RONDA PROBINSYA

Nalunod matapos mahulog habang naglalaro sa rumaragasang ilog sa Quezon City ang isang 5 taong gulang na bata.

Ayon sa ulat, naglalaro ang bata kasama ang 3 taong gulang nitong kaibigan sa bakanteng lote sa Barangay Bahay Toro nang aksidenteng mahulog ito sa katubigan.

Ayon naman sa lolo ng kalaro nito, malapit sa puwang ng pader ang mga bata at may sinusubukan itong abutin ng mahulog ang biktima.

Ayon naman sa ina ng kalaro ng bata, hindi nya masagip ang kanyang kaibigan dahil hindi nya kaya ang bigat nito.

Natagpuan naman ang katawan ng bata sa parte ng San Juan.—sa panulat ni Rex Espiritu

Sugatan ang mag-ina sa Catbalogan, Samar matapos silang mabundol ng kotse.

Ayon sa ulat, kababa lang ng ginang at ang sanggol nito na siyam na buwang gulang sa sinakyang tricycle nang salpukin sila ng kotse.

Damay sa insidente ang ilan pang sasakyan na nasa gilid ng kalsada na nasa harap pa ng Catbalogan police headquarters kaya nakita sa CCTV ang insidente.

Agad naman na dinala sa pagamutan ang mga biktima.

Umamin naman ang tsuper ng kotse na nakatulog siya kaya nabangga ang mga biktima.

Nakalabas naman na ang ina ng sanggol sa ospital pero nanatiling inoobserbahan ang sanggol.

Pinakawalan din agad ang driver matapos na pumayag na sagutin nito ang lahat ng gastusin sa pagamutan ng mga biktima at ayusin ang mga mga nasirang tricycle.—sa panulat ni Rex Espiritu

Patay sa buy bust operation ang isang big time drug pusher sa Naga City sa Camarines Sur.

Kinilala ni Police Master Sergeant Tobias Bongon, tagapagsalita ng Naga City Police ang suspected drug pusher na si Ryan Nolasco, 36 anyos, residente ng bayan ng Magarao.

Ani Bongon, sinubukang magbenta ni Nolasco ng 100g ng shabu na nagkakahalaga ng halos P700,000 sa barangay Carolina bandang alas-9:35 kagabi.

Nang tila mapansin ng suspek na kahinahinala ang perang ibinayad sa kaniya, binitiwan niya ito at agad bumunot ng baril at ipinutok sa undercover na pulis.

Dito na gumanti ng putok ang iba pang pulis kung saan tinamaan si Nolasco.

Ayon kay Bongon, nag ooperate si Nolasco sa Camarines Sur at iba pang bahagi ng Albay, kinukuha aniya nito ang kaniyang suplay ng iligal na droga sa Metro Manila.

Nanawagan si Cagayan De Oro Archbishop Jose Cabantan sa publiko na makinig sa mga eksperto para sa impormasyon sa COVID-19 at magpabakuna na laban dito.

Ayon sa post sa website ng Catholics Bishop Conference of the Philippines (CBCP), nananalangin si Cabantan na sa pamamagitan ng bakuna maaring magsimula ang pagbaba epekto ng pandemya.

Ayon pa kay Cabantan, na ang pinaninindigan ng kanyang nasasakupan at pinaninindigan din ng simbahang katolika na sinabi pa ng Santo Papa.

Ipinunto pa ni Cabantan na ang Vatican Congregation of the Doctrine of the Faith Declaration nitong Disyembre 2020 ay tinatanggap ang bakuna bilang panlaban sa COVID-19 pati na rin ang lahat ng bakuna na ligtas at epektibo. —sa panulat ni Rex Espiritu

Sinuspende ng 15 araw ang isang babaeng traffic enforcer sa Cebu.

Iyan ay matapos manapak umano ng isang food delivery rider na hindi raw huminto nang kanyang senyasan dahil may mga taong tumatawid pa sa lugar.

Ayon kay Maricris Vallejos, traffic enforcer, hindi raw huminto ang rider na si Marcelino Sabudico nang kanyang sensyasan pero hindi nya intensyon na sapakin ang rider.

Nag-viral sa social media ang insidente at umani pa ng iba’t-ibang reaksyon.

Bukod sa suspende, pinagmulta rin siya dahil binaba nito ang suot na facemask nang mangyari ang insidente. —sa panulat ni Rex Espiritu

Sinuspende ng Rural Health Unit (RHU) sa San Marcelino sa Zambalez ang kanilang operasyon matapos na magpositibo sa COVID-19 ang mga empleyado nito.

Ayon sa RHU, ang nasabing suspensyon ay para mabigyan ng panahon ang mga manggagawa nito na sumailalim sa RT-PCR tests.

Inabisuhan naman ng pamunuan ng Rural Health na pansamantalang pumunta sa mga border checkpoint para mamakuha ng libreng antigen test lalo na ang mga nagtatrabaho sa labas ng lalawigan. —sa panulat ni Rex Espiritu