Nakapagtala na ang Quezon Province ng unang walong kaso ng Delta variant.
Ayon kay Governor Danilo Suarez, apat na Delta variant case ay naitala sa bayan ng Dolores kung saan tatlo na rito ang nakarekober na.
Habang ang iba pa ay na detect sa Sariaya, Tiaong at Real.
Dahil dito, umapela si Suarez ng karagdagang COVID-19 vaccines para sa probinsya.
Iniimbestigahan na ng lokal na pamahalaan ng Zamboanga City kung papaanong nakapasok sa kanilang probinsya ang mga dayuhang wala umanong ipinrisentang ‘negative swab test result’.
Ayon kay Mayor Beng Climaco, ilan sa mga dayuhang ito ay kalauna’y nagpositibo sa COVID-19.
Mababatid na ang naturang mga dayuhan ay kabilang sa delegasyon ng International Monitoring Team na nakabase sa Western Mindanao Command.
Kasunod nito, ay agad na dinala sa isolation facility ang mga dayuhang nagpositibo sa COVID-19 maging ang mga close contacts nito.
Samantala, ipinagbigay alam na ni climaco ang naturang usapin kay Lt. General Corleto Vinluan Jr., ang commander ng Western Mindanao Command.
Isang machine operator ang nasawi matapos makuryente ang bahagi ng kanyang minamanehong boom truck sa San Fernando City, La Union.
Kinilala ang biktimang si Mark Russel De Torres, 34 anyos.
Ayon sa San Fernando City Police naganap ang insidente sa Barangay Sevilla habang minamaneho ni De Torres ang boom truck.
Sumabit ang crane ng truck sa kawad ng poste na dahilan ng pagkaka-kuryente ng biktima.
Naisugod pa si De Torres sa ospital pero idineklarang dead-on-arrival.—sa panulat ni Drew Nacino
Aaksyunan ng Lapu-Lapu City LGU ang mga ulat na kumakalat online na may mga indibidwal na ginagamit umano ang pangalan ng LGU para magbigay ng pekeng vaccination cards.
Ayon sa city government, wala pang anumang kaparusahan ang pagiimprenta at pagbebenta ng COVID-19 vaccination cards at maituturing itong iligal.
Samantala, isang netizen ang naglabas ng screenshots ng usapan nila ng kaibigan at isang nag-ooffer ng vaccination card sa halagang 1,500 pesos.
Ayon naman sa Lapu-Lapu City Police, wala pa silang natatangap na anumang reklamo ng umano’y pagbebenta ng pekeng vaccination cards at kanila ring titingnan ang nasabing usapin. —sa panulat ni Rex Espiritu
Literal na gumagapang ang isang lola sa Dasmarinas, Cavite para sa kanyang araw-araw na ikabubuhay.
Si Lola Editha, na hiwalay na sa asawa at walang anak ay sa isang abandonadong tahanan nakatira sa probinsya.
Dahil mag-isa na lang sa buhay, si Lola Editha na ang kumakayod para sa kanyang ikabubuhay.
Sa isang video, makikita na gumagapang sa tapat ng kanyang tinutuluyan ang kaawa-awang matanda para makahingi ng makakain.
Mahigit isang taong stroke na pala si Lola Editha kaya paralisado na ang kalahati ng kanyang katawan, kaya simula ng siyang magkasakit, umaasa na lamang siya sa tulong ng mga iba.
Ang video ni Lola Editha, pumukaw ng marami kaya may mga mabubuting puso na nagpaabot ng tulong sa matanda.
Hiling ni Lola Editha na sana ay mailagay siya sa mas maayos na tahanan. —sa panulat ni Rex Espiritu
Kalaboso ang isang High-Value Target (HVT) matapos mahulihan ng P340,000 na halaga ng umano’y shabu at isang baril sa Maguindanao.
Ayon kay PDEA-BARMM Director Gilbert Buenafe, ang suspek na si Arsad Gunda Salik ay nahuli sa Barangay Tulunan, Datu Anggal Midtimbang sa nasabing lalawigan.
Matagumpay na natimbog si Salik ng magkasanib na puwersa ng PDEA at 2nd Mechanized Infantry Battalion ng Philippine Army.
Kasong paglabag sa Comprehensive Dangerous Drugs Act ang isasampa laban sa suspek.
Bumagsak sa kamay ng mga awtoridad ang apat na kilabot umanong tulak ng droga sa magkahiwalay na buy-bust operations kung saan nasabat mula sa mga ito ang P177,000 na halaga ng hinihinalang shabu sa Bacolod City.
Ayon sa Police Station 8, unang nahulihan ng P136,000 na halaga ng umano’y shabu sina Carl John Rula at Rodel Remegio sa Barangay Pahanocoy.
Nakumpiska rin mula sa kanila ang dalawang coin purses, isang disposable lighter, at isang improvised tooter.
Sa isa pang operasyon sa Barangay 30, nadakip naman sina Fritz Erespe at Maricon Elpos at nakuhanan ng higit P40,000 na halaga ng hinihinalang shabu.
Inihahanda na ang kaukulang kasong isasampa laban sa mga suspek.
Dinukot at pinatay ng mga hinihinalang miyembro ng New People’s Army (NPA) ang tatlong inosenteng mga sibilyan sa Palanas, Masbate.
Kinilala ni Bicol police spokesperson Maj. Maria Luisa Calubaquib ang mga biktima na sina Jose Lalaguna, Jestoni Lalaguna, at Joey Lalaguna, kapwa nakatira sa nasabing bayan.
Sa imbestigasyon, lumalabas na lulan ng motorsiklo ang mga biktima habang naglalako ng mga gamit pambahay (housewares) nang harangin at dukutin ng mga armadong lalaki sa Barangay Miabas.
Unang natagpuang patay sina Jose at Jestoni sa Barangay Piña na tadtad ng tama ng bala sa iba’t ibang bahagi ng katawan habang sa may bahagi naman ng Barangay Miabas natagpuan si Joey.
Iniimbestigahan pa rin ng mga awtoridad ang nasabing insidente.
Nakapuga mula sa Davao Oriental Provincial Jail sa Mati City ang pitong inmates.
Ayon sa Mati City PNP, nangyari ang pagtakas sa tulong umano ng 25 indibidwal na hinihinalang mga miyembro ng Pinatikan Religious Cult.
Sa imbestigasyon, pinasok ng mga armadong kasapi ng kulto ang correctional facility para sagipin ang kanila umanong lider na kinilalang si Cornelio Galon III kung saan isa sa mga ito ang napatay.
Maliban kay Galon, nakatakas din ang iba pang mga preso na sina Dominador Lintuan, Arjowe Lintuan, Ranjay Baluro, Inabitan Ismadi, Laudeco Lintuan, at Sugaan Gil.
Nagsasagawa na ngayon ng hot pursuit operation ang puwersa ng militar at pulisya para sa agarang ikadarakip ng mga naturang inmates.
Tumanggap ng mga solar lamp ang isang komunidad sa Paquibato District sa Davao City mula sa mga pulis noong Biyernes, Agosto 13.
Dahil problema ng mga residente ang kawalan ng kuryente sa Barangay Colosas kaya’t naisipan ng revitalized-pulis sa Barangay Team Colosas na maghandog ng may apat na solar lamps.
Laking pasasalamat naman ng mga tribung ata manobo na residente sa nabanggit na lugar dahil sa tulong na ibingay sa kanila ng mga pulis bilang bahagi ng kanilang quick impact projects na layong ibigay ang pangangailangan ng mga residente sa isang komunidad.
Pinapurihan naman ni Philippine National Police (PNP) Chief, Police General Guillermo Lorenzo T Eleazar ang R-PSB Team Colosas sa ginawang pagtulong nito sa mga residente ng Paquibato District.
Aniya, “napakahalaga ng ilaw sa ating mga kababayan. Isa ito sa mga pangunahing pangangailangan ng mga komunidad. Nakatutuwa na nakagawa ng paraan ang ating kapulisan para maibigay ang pangangailangang ito ng mga residente.” — ulat mula kay Jaymark Dagala.