RONDA PROBINSYA

Kinakapos na ng espasyo ang anim na sementeryo sa Cebu City dahil sa mataas na bilang ng namamatay sa COVID-19.

Ayon kay Cebu City Councilor David Tumulak, naabot o maaabot na ng Pardo Roman Catholic Cemetery, Calamba Cemetery, Queen City Memorial Garden at Municipal and Veterans Cemetery ang kanilang full capacity.

Sa Carreta anya ay mayroon na lamang apat na nitsong natitira.

Aminado si tumulak na hindi maikakailang tumaas ngayong buwan ang COVID-19 fatalities sa lungsod pero beberipikahin nila kung ano ang tunay na sanhi ng karamihan ng mga namatay.

Sa ngayon ay 64 na death certificates na ang bineberipika ng Cebu City Health Department Cadaver Division Head kung pawang may kaugnayan sa COVID-19 ang mga ito.  —sa panulat ni Drew Nacino

Hinimok ng isang kilalang punerarya sa Cebu City ang mga ospital na ayusin na ang kanilang storage facilities bilang preventive measure laban sa COVID-19.

Ito’y upang matiyak na hindi makahahawa ng COVID-19 ang mga pumanaw na pasyente.

Ayon sa manager ng punerarya na tumangging magpabanggit ng pangalan, hindi muna dapat i-release ng mga ospital ang mga namatay na COVID patient kung hindi pa naisasapinal ang funeral arrangement.

Ngayong Hulyo anya sila nakapagtala ng pinaka-maraming namatay sa COVID-19 at tinatanggihan na nila ang hiling ng ilang pamilyang ilagay muna sa freezer ang labi ng kanilang kaanak, dahil apat na bangkay lamang ang kaya nilang i-accommodate bukod pa sa fully booked na rin sila.

Tiniyak naman ng Cebu City Health Department Cadaver Division Head, Dr. Alice Aycardo na mino-monitor na nila ang sitwasyon ng mga funeral parlors at sementeryo.

Sa ngayon anya ay 64 na death certificates na ang kanilang bineberipika kung pawang may kaugnayan sa COVID-19 ang mga ito.  —ulat mula kay Drew Nacino

Naitala na ng Iloilo City ang kauna-unahan nitong COVID-19 Delta variant case, mahigit dalawang buwan matapos isailalim sa Enhanced Community Quarantine (ECQ) ang lungsod.

Kinumpirma ni Iloilo City Mayor Jerry Treñas na isang 30 anyos na lalaking hindi bakunado ang tinamaan ng Delta variant.

Naka-home quarantine na anya ang lalaki maging ang asawa nitong nahawa rin ng sakit.

Nag-negatibo naman ang dalawang anak ng mga pasyente at kasalukuyang kasama ng kanilang mga kaanak.

Hulyo a-9 nang mag-positibo sa COVID-19 ang lalaki na walang travel history at close contact sa kanyang trabaho. —sa panulat ni Drew Nacino

Nagpositibo sa COVID-19 ang dalawang crew ng isang barko na nakaangkla sa baybayin ng lalawigan ng Albay.

Ayon sa DOH Bicol region, ang dalawang crew ay nakitaan ng delta variant ng COVID-19 base sa isinagawang genome sequencing.

Sa 19 na crew ng Tugboat, 11 rito ay nagpositibo sa virus.

Galing sa bansang Indonesia ang nasabing barko at huminto sa Butuan City kung saan sila na-swab test.—sa panulat ni Rex Espiritu

Nagpatupad na ng mas mahigpit na restrictions ang lokal na pamahalaan ng Baguio City laban sa posibleng pagpasok ng COVID-19 Delta variant.

Ayon kay Atty. Althea Rosanna Alberto, Executive Officer 4 ng Mayor’s Office, epektibo simula bukas ang Executive Order 89 bilang preparasyon sa posibleng pagkalat ng mas nakahahawang Delta variant.

Alinsunod sa kautusan, ipinagbabawal ang pagpasok sa City of Pines ng mga turistang mula sa mga lugar na nasa ilalim ng MECQ, MGCQ, at GCQ with Heightened Restrictions.

Tangi anyang papayagang pumasok ay mga authorized persons outside residence habang ipagbabawal ang operasyon ng mga bar at ipatutupad ang Modified Liquor Ban mula alas-10 ng gabi hanggang alas-10 ng umaga.

Nililimitahan din sa 50-75% ang kapasidad sa lahat ng private at government workplaces upang maiwasan ang pagsisisiksan at pagkukumpulan.

Kailangan ding magpresenta ng negative swab test ang mga edad 18 pababa at mga senior citizen na hindi pa nababakunahan kung hindi naman maiiwasang bumiyahe. —ulat mula kay Drew Nacino

Patay ang dalawa katao at sugatan ang isa pa nang aksidenteng masagasaan ng ambulansyang inakala ng driver na naka-park mode na sa Juban, Sorsogon.

Batay sa imbestigasyon, kaagad umarangkada ang ambulansya nang ibaba ng driver ang hand brake kaya’t nasagasaan ang mga biktimang nasa harap ng nasabing sasakyan.

Ang mga biktima ay empleyado ng Juban Loca Government Unit (LGU) gayundin ang naka aksidenteng driver ng ambulansya na nahaharap sa kasong Reckless Imprudence Resulting to Homicide at Damage to Property.

Patay sa suffocation ang 31 anyos na treasure hunter sa Datu Odin Sinsuat sa Maguindanao matapos pumasok sa isang kuweba kasama ang dalawang iba pa na nakalabas naman kaagad.

Kinilala ni Maguindanao Provincial Disaster Risk Reduction and Management Officer Nasrullah Imam ang biktima na si Anwar Zacaria, residente ng barangay Dimapatoy.

Sinabi ni Imam na batay sa kuwento ng survivors, nasa loob sila ng kuweba sa Sitio Nabilan sa barangay Dinaig at naghahanap ng mga umano’y nakatago doong gold bars.

Nagulat na lamang aniya ang tatlo nang magbuga ng nakakalasong kemikal ang kuweba.

Narekober ang labi ni Zacaria sa isinagawang rescue and retrieval operations ng mga tauhan ng PDRMMO, Bureau of Fire Protection at Datu Odin Sinsuat Police.