NEWS

Itinutulak ng Trabaho Partylist ang panawagan para sa mas malawak na reporma sa industriya ng Business Process Outsourcing (BPO), na layong palakasin ang karapatan at kapakanan ng mga manggagawa, lalo na sa aspeto ng patas na pamamahagi ng workload.

Nabatid na ang panawagan ay kaugnay sa mga naging pakikipag-usap ng 106 Trabaho sa mga kasalukuyang nagtatrabaho sa mga BPO companies, pati na rin sa mga industry report tungkol sa mga hamong kinakaharap ng karamihan ng call center agent at iba pang BPO employees.

Iginiit ni Atty. Mitchell-David Espiritu, tagapagsalita ng 106 Trabaho, ang mga hamon na kinakaharap ng mga BPO worker, kabilang ang labis na workload, kakulangan sa tauhan, at kawalan ng sapat na kaalaman sa karapatan sa lugar ng trabaho.

“Ang labis na pagbubuhos ng trabaho sa mga manggagawa habang kulang ang mga empleyado ay isang tahimik na krisis sa maraming BPO offices. Kailangan natin ng malinaw na mga patakaran at pananagutan para matiyak na walang empleyado ang mabibigatan ng di-makataong workload,” pahayag ni Espiritu.

Maliban sa pagsusulong ng batas, layon din ng 106 Trabaho na makipag-ugnayan sa iba’t ibang sektor, kabilang ang mga labor group, human rights advocates, at business leaders, upang makabuo ng mga epektibong paraan ng pagpapatupad na tugma sa patuloy na pagbabago ng industriya.

“Mahigit 1.3 milyong Pilipino ang nagtatrabaho sa BPO sector. Matagal na nilang tinataguyod ang ating ekonomiya, panahon na para tayo naman ang tumaguyod sa kanilang proteksyon,” pagtatapos ng tagapagsalita ng Trabaho.

Natuklasan na ang mga pamilya ng mga biktima umano ng extrajudicial killings (EJK) sa ilalim ng nakaraang administrasyon ay patuloy na humihingi ng hustisya, habang inakusahan ng isang abogado ang kampo ni dating Pangulong Rodrigo Duterte na nagsasagawa ng ’delay tactics’ sa paglilitis sa International Criminal Court (ICC) upang mapalawig ang simpatiya ng publiko.

Pinuna kasi ni ICC Assistant to Counsel Atty. Kristina Conti ang umano’y paggamit ng ’delay tactics’ ng legal team ni Duterte, habang patuloy ang sinasabing harassment mula sa mga tagasuporta ni Duterte laban sa mga pamilya ng mga biktima.

Kaya nagbabala siya na maaaring layunin ng estratehiyang ito na makaimpluwensiya sa opinyon ng publiko bago ang midterm elections at posibleng impeachment ni Vice President Sara Duterte.

Nabatid na isa sa mga umano’y taktika, ayon kay Conti, ay ang hakbang na alisin ang dalawa sa tatlong hukom na nangangasiwa sa kaso, dahil sa nakikitang pagkiling batay sa kanilang mga naunang desisyon sa mga kaugnay na usapin.

“The request to disqualify the two judges was a confidential submission, filed alongside their jurisdictional challenge. As a result, only one judge is left to hear the case, which could cause further delays in the proceedings,” paliwanag ni Conti.

“Sana hindi maging ganito ang mga susunod na takbuhin ng pagdinig… Kasi sa totoo lang, this is 8 years, 9 years delayed ang paglilitis tungkol sa war on drugs ni Duterte,” dagdag pa niya.

Kung maaalala, si Duterte ay nahaharap sa mga kaso ng krimen laban sa sangkatauhan dahil sa mga pagpatay na tinatayang umaabot sa 30,000 tao—karamihan mula sa mahihirap na komunidad—ayon sa Human Rights Watch.

Sabi naman sa opisyal na datos mula sa Philippine Drug Enforcement Agency (PDEA), umabot sa 6,241 ang bilang ng mga namatay sa kampanya kontra droga mula Hulyo 1, 2016.

Sakop ng imbestigasyon ng ICC ang period mula Nobyembre 1, 2011, noong si Duterte ay alkalde pa ng Davao City, hanggang Marso 16, 2019, noong siya ay presidente.

Matatandaan na noong Marso 11, 2025, inaresto si Duterte ng Philippine National Police at Interpol, at inilipat sa The Hague, Netherlands, sa parehong araw.

Natuklasan na nahaharap umano si Mayor Abby Binay sa Senado sa dalawang magkahiwalay na kasong kriminal at sibil sa pumalpak na Makati Subway Project at pagkandado ng pasilidad 10 EMBO barangay na ibinigay ng Supreme Court sa Taguig City.

Sinasabing unang kakaharapin ni Binay ang kasong paghahabol ng Philippine InfraDev Holdings Inc., contractor ng pumalpak na $3.5 bilyong Makati Subway Project na nagsampa ng arbitration proceedings sa Singapore International Arbitration.

Hiniling kasi ng Infradev sa international arbitration na ibalik ng Makati ang nagastos nitong P44 bilyon sa Makati City Subway Project na nahinto dahil naging “unfeasible” ang proyekto sanhi ng desisyon ng Supreme Court sa jurisdiction ng 10 enlisted men’s barrios o EMBOS.

“Continuing with the Makati City Subway Project under the joint venture agreement with the city government was rendered no longer economically and operationally feasible due primarily to the Supreme Court’s decision declaring some subway stations and depot to be under the jurisdiction of Taguig,” ayon sa Infradev.

“Arbitration proceedings have thus commenced with the Singapore International Arbitration Centre to enable an impartial resolution of the agreement with Makati,” dagdag nito.

Ayon sa auditor ng kompanya, PwC, nalugi ang InfraDev ng P44 bilyon sa proyekto – P39 bilyon sa pagbili ng 8, 413 ektarya ng lupain nitong 2024 na ngayon nasa hurisdiksyon ng Taguig City at P5 bilyon sa development cost tulad ng architectural design at master planning ng subway.

Kasabay nito, naghain naman ng kasong kriminal at administratibo sa Office of the Ombudsman sina Emilyn Borromeo Cacho at Joahanna Gallardo Junio laban kay Mayor Abby Binay sa pagsasara ng mga pasilidad sa 10 EMBO barangay kahit legal na napasakamay ito ng Taguig City.

Sa kasong inihain nina Cacho at Junio sa Ombudsman, nilabag umano ni Abby Binay ang Section 3 (e) ng Republic Act No. 3019, Section 4 ng Republic Act No. 6713, Grave Misconduct and Conduct Prejudicial to the Best Interest of the Service, at Article 231 ng Revised Penal Code.

Residente si Cacho ng Barangay South Cembo, Taguig City at si Junio naman sa Barangay East Rembo sa naturang lungsod na nagreklamo dahil hindi nila nagamit ang pasilidad na

“The health centers and clinics, day care centers, multi-purpose facilities, and sports and recreation centers, all essential and indispensable for the delivery of basic services for the EMBOs, were unlawfully shut down upon the malicious and whimsical order of respondent Binay-Campos,” ayon sa kasong isinumite sa Ombudsman.

Pagsisiwalat ni Cacho, hindi siya nakapagpagamot sa health center sa Barangay South Cembo dahil isinara ni Abby Binay kaya nabigo siyang makakuha ng maintenance medication.

“When respondent Binay-Campos arbitrarily ordered the closure of the health center in Barangay South Cembo, Taguig, she went for months without taking her maintenance medication as she could not travel far on account of her dire health condition,” giit ni Cacho.

Iginiit naman ni Juino na isa siyang cancer survivor na hindi umano nakagamit ng mga pasilidad ng East Cembo dahil isinara ni Abby Binay kabilang ang ilang vulnerable sector tulad ng senior citizen, buntis, persons with disabilities at sinumang may problemang pinansyal na lubhang apektado ng illegal na pagkilos ng alkalde.

“Respondent should not have closed and /or controlled the government offices and facilities, especially the East Rembo Health Center and Ospital ng Makati (OsMak), since they are constructed for the use of EMBO residents, using the taxes of the people therein,” giit ni Junio.

“In view of the foregoing, complainants pray that the Honorable Office: (a) preventively suspend respondent Binay-Campos; (b) find her administratively guilty of violating RA 6713 and committing grave misconduct and conduct prejudicial to the best interest of the service and impose the appropriate penalties; and (c) find probable cause for violating Sec. 3e of RA 3019 and Art. 231 of the Revised Penal Code and thus indicting her in court,” ayon sa reklamo.

Nanawagan ang Trabaho Partylist sa mga mambabatas na magsulong ng mga proteksyon, insentibo, at institusyonal na suporta sa lumalaking sektor ng freelance workers sa bansa, imbes na patawan sila ng karagdagang buwis na makaaapekto sa mga online gig workers.

Ito’y matapos marepaso ang implementing rules and regulations para sa pagpapatupad ng Republic Act No. 12023, o ang Value-Added Tax on Digital Services Law.

Ayon kay Atty. Mitchell-David Espiritu, tagapagsalita ng Trabaho, kinakailangan ang agarang pagpapatupad ng mga patakarang kikilala sa mahalagang kontribusyon ng freelancers, lalo na sa digital at remote work sectors.

“Ang mga freelancer ay nagsusumikap na umunlad kahit walang pormal na suporta. Sa halip na buwisan ang mga Pilipinong digital service providers, dapat tayong lumikha ng mga polisiya na magpapalakas at poprotekta sa kanila,” ani Espiritu.

Maraming freelancer ang umaasa sa mga serbisyo gaya ng Upwork, Fiverr, TaskUs, PayPal, at Google Workspace sa kanilang araw-araw na trabaho. Nabahala ang ilan na posibleng tumaas ang singil sa serbisyo o kaya’y malimitahan ang kanilang access sa mga ito dahil sa bagong buwis.

Sa panayam ngTrabaho Partylist kay EJ Gonzales, isang freelance artist sa isang digital platform na sumiside-line rin bilang host at performer, sinabi niyang maliban sa kawalan ng benepisyo, wala ring sapat na awtoridad na mapagsusumbungan ang mga gaya niya kapag may katiwalian sa kontrata.

“Parang wala akong alam na may available for us. Kaya minsan nakakainggit actually ‘yung mga nagtatrabaho sa corporate. Meron silang HMO, allowance, secured na kinikita every month. Wala kaming mga ganon na benefits,” pagbabahagi ni Gonzales.

Sa kasalukuyan, marami ang nagtatrabaho nang walang kontrata, na nagdudulot ng problema tulad ng delayed payments at kakulangan ng legal recourse para sa mga freelancers.

Para sa Trabaho, ang dapat na isinusulong para sa mga freelancers ay tax incentives, internet connectivity infrastructure, social security benefits, grievance mechanisms laban sa mga manlolokong kontratista, at mga anti-labor policies ng digital platforms.

Nabunyag na noong 2019 ay isang petisyon na nilagdaan ng mahigit 3,000 magsasaka ang inihain sa bayan ng Guimba, Nueva Ecija upang ihirit ang pagbasura sa Rice Tariffication Law (RTL).

Sinasabing tinanggap ang petisyon ni Cong. Estrellita “Ging” Suansing sa isang pampublikong forum, kung saan nagpahayag siya ng intensyong tugunan ang hinaing ng mga magsasaka.

Subalit makalipas ang anim na taon, muling binigyang-pansin ng ilang grupo ng magsasaka ang kawalan ng hakbang upang maamyendahan o buwagin ang RTL.

Sa kasalukuyan, nanunungkulan na bilang kinatawan ng distrito si Cong. Mika Suansing, anak ni Ging Suansing, ngunit wala pa rin umano itong naipapasang panukala o resolusyon na naglalayong isulong ang pagrebisa sa nasabing batas.

Ayon sa mga magsasaka, simula nang ipatupad ang RTL, bumaba ang farmgate price ng palay at lumaganap ang imported rice sa mga pamilihan.

Nabatid na partikular na tinamaan ang mga lokal na magsasaka sa Nueva Ecija, na tinaguriang Rice Granary of the Philippines.

Inilaan ng batas ang P10-bilyong Rice Competitiveness Enhancement Fund (RCEF) upang suportahan ang mga magsasaka sa pamamagitan ng makinarya, binhi, pautang, at pagsasanay. Gayunman, iginiit ng ilang grupo na hindi umano nila ramdam ang benepisyo ng naturang pondo.

Sa kabila ng mga pahayag noon ni Cong. Ging Suansing na babantayan niya ang kapakanan ng mga magsasaka, sinasabing walang naitalang inisyatibo ang kongresista upang tuluyang ma-repeal ang batas, katulad din ng naging pananahimik umano ni Cong. Mika Suansing ukol dito, batay sa ulat ng mga nasa sektor ng agrikultura.

Kaya naman sa darating na halalan sa Lunes, isinusulong ng ilang grupo ng magsasaka ang pagboto, hindi sa mga Suansing, kundi sa mga kandidatong may malinaw na plataporma ukol sa reporma sa agrikultura, partikular sa RTL.

Nangako ang Trabaho Partylist ng buong suporta sa utos ni Pangulong Ferdinand Marcos Jr. na pababain ang interest rate sa calamity loans ng Social Security System (SSS).

Batay sa utos ng Pangulo, babawasan ng SSS ang interest rates sa mga calamity loan upang agad na matulungan ang mga manggagawang nahihirapan sa patuloy na pagtaas ng gastusin.

Sabi ng grupo, ang pagpababa ng mga interest sa calamity loan ay isang mahalagang hakbang upang mapagaan ang pasaning pinansyal ng mga manggagawang Pilipino, lalo na ang mga kasalukuyang naapektuhan ng mga pagputok at pag-alburoto ng mga bulkang Bulusan at Kanlaon.

Tinawag ni Trabaho spokesperson Atty. Mitchell-David Espiritu ang polisiya bilang isang “people-centered reform”, na tugma sa adbokasiya ng partido para sa makabuluhan, inklusibo, at pangmatagalang trabaho at seguridad sa lipunan para sa lahat.

“Direktang tinutugunan ng inisyatibang ito ang isa sa mga pangunahing suliranin ng ating mga manggagawa: ang mabigat na bayarin sa mga utang,” pahayag ng tagapagsalita ng grupo.

Ang kautusan ni Pangulong Marcos ay tumutugma rin sa layunin ng Trabaho na wakasan ang “in-work poverty”, ang kalagayan kung saan kahit may trabaho, nananatiling kapos sa kita ang manggagawa dahil sa mababang sahod at mataas na gastos sa pamumuhay.

Muling iginiit ng Trabaho, bilang 106 sa balota, na magsusulong sila ng mga reporma na hindi lamang limitado sa pagpapataas ng mga sweldo.

Sakop ng adbokasiya ng Trabaho na mapaganda ang health care benefits, working conditions, at training programs para sa lahat ng Pilipinong mangaggawa at mga senior citizen at PWD na gustong magtrabaho.

Parang ‘much better’ pa umano kay Mayor Abby Binay na matalo sa Senado at mabigong makapasok sa Magic 12 kaysa manalo si Senador Nancy Binay laban sa kabiyak nitong si Atty. Luis Campos sa mayoralty race ng Makati City.

Sa kanyang speech sa campaign trail sa lungsod, sinabi ni Binay na pumunta siya sa rally upang ikampanya ang Team United na pinamumunuan ng kabiyak na si Atty. Campos na tumatakbong alkalde laban sa kapatid nitong si Senador Nancy Binay.

Pahayag niya, sa mga mamamayan na dumalo sa rally na kahit hindi nila iboto ang sarili bilang senador, basta iboto lamang ang straight Team United.

Tumatakbo ang kapatid nitong si Senador Binay sa ilalim ng United Nationalist Alliance (UNA) ang partidong itinayo ng ama nilang si dating Vice President Jejomar Binay.

“Andito ako sa pagbigay ng suporta sa Team United. Sasabihin ko ito, kahit huwag nyo na akong iboto, iboto n’yo na lang straight ung Team United. Ganito po ka-importante sa akin ang Team United,” ani Abby Binay,

Iginiit pa ni Binay na huwag na din siyang ikampanya sa Makati dahil mas importante umano sa kanya na manalo ang buong slate ng Team United.

“Sinasabi na ikakampanya daw po ako, tumatakbo akong senador sa Senado, huwag nyo na akong ikampanya, dahil mas importante po sa akin ang manalo ang buong slate ng Team United sa Makati,” ani Binay.

Aniya, bonus lamang ang kanyang pagtakbo sa Senado na hindi naman nito ikamamatay (sakaling matalo) at sinasabing mas gugustuhin niyang makitang manalo ang kabiyak kaysa manalo si Senador Nancy.

“Iyong pagtakbo sa Senado ay bonus lang hindi ko naman ikamamatay, hindi naman akong masyadong excited pero kung mananalo man tayo sa Senado, itaga nyo sa bato, lagi nyo akong makikita sa TV,” aniya.

Subalit sakaling masungkit ang puwesto sa Senado, tiniyak ni Abby Binay na “makikipag-away” umano ito hinggil sa nangyari sa 10 barangay ng EMBO na ibinigay ng Supreme Court sa Taguig City.

“Lagi n’yong maririnig ang boses ng isang senador na taga Makati, Lagi nyo akong makikitang makikipag-away doon. Bagay na bagay ako doon. Feeling ko nga parang nineerbiyos na sila kailangan po natin sa senado,” ayon kay Mayor Binay.

Inamin umano ni Makati City Mayor Abby Binay ang paghihiganti  laban sa desisyon ng Korte Suprema na ibigay sa Taguig City ang 10 EMBO barangay na tanging agenda kaya tumatakbo siya sa pagka-senador.
Sa campaign rally ni Congresswoman Pammy Zamora sa CEMBO kamakailan, sinabi ni Binay sa kanyang talumpati na matagal nitong pinag-isipan kung tatakbo bilang senador.

Giit niya, noong una, matagal ang kanyang pagmumuni-muni dahil hindi nalalaman ang tatakbuhin sa susunod na halalan dahil magtatapos ang kanyang termino bilang alkalde ng Makati ngayong 2025.

“Andito po ako para magkampanya para sa aking sarili dahil ngayon tumatakbo tayo sa Senado, ang dahilan po noong una, sa totoo po matagal na pagmuni-muni hindi ko pa alam ang tatakbuhin ko,” aniya.

Aniya, maraming araw siyang umiiyak dahil wala siyang magawa sa desisyon ng korte na ibigay ang 10 EMBO barangay sa Taguig City na legal na may sakop sa lugar.

Maaalala na noong 2022, nagdesisyon ang Korte Suprema na ibinabasura ang petisyon ng Makati City na hindi dapat ibigay sa Taguig City ang 10 EMBO barangays dahil legal itong magmamay-ari ng Taguig alinsunod sa itinakda ng jurisdictional boundary.

“Dahil kung tutuusin po, noong nangyari na ang masalimuot na nangyari sa mga EMBO, parang gusto ko nang mag-quit kasi hindi ko kaya ang ganito, na araw-araw kang umiiyak, tapos wala akong magawa, ung feeling of helplessness, kasi marami pang umaasa sa akin, na hindi ko mabigyan ng soljusyon ang problema at mayroon pang nangigigpit sa iyo at naninira sa iyo, sinabi ko kailangan ko ba ito, hindi ko ito kailangan,” aniya.

Dahil dito, inihayag ni Binay na tumakbo siya sa pagka-senador upang iakyat  ang isyu sa Mataas na Kapulungan hinggil sa desisyon ng Korte na ibigay ang 10 EMBO barangay sa Taguig.

“So marami akong simbahan na pinagsindihan ng kandila marami po tayo, kinausap ko si Martina (Campos), kapag nakita nyo si Martina mas malaki na siya sa akin, dalaga na kaya tayo nagdesisyon na tumakbo sa Senado dahil dadalhain natin ang laban sa Senado,” ayon kay Binay.

Kung matatandaan, nitong Mayo 5, nagpalabas ng Temporary Restraing Order (TRO) ang Regional Trial Court sa Taguig na inaatasan si Mayor Binay na alisin ang lahat ng nakasagabal sa paggamit ng   lahat ng government-owned facilities ng 10 EMBO barangay.

Inisyu ang order ni Executive Judge Loralie Cruz Dataha ng RTC-Taguig na nagpapatupad sa ‘final and executory’ decision ng Korte Suprema sa G. R No, 235315 na kinumpirma na nasasakop ng Taguig ang Barangay Cembo, South Cembo, Comembo, East Rembo, West Rembo, Pembo (kabilang ang Rizal), Pitogo, Post Proper Northside, and Post Proper Southside—na kilala bilang EMBOs.

Sinasabing saklaw ng kautusan ang pasilidad tulad ng  health centers, covered courts, multi-purpose buildings, day care centers, parks, at iba pang government properties na nakalaan sa public use sa ilalim ng Proclamation Nos. 518 at 1916.

Subalit sa kabila nang pinal na desisyon ng Supreme Court noong 2022, hindi pumayag ang Makati na kunin ng Taguig ang lahat ng naturang pasilidad at isinara ng Makati ang ilang health center at day care center kaya hindi nagamit ng taga-EMBO barangay ang pasilidad dahil ipinagkait sa kanila ng Makati ang paghahatid ng pangunahing serbisyo.

Natuklasan na nagkaroon umano ng sharp increase o pagtaas sa insidente ng kidnapping, robbery at iba pang uri ng krimen sa ilang bahagi ng Makati City sa kabila nang pagkakaroon ng P240 milyon confidential funds ni Mayor Abby Binay.
Nitong 2022 at 2023, sinasabing nakapaglaan ang Makati City Council ng halagang P240 milyon kada taon para sa confidential funds na maaaring gamitin ni Binay sa peace and order programs (POPs) na susugpo sa kriminalidad alinsunod sa itinakda ng batas.

Subalit sa kabila nang pagkakaron ng confi funds kada taon, tumaas naman o nagkaroon ng sharp increase sa insidente ng kriminalidad sa ilang bahagi ng Makati City na lubha umanong ikinababahala ng mga residente sa Salcedo Village.

Batay sa liham ng samahan, umapela sila kay Binay na tugunan ang anila’y tumataas na bilang ng kriminalidad sa kanilang komunidad kasunod ng “sharp increase” sa krimen tulad ng snatching, hold-ups at kahit kidnapping incidents na iniulat sa nakalipas na siyam na buwan ng 2024.

Nadiskubre pa na sa liham kay Binay noong Oktubre 2024, tinukoy ng kinatawan ng Salcedo Village residents ang lumalala umanong sitwasyong pang-seguridad  na sinuportahan ng crime statistics mula sa Barangay Bel-Air.

“The data revealed that, while Barangay Bel-Air’s total monthly crimes increased by 8 percent from 2023 to 2024, Salcedo Village alone saw a 17 percent rise in incidents during the same period — more than double the average rate of surrounding environs,” ayon sa liham.

“Alarmingly, the area accounts for 71 percent of all crimes in the barangay,” saad pa nito.

Binanggit pa ng residente sa liham ang ilang sunod-sunod na insidente na kinasasangkutan umano ng riding-in-tandem, kabilang ang isang lalaki na nakasuot ng Angkas uniform na humoldap sa isang pedestrian, ninakaw ang pera at isang cellphone.

“Restaurant-goers and pedestrians have also been frequent targets of violent and economic crimes,” ayon sa residente.

Samantala, noong Mayo 4, 2025, pinasok ng tatlong armadong kalalakihan ang Izakaya Kojiro sa Pasay Road, Makati City kung saan nakakulimbat sila ng pera, alahas at cellphone base sa kumalat na video sa social media.

Batay naman sa pinakahuling audit report ng COA, natuklasan na top spender si Mayor Binay sa 17 local chief executives sa Metro Manila na umabot sa magkasanib na P480 milyon ang ginastos sa POPs sa dalawang magkasunod na taon, 2022 at 2023.

Sinasabing nakita rin sa COA audit report na gumastos naman ng P120 milyon ang lungsod ng Maynila nitong 2022 at 2023 na kahit pangalawa sa pinakamayamang lungsod;  at pumangatlo ang Quezon City na umabot lamang sa P100 milyon ang ginamit sa confidential funds kahit ito ang may pinakamalaking land area at populasyon at pinakamayaman na may P448.51 bilyon total assets.

Sa Joint Circular No. 2015-01 na ipinalabas ng COA, Department of Budget and Management (DBM), Department of the Interior and Local Government (DILG), Department of National Defense (DND), at Governance Commission for GOCCs (GCG), kabilang ang local government units na direktang gagastusin ang confidential funds sa POPs.

Nabatid na limitado ang paggastos sa crime prevention and law enforcement activities; capability development for personnel of law enforcement agencies and volunteers; at programa laban sa illegal drugs, illegal gambling, counter insurgency, smuggling, human trafficking, illegal fishing, unlicensed mining at illegal logging operations.

Inulan ng kaliwa’t kanang batikos mula sa mga grupo ng mga kababaihan si Davao City 1st District Representative Paolo “Pulong” Duterte matapos siyang madawit sa umano’y prostitusyon sa lungsod.

Sumabog ang isyu kasunod ng isang viral na CCTV video at reklamo ng pananakit.

Sa video ay makikita si Duterte na tila nagtangkang manaksak at manulak gamit ang ulo sa isang lalaki sa loob ng isang club sa Davao City.

Sinasabing ang lalaki ay kinilalang si Kristone John Patria Moreno, isang umaming bugaw, na nagsabing siya ang nagbibigay ng mga babae kina Duterte at negosyanteng si Charlie Tan.

Sabi ni Moreno, nag-ugat ang gulo noong Pebrero 23 dahil sa hindi pagkakaintindihan sa bayad.

Pahayag pa ni Moreno, natagalan siyang magsalita dahil sa takot sa kapangyarihan ng pamilya Duterte sa Davao City na aniya’y tila ‘untouchable.’

Kaya nanawagan ang mga grupong Gabriela at Talikala sa mga awtoridad na imbestigahan ang insidente at panagutin si Duterte sa umano’y pagsasamantala sa mga kababaihang napilitang pumasok sa prostitusyon dahil sa kahirapan at kakulangan sa tulong ng gobyerno.

“This is the grim reality for over 2,000 prostituted women in Davao City, who are left with no choice but to enter the sex trade due to the rising cost of living, lack of jobs, and limited access to social services,” saad ni Dr. Jean Lindo, 3rd nominee ng Gabriela Party-list.

“Instead of offering support as a sitting legislator, Duterte chose to abuse his position and prey on women’s vulnerabilities. These women are abused twice: first by a system that abandons them, and then by men who exploit their desperation,” dagdag nito.

Giit naman ng Talikala, Inc., dapat seryosohin ang pahayag ni Moreno dahil nagpapakita ito ng mas malawak na problema ng human trafficking, na puwedeng gawing batayan ng mas malalim na imbestigasyon.

“There is a buyer, and women are being sold. There is a pimp. There was transporting and sexual exploitation. If you are an agency working against trafficking in persons, what are these,” ani Jeanette Ampog ng Talikala.

Nabatid na sa ngayon ay wala pang pormal na kasong isinampa kaugnay ng prostitusyon.

Batay sa datos ng Lenity Australia, tinatayang nasa 6,000 babae ang nasa prostitusyon sa Pilipinas, at 20 porsyento sa kanila ay menor de edad.

Sa datos naman ng UNICEF at iba pang NGO, pumapangatlo ang Pilipinas sa siyam na bansa na may pinakamaraming kabataang sangkot sa prostitusyon na tinatayang nasa pagitan ng 60,000 hanggang 100,000.

Kasama sa mga pangunahing lugar ng prostitusyon at sex tourism sa bansa ang Metro Manila, Angeles City, Puerto Galera sa Mindoro, Davao, at Cebu.