RONDA PROBINSYA

Anim ang patay habang tatlo ang sugatan at anim na pamilya ang apektado sa sunog sa Barangay Santa Cruz, Cebu City.

Kinilala ang mga nasawing sina Dan Henry Carvajal, 3 taon; Andre, 6 na taon; Felicity Sachi, 12 taon; Lyka, 16 na taon, Hannah Mae, 34 na taon at Lilian Carvajal, 72 taon.

Ayon sa Bureau of Fire Protection, pinaghahanap pa rin ang isang Ivan Mejia, 58 anyos na may kapansanan.

Batay sa imbestigasyon, naka-lock ang bahay ng mga Carvajal kaya’t na-trap ang mga biktima.

Dakong alas dos ng hapon nang magsimula ang sunog sa bahay ng isang Elizabeth Lao sa Osmeña Boulevard na tumagal ng halos dalawang oras bago tuluyang maapula.

Sampung kabahayan ang naabo at tinaya sa P15-M halaga ng ari-arian ang natupok sa sunog na inaalam pa ang sanhi. —sa panulat ni Drew Nacino

Sugatan ang isang 2 taong gulang na bata matapos ang pagtama ng isang buhawi sa Negros Occidental nitong Biyernes.

Pitong kabahayan naman ang nasira ng dahil sa insidente.

Aabot naman sa anim na pamilya na katumbas ng 18 katao kasama ang dalawang senior citizen at siyam na bata ang naapektuhan ng buhawi.

Ayon sa otoridad, dala ng localized thunderstorm ang malakas na hangin kaya nagdulot ito ng buhawi.

Nag-abot naman na ng tulong ang LGU sa mga pamilyang naapektuhan ng masamang lagay ng panahon.

Nakararanas ng pagtaas ng kaso ng COVID-19 ang bayan ng Naval sa lalawigan ng Biliran.

Kabilang sa mga bagong kaso na naitala sa nasabing lugar ang 18 miyembro ng iisang household.

Ayon kay Naval Mayor Gerard Espina, isasailalim sa lockdown ang compound kung saan nakatira ang pamilya upang mapigilan ang pagkalat ng COVID-19.

Nitong linggo nang maitala ang 27 bagong kaso ng COVID-19 sa Naval kung kaya’t umabot na sa 522 ang kabuuang bilang nito.

96 naman ang aktibong mga kaso at 12 ang nasawi dahil sa virus. —sa panulat ni Hya Ludivico

Nakalambat ang mga mangingisda sa Quezon province ng dambuhalang blue marlin nitong Sabado.

Ayon sa ulat, aabot sa 15 talampakan ang laki at haba ng nasabing isda at may timbang ito na 100 kilo.

Sa karagatan ng Barangay Matinik sa bayan ng Lopez nahuli ang higanteng isda at naibaba ito ng pinagsakyang bangka pasado alas dos na hapon ng Sabado.

Ayon sa mga nakahuling mangingisda, ngayon lang sila nakakuha ng ganitong klaseng blue marlin.

Aabot naman sa pitong katao ang nagbayanihan sa pagbuhat ng higanteng isda dahil sa kabigatan nito.—sa panulat ni Rex Espiritu

Nasagip ng mga awtoridad ang isang 12 taong gulang na biktima ng hostage sa lungsod ng Caloocan.

Sa imbestigasyon ng Caloocan City Police, naganap ang hostage taking alas-7:15 ng gabi nitong Sabado, Agosto 27 sa kahabaan ng C3 Road.

Mababatid na naipaabot sa mga awtoridad ang insidente, matapos na tumawag ang isang concerned citizen at agad namang nirespondehan ng mga kawani ng Caloocan City Police.

Naabutan ng mga ito ang suspek na si Anthony Ramos, 32 taong gulang na hawak ang 12 taong gulang na biktima bilang hostage.

Matapos ang negosasyon sa panig ng mga awtoridad, ay natapos ang hostage taking ganap na alas-8:10 ng gabi.

Agad namang dinala ang menor de edad na biktima sa Caloocan City Medical Center para sumailalim sa physical check-up habang dinala naman ang suspek sa tanggapan ng pulisya para sa karagdagang pagtatanong at kaso.

Samantala, narekober sa suspek ang isang kutsilyo na ginamit sa panghohostage.

Nailigtas ang pitong mangingisda na napaulat na nawawala sa karagatan sa Bolinao, Pangasinan.

Ayon sa ulat, pumalya ang makina ng bangka ng mga nasabing mangingisda nitong Miyerkules sa Silaqui Island.

Agad naman na gumawa ng hakbang ang Naval Forces Northern Luzon para magsagawa ng search and rescue operations matapos nilang matanggap ang ulat ng pagkawala ng mga mangingisda.

Sa layong 13 nautical miles ng nabanggit na isla natagpuan ang mga nawawalang manlalayag.—sa panulat ni Rex Espiritu