang putukan sa pagitan ng mga tropa ng pamahalaan laban sa mga miyembro ng Bangsamoro Islamic Freedom Fighters (BIFF) sa Datu Paglas sa Maguindanao, kagabi.

Ayon kay Philippine Army 6th Infantry Division Spokesperson, Lt Col. John Paul Baldomar, tinatayang nasa 100 mga miyembro ng mga BIFF ang umokupa sa Datu Paglas.

Mababatid na habang kinurdunan ng mga pwersa ng pamahalaan ang Datu Paglas public market, at tsaka nagpaulan ng putok ang mga miyebro ng BIFF.

Dahil dito, agad namang inilikas ng mga awtoridad ang mga residente malapit sa lugar.

Samantala, tiniyak naman ni Datu Paglas Mayor Datu Abubakar Paglas na under control na ang sitwasyon sa kanilang lugar.

Dinampot ng mga awtoridad ang isang 17 anyos na binatilyo matapos tumakas sa isang quarantine facility sa Roxas City.

Ayon sa Roxas police, namataang naglalakad ang hindi pinangalanang menor de edad sa Barangay Banica kaya’t agad itong hinuli ng mga awtoridad at dinala sa City Crisis Center.

Wala namang maibigay na dahilan ang binatilyo kung bakit siya tumakas sa pasilidad kahit nagpositibo siya sa virus.

Mas pinaigting naman ang contact tracing activities ng lokal na pamahalaan sa mga nakasalamuha ng nasabing menor de edad.

Kasalukuyan nang ginagamit ang mga bagong COVID-19 modular facility sa Batangas Medical Center (BATMC).

Ito’y ayon kay BATMC Director Dr. Ramoncito Magnaye makaraang pasinayaan ang pasilidad noong nakaraang linggo.

Dahil dito, sinabi ni Magnaye na kaya na ulit nilang kumuha ng mga dagdag pang pasyente sa kanilang ospital.

Pito aniya ang nakaratay ngayon sa isolation facility habang dalawa naman sa ICU o intensive care unit.

Maliban sa taglay na single beds kada kwarto, sinasasabing may sarili rin itong palikuran, negative pressure, at anti-bacterial flooring.

Napatay ng kanyang mga kabaro ang isang pulis makaraang mauwi sa engkuwentro ang isinagawang entrapment operation laban sa kanya sa bayan ng Polangui sa Albay.

Ayon kay Police Lt. Col. Ronnie Fabia, hepe ng Daraga Municipal Police Station, ang nasawing suspek ay nakilalang si Police Corporal Joel Tualla ng Polangui police station.

Matagal na umanong nakakatanggap ng impormasyon ang pulisya ukol sa pagbebenta ng hindi lisensiyadong baril ni Tualla kaya’t inilatag ang entrapment operation.

Ngunit sa kalagitnaan ng operasyon ay biglang nagpaputok ng baril si Tualla kaya’t napilitang gumanti ang mga awtoridad na ikinasawi nito.

Dahil naman sa suot na bulletproof vest, nakaligtas ang isang operatiba matapos tamaan ng bala.

Samantala, sinasabing may narekober na hinihinalang droga mula sa napatay na pulis.

Sinibak na ang pari sa San Fernando, Pampanga matapos mag-viral ang video kung saan nabunyag ang relasyon nito sa isang babaeng may asawa na.

Ayon ito sa Archdiocese ng San Fernando matapos ihayag ni Archbishop Florentino Lavarias na gumawa na ng hakbang ang Roman Catholic Archbishop of San Fernando para kausapin ang apektadong pamilya.

Sinabi pa ni Lavarias na sensitibo ang usapin at bilang paunang hakbang na maresolba ito ay ang pag a alis sa nasabing pari mula sa kaniyang parish  assignment.

Una nang tiniyak ni lavarias ang imbestigasyon sa sensitibong insidente matapos makatanggap ng pormal na reklamo sa apektadong pamilya.