RONDA PROBINSYA

Patuloy at mabilis na pagsirit ng kaso ng COVID-19 sa bayan ng Sta. Cruz sa Marinduque.

Ito ayon kay Sta. Cruz Mayor Antonio Uy ay kayat kailangan nila ang higit na confirmatory swab tests, COVID-19 vaccines at contact tracers.

Nasa 20 RT-PCR tests kada araw lamang ang inilaan aniya sa kanilang bayan na ipinadadala sa RITM bago maibalik sa kanila ang resulta makalipas ang tatlo hanggang apat na araw.

Kasabay nito, umaapela si Uy na mabigyan sila ng mas malaking supply ng bakuna sa Marinduque lalo na sa kanilang bayan.

Patay sa pamamaril ang isang lalaking may problema sa pag-iisip sa Tondo, Manila.

Ayon sa ulat ng Manila Police District, dalawang pulis ang nakarinig ng isang putok ng baril.

Kaya naman agad na pumunta ang mga ito sa lugar at nakita na ang bangkay ng biktima.

Nadakip ang suspek sa pamamagitan ng impormasyon ng isang saksi.

Inaalam pa ng otoridad ang dahilan ng pamamaril.—sa panulat ni Rex Espiritu

Pumalo na sa 3,000 ang naitatalang bagong kaso ng COVID-19 sa lalawigan ng Laguna.

Ayon kay Governor Ramil Hernandez, nasa 3,000 ang aktibong kaso ay 26 dito  ay dinapuan ng nakakahawang Delta variant virus.

Aniya, dahilan ito kung bakit isinailalim sa Enhanced Community Quarantine (ECQ) ang probinsiya hanggang sa kalagitnaan ng Agosto.

Dagdag ni Hernandez, nagpapatupad na ngayon ng mas mahigpit na health protocols at nagdagdag na rin ng puwersa ng mga kapulisan sa naturang lugar.

Bukod dito, pinaiigting na rin ng lalawigan ang pagbabakuna kung saan nagkukulang na sila ng suplay ng bakuna sa lugar.

Samantala, umaabot pa lamang sa 10% ng target population ang natuturukan ng bakuna kontra COVID-19 sa lalawigan.

Sarado hanggang Agosto 15 ang ilang tanggapan ng Provincial Government ng Cavite.

Ito’y dahil sa mataas na bilang ng mga empleyadong tinamaan ng COVID-19.

Kinumpirma ng Provincial Information and Communication Affairs Department (PICAD)-Cavite na naka-work from home ang lahat ng empleyado.

Tanging ang Office of the Governor, Provincial Disaster Risk Reduction and Management Office, Provincial Social Welfare and Development Office, Road Safety Division, Provincial Jail at General Services Office ang nasa ilalim ng skeleton work force.

Hindi naman idinetalye ng PICAD kung ilang empleyado ang dinapuan ng COVID-19.  —sa panulat ni Drew Nacino

Dead on the spot ang rider at angkas nito nang sumalpok sa isang SUV sa National Highway Sa Padre Burgos sa Quezon.

Ayon sa Padre Burgos Municipal Police Station, ang motorsiklo ay patungo sana sa Lucena City habang pabalik naman sa bayan ng Mulanay ang SUV.

Dahil sa tindi ng pagsalpok, tumilapon ang rider at angkas nito sa magkabilang bahagi ng highway at kaagad nasawi matapos magtamo ng matinding pinsala sa ulo at katawan.

Sumabog at nasunog pa ang motorsiklong sinasakyan ng mga biktima.

Bahagya namang nawasak ang unahang bahagi ng SUV na dumiretso sa gilid ng highway at ligtas ang mga sakay nito.

Hawak na ng Padre Burgos Municipal Police Station ang driver ng SUV habang iniimbestigahan pa ang insidente.

Apat na kabahayan ang naabo sa bayan ng Bulakan, Bulacan.

Ayon sa Bulakan fire station, nagsimula ang sunog sa ikalawang palapag na bahay ng isang Aika Luciano sa barangay Santa Ines.

Agad kumalat ang apoy sa tatlong katabing bahay ng mga residenteng sina Hermir Arcega, Rolando Luciano at Raymart Arcega.

Malaki naman ang naitulong ng tubig-baha dahil ito ang isinaboy ng mga residente sa mga natupok na bahay.

Tatlong firetruck naman ng BFP ang sumaklolo upang tuluyang maapula ang apoy.

Walang nasaktan habang tinaya sa 60,000 pesos ang halaga ng mga natupok na ari-arian sa sunog na inaalam pa ang dahilan. —sa panulat ni Drew Nacino

Dead-on-the spot si Sulu Provincial Police Director, Col. Michael Bayawan matapos pagbabarilin habang nasa isang quarantine control point o QCP sa Jolo.

Ayon kay Sulu Governor Abdusakur Tan, dakong alas-4 ng hapon nang paulanan ng bala ang 49 anyos na opisyal sa barangay Asturias.

Kinilala ang suspek na si Staff Sergeant Imran Jilah na kalauna’y pinagbabaril at napatay rin ng mga kabaro nito.

Nag-i-inspeksyon aniya si Bayawan sa QCP nang sitahin si Jilah dahil sa mahaba nitong buhok na nauwi sa argumento kaya’t bumunot ng long rifle ang sarhento at niratrat ang biktima.

Bago ang insidente ay sinita ng hepe si Jilah at makalipas ang ilang araw ay nagdala ng gunting si Bawayan upang gupitan ang suspek, pero mga bala ng baril ang isinagot nito sa kanyang superior.

Si Bayawan ang hepe ng Sulu Provincial Police Office nang maganap ang misencounter na ikinasawi ng 4 na sundalo na miyembro ng intelligence unit ng AFP.—sa panulat ni Drew Nacino

Patay ang isang magsasaka matapos barilin ng isang kapitan sa Lanawan, Pastrana, Leyte.

Ayon sa otoridad, ang suspek at biktima ay may matagal nang alitan dahil sa lupa na sinasaka ng mga ito.

Ayon pa sa ulat, duguan na ng nakita nila ang biktima at naliligo naman sa sarili nitong dugo ang kanyang ama .

Bago nito, nagsasasaka ang biktima malapit sa lupain ng suspek, nagalit umano ang suspek at binaril ang biktima at ama nito na sinubukang tulungan ang kanyang anak.

Dead on arival na sa ospital ang biktima habang nagpapagaling naman ang ama nito.

Nakatakas naman ang suspek gamit ang motorsiklo at kasalukuyang tinutugis.—sa panulat ni Rex Espiritu

Magpapatupad ng travel ban via air at sea ang probinsya ng Bohol simula sa Biyernes, Agosto 6 hanggang Agosto 20.

Batay sa inilabas na Executive Order ni Bohol Governor Arthur Yap, ito’y bilang pag-iingat pa rin sa banta ng delta variant.

Bibigyang daan din aniya ng lokal na pamahalaan ang pagsasagawa ng mas maigting na kampanya para mabakunahan ang lahat ng senior citizen, may mga comorbidity at masuportahan ang mga OFW na kailangan nang makaalis patungong ibayong dagat.

Hindi sakop ng nasabing travel ban ang pag-byahe ng mga cargo, APOR at mayroong essential at official business sa probinsya.