RONDA PROBINSYA

86 na health workers mula sa Mariano Marcos Memorial Hospital and Medical Center sa Batac, Ilocos Norte ang nag positibo sa COVID-19.

Ayon sa pamunuan ng ospital ang mga nag positibong health workers ay naka-isolate na.

Naka admit din sa ospital ang 116 pang COVID-19 patients.

Samantala, 37 pang suspected COVID-19 patients at isang probable case ang naka-confine rin sa nasabing ospital kung saan tatlo ang nasa severe category case.

Ang Ilocos Norte ay nakapag rehistro ng 9,002 COVID-19 cases hanggang nitong Agosto 2 kung saan 6,857 ang naka-recover, 92 ang nasawi at 2,053 ang nananatiling active cases.

Posibleng magpatupad ng Enhanced Community Quarantine status sa Cavite.

Ayon kay Governor Jonvic Remulla, ito’y kapag nagpatuloy pa ang pagtaas ng kaso ng COVID-19 sa lalawigan.

Gayunman, inaalala ng Gobernador ang mga maapektuhan o mahihirapan sa oras na magsara na naman ang lalawigan.

Kaya naman nagpaalala si Remulla sa mga opisyal ng barangay na maging istrikto sa pagpapatupad ng protocol upang maiwasan ang pagkalat ng virus.

Lubog pa rin sa baha ang nasa mahigit 100 barangay sa 11 bayan ng Pampanga.

Ayon kay Angelina Blanco ng Provincial Disaster Risk Reduction and Management Office, catch basin ang Pampanga lalo na ang Masantol at Macabebe.

Dati pa man aniya ay nagtatagal na umano ang tubig sa naturang mga lugar hindi lamang dahil sa pagbuhos ng ulan kundi maging pag high tide dahil coastal municipality aniya ang kanilang lugar.

Kaugnay nito, dalawang bayan na umano ang nag-deklara ng State of Calamity dahil sa dalawa hanggang talampakan na baha.

Naghihingalo na ang Health Care Utilization Rate sa Aklan ayon kay Governor Florencio Miraflores.

Sinabi Miraflores na umabot na sa critical level ang Health Care Utilization Rate sa kanilang lugar kung saan nasa mahigit 80% na ang occupancy rate sa kanilang mga COVID-19 referral center.

Patuloy din aniyang tumataas ang kaso ng COVID-19 sa lalawigan na mayroong 30% daily attack rate.

Hinala ni Miraflores, nakapasok na ang Delta variant sa probinsya kung kaya’t mayroong mga kaso kung saan halos isang buong pamilya ang positibo sa COVID-19.

Patay ang isang Junior Police Official matapos aksidenteng pumutok ang baril nito sa San Pascual, Batangas.

Kinilala ng mga awtoridad ang biktima na si Police Captain Rjoval Lopez, 36 anyos, nakatalaga sa PNP Headquarters sa Camp Crame sa Quezon City.

Batay sa kwento ng kapatid ng biktima na si Marshel Gauang, bandang alas-11:30 ng umaga, nakita niya si Lopez na nasa loob ng sasakyan at chini-check ang service fire arm nito na 9mm glock.

Bigla na lang umano niyang nakitang pumutok ang baril at tinamaan sa ulo ang kaniyang kapatid.

Dead on the spot si Lopez, patuloy naman ang imbestigasyon sa naturang insidente.

Magpapatupad ng travel ban via air at sea ang probinsya ng Bohol simula sa Biyernes, Agosto 6 hanggang Agosto 20.

Batay sa inilabas na executive order ni Bohol Governor Arthur Yap, ito’y bilang pag-iingat pa rin sa banta ng Delta variant.

Bibigyang daan din anya ng lokal na pamahalaan ang pagsasagawa ng mas maigting na kampanya para mabakunahan ang lahat ng senior citizen, may mga co-morbidity at masuportahan ang mga OFW na kailangan nang makaalis patungong ibayong dagat.

Hindi sakop ng nasabing travel ban ang pag-byahe ng mga cargo, APOR at mayroong essential at official business sa probinsya.

Binawasan ng isang gate ang binuksan sa Ambuklao Dam sa Benguet kaninang alas-6 ng umaga.

Batay sa abiso ng PAGASA, pitong gate ang binuksan sa Ambuklao sa 3.5m.

Nasa mahigit 700m naman ang lebel ng tubig dito.

Anim na gate din ang binuksan sa Binga Dam sa 3.5m.

Habang isang gate naman ang binuksan sa Ipo Dam sa Bulacan sa 0.15m.

Ayon sa PAGASA, patuloy na mararanasan ang pag-ulan sa malaking bahagi ng bansa dulot ng hanging Habagat.

Isinailalim sa localized total lockdown ang Mabuhay City Subdivision at maging ang Phase 2 Extension nito sa Dasmariñas, Cavite dahil sa pagsirit ng kaso ng COVID-19.

Sinasabing tatagal ng hanggang Agosto 7 o Sabado ang nasabing lockdown kung saan apektado ang mahigit 7,300 kabahayan, bagamat inirekomenda ng IATF na palawigin pa ng dalawang linggo ang restriction upang higit na mas maging epektibo ang pag kontrol sa virus.

Ayon kay Dasmariñas Mayor Jenny Braganza, nasa 31 COVID-19 cases lamang ang naitala sa nasabing subdivision noong Hulyo 24 at dumoble ito sa 61 noong Hulyo 29 hanggang sumampa ng 93 pagpasok ng Agosto.

Ipinag-utos na ni Braganza ang pagsailalim sa Genome Sequencing ng ilang sample ng mga nag positibo para malaman kung mayroong Delta variant sa lungsod samantalang binuksan ang Pintong Gubat Elementary School para tuluyan muna ng mga manggagawang apektado ng lockdown.

Tiniyak ng local government ang pagbibigay ng ayuda sa mga residenteng apektado ng lockdown.

Kahapon, Martes ay nananatili sa isolation facility ang 83 aktibong kaso.

Pinaghahanda na ni Aklan Governor Florencio Miraflores ang 17 municipal mayors sa lalawigan ng kanilang burial grounds para sa mga nasawi sa COVID-19.

Kasunod na rin ito nang pagtigil ng partner crematorium ng Aklan Provincial Government na Gegato Abecia Funeral Parlor Crematorium sa kanilang operasyon noong Lunes, Agosto 2 dahil sa pagdagsa ng mga labi na kailangang tutukan.

Sinabi ni Miraflores na hanggang nitong Agosto 2 ay umabot na sa 95 ang bilang ng mga nasawi sa COVID-19 sa Aklan.

Ang nasabing crematorium ay nag iisa lamang sa Panay Island kaya’t nahihirapan itong mag-accommodate sa lahat ng labi na nanggagaling sa iba’t ibang bahagi ng lalawigan.

Nagbitiw sa tungkulin si Mayor Walter Echevarria, Jr. ng General Mariano Alvarez sa lalawigan ng Cavite dahil sa mga problemang pangkalusugan.

Ang kaniyang pagbaba sa puwesto ay inanunsyo ni Echevarria sa Facebook bagamat hindi na nito idinetalye pa ang tinukoy na health reasons.

Sinabi ni Echevarria na kailangan ng bayan ng GMA ng lider na mangunguna sa mga residente lalo na sa laban kontra COVID-19.

Umapela si Echevarria sa mga kababayan niya na patuloy na suportahan ang mga programa ng local government lalo pa’t naniniwala siyang itutuloy ito ng papalit sa kanyang si Mayor Maricel Torres.

Si Torres ay una nang nanumpa kay Cavite Governor Jonvic Remulla kasama si Vice Mayor Angela Lenin Paycana.