RONDA PROBINSYA

Pinai-imbestigahan ni Cebu City Vice Mayor Michael Rama sa gobyerno ang umano’y hoarding ng oxygen tanks sa lungsod.

Ito ayon kay Rama ay sa gitna na rin ng malalang sitwasyon ng lungsod dahil sa COVID-19.

Sinabi ni Rama na dapat pakilusin ng gobyerno ang DTI at PNP para matigil ang hoarding ng oxygen tanks.

Nagaalala na rin aniya ang isang may ari ng ospital dahil sa limitadong bilang ng oxygen tanks.

Binigyang diin ni Rama na dapat mabilis na makapagpamahagi ng oxygen tanks dahil hindi makapagtabi ng sapat na supply nito ang mga ospital kasunod ng kawalan ng storage.

Isasailalim sa heightened restrictions ang Iloilo City simula sa Agosto 8.

Ito’y sa kabila ng umiiral nang Enhanced Community Quarantine (ECQ) sa lungsod.

Ayon kay Mayor Jerry Treñas, maliban sa mga papauwing Overseas Filipino Worker, hindi maaaring bumyahe ang iba papasok ng Iloilo City.

Maaari lang din aniyang makapasok sa lungsod ang mga nagta-trabaho at kailangan ng access sa mga medical needs o kailangan mabakunahan.

Ipinatupad din umano ang total liquor ban habang piling industriya lang din ang pinayagan na makapag-operate ng full capacity.

Nanawagan ang lokal na pamahalaan ng Cebu City ng karagdagan pang health workers para matugunan ang tumataas na kaso ng COVID-19 sa kanilang lugar.

Ayon kay Acting Mayor Michael Rama, marami pang nurse at medical staff ang hindi na nagtatrabaho na maaaring makatuwang sa paglaban na ito sa COVID-19.

Samantala, sinabi rin ni Rama na bubuksan na nila ang kanilang “field hospitals” sa mga darating na araw para mabawasan ang mga COVID-19 patients sa mga medical facilities.

Bubuksan aniya nila ang field hospital na ito sa isang malaking sports complex kung saan i-a-accommodate ang mga asymptomatic, mild at moderate na kaso ng COVID-19.

Napaslang ng isang Nigerian National ang isang tricycle driver sa Dagupan City.

Ayon sa ulat, inalok ng driver ang suspek ng sakay matapos itong lumapit sa kanya.

Pero imbes na maayos na sagot ang ibalik ng Nigerian, kung ano-anong masasamang salita ang binitiwan nito dahilan para sila ay magtalo.

Kaya naman nailabas ng driver ang metal pipe nito bilang depensa, pero nakuha ito ng suspek at pinalo niya ito sa ulo ng paulit-ulit hangagang sa hindi na gumagalaw ang biktima.

Dead on arrival na sa ospital ang biktima.

Nasa kamay naman na ng awtoridad ang suspek na nasangkot na rin sa ibang kaso nito lang Abril 2021. —sa panulat ni Rex Espiritu

Nasa kamay na ng awtoridad ang 4 sa 7 suspek sa pagdukot at panununog sa isang online seller sa Nueva Ecija.

Tatlong pulis ang nasakote ng awtoridad at nahuli rin ang isang sibilyan na siyang care taker ng lugar kung saan dinala ang biktima ng panununog at pagdukot.

July 20 nang pabalik na sana ng Cavite ang biktima sakay ang kanyang kotse matapos makipagkita sa isang kliyente nang harangin sila ng isang pick-up sakay ang tatlong armadong lalaki. —sa panulat ni Rex Espiritu

Binawian ng buhay ang isang magkapatid na babae makaraang ma-trap sa loob ng nasusunog nilang tahanan sa Matnog, Sorsogon.

Ayon sa mga awtoridad, ang magkapatid na pumanaw ay may edad 18 at 11 na pawang residente ng Barangay Tablac.

Pahayag naman ng hepe ng BFP-Matnog na si Senior Fire Officer 2 Ronnie Anonuevo, dahil sa mabilis na pagsiklab ng apoy malapit sa main door ay hindi na nakalabas ng bahay ang mga biktima.

Bagama’t sugatan ay masuwerteng nakaligtas sa insidente ang ina ng magkapatid.

Hinihinalang ang nakasinding kandila na inilagay malapit sa mga galon ng gasolina ang naging sanhi ng naturang sunog.—sa panulat ni Rex Espiritu

Isang pulis ang natimbog matapos matuklasang miyembro umano ng Abu Sayyaf Group o ASG.

Kinilala ni PNP Chief, Gen. Guillermo Eleazar ang suspek na si Masckur Adoh Patarasa na naaresto sa isang Joint Police Operation.

Nahaharap sa kasong kidnapping with serious illegal detention si Patarasa o alyas “Makong” o “Omair Sali Taib,” sa isang korte sa Isabela City, Basilan.

Si patarasa anya ay isa rin umanong finance at Logistics Liaison Officer ng Dawla Islamiya at ASG at kabilang sa martial law arrest order 1 noong Marawi Siege noong 2017.

Lumabas sa imbestigasyon na binalak ng suspek na pulis na magpadala ng pondo sa mga bandidong grupong lumalaban sa Marawi.

Si patarasa ay sinasabing bayaw ni ASG Leader Isnilon Hapilon, na isa sa mga nanguna sa panig ng mga terorista sa marawi siege na kalauna’y napatay sa bakbakan.

Sisibakin sa serbisyo si Patarasa bukod pa sa pitong kasong kakaharapin nito habang inaalam na kung may mga kasabwat ito sa loob ng PNP.—sa panulat ni Drew Nacino

Isang lolo ang patay matapos barilin ng kapitbahay sa Pagudpud, Ilocos Norte.

Nakatayo lamang sa kanyang kubo ang 85 anyos na biktima nang biglang pumasok at barilin ng lasing umanong suspek gamit ang sumpak sa Barangay Burayoc.

Ayon kay Major Eduardo santos, hepe ng Pagudpud Municipal Police Station, tinamaan sa kanang balakang ang biktima na agad nitong ikinamatay.

Agad namang naaresto ang suspek na nahaharap sa kasong murder.—sa panulat ni Drew Nacino

Binawian ng buhay ang isang magkapatid na babae makaraang ma-trap sa loob ng nasusunog nilang tahanan sa Matnog, Sorsogon.

Ayon sa mga awtoridad, ang magkapatid na pumanaw ay may edad 18 at 11 na pawang residente ng Barangay Tablac.

Pahayag naman ng hepe ng BFP-Matnog na si Senior Fire Officer 2 Ronnie Anonuevo, dahil sa mabilis na pagsiklab ng apoy malapit sa main door ay hindi na nakalabas ng bahay ang mga biktima.

Bagama’t sugatan ay masuwerteng nakaligtas sa insidente ang ina ng magkapatid

Hinihinalang ang nakasinding kandila na inilagay malapit sa mga galon ng gasolina ang naging sanhi ng naturang sunog.

Pinaalalahanan ng mga awtoridad ang mga mamamayan ng Pangasinan na maging vigilant o mag-ingat laban sa dengue.

Ito’y makaraang i-ulat ng Pangasinan Provincial Health Office (PHO) na dumoble ang bilang ng mga dengue cases mula Enero hanggang Hulyo 26 ngayong taon.

Ayon sa pinakabagong datos ng PHO Epidemiology and Surveillance Unit, lumitaw na nagkaroon ng 2,634 dengue cases o 97% na pagtaas kumpara sa 1,334 cases na naitala sa kaparehong panahon noong nakalipas na taon.

Gayunman, dalawa lamang ang pumanaw ngayong taon na mas konti kumpara noong 2020 na pumalo sa 11.

Nasa watch list naman ng health office ang ilang bayan at lungsod tulad ng San Carlos City, Alaminos City, Pozorrubio, Bolinao, Urdaneta City, Bayambang, Lingayen, at iba pang munisipalidad.