NATIONAL NEWS

Satisfaction ratings  nina PBBM at VP Sara, bumaba

Kapwa bumaba ang net satisfaction ratings nina Pangulong Ferdinand Marcos Jr., at Vice President Sara Duterte noong Disyembre nang nakaraang taon.

Batay sa survey ng Social Weather Stations, bumulusok sa 51% ang satisfaction rating ni PBBM, habang 32% naman ang nagsabing hindi sila satisfied sa performance ng Pangulo.

Nakakuha naman si VP Sara ng 52% performance rating, habang 31% ang nagsabing dissatisfied sila sa performance ng Bise Presidente.

Aabot naman sa 165 ng mga Pilipino ang ‘undecided’ sa performance nina PBBM at VP Sara.

Isinagawa ang nasabing survey noong December 12 hanggang 18, 2024 sa pamamagitan ng face-to-face interviews sa 2,160 adult respondents sa buong bansa.

Arestado ng mga otoridad ang 29 na foreign nationals na sangkot sa illegal POGO activities sa isang resort sa Silang, Cavite.

Ginawa ang operasyon matapos ang reklamo ng may-ari ng Elijosh Resort kaugnay sa kahina-hinalang aktibidad sa kanyang establisyemento.

Ayon sa resort owner, karamihan sa mga kustomer nila ay Chinese at pumapasok sa resort na may dalang gamit pangsugal, kabilang na ang mga computer at laptop.

Nalambat sa raid ang 23 Chinese at 6 na Myanmar nationals, na kapwa mga nagta-trabaho sa undeground POGO operation.

Nahuli ang mga suspek matapos maglabas ng mission order ang Bureau of Immigration, na siya ring nangangasiwa sa deportation proceedings. –  Sa panulat ni Laica Cuevas

Sumirit sa 25.9% ang bilang ng mga pilipinong nakaranas ng involuntary hunger noong huling bahagi ng 2024, pinakamataas simula noong kasagsagan ng pandemya taong 2020.

Sa resulta ng Social Weather Stations survey, mas mataas ito sa naitalang 22.9% noong Setyembre, at pinakamataas simula sa naiulat na 30.7% noong September 2020.

Lumabas sa survey na 18.7% ng mga Pilipino ang nakaranas ng moderate hunger habang 7.2% naman ang nakaranas ng severe hunger.

Kung ikukumpara sa nakalipas na quarterly survey, umakyat ang hunger rate sa Balance Luzon, bumaba sa visayas habang halos hindi naman nagbago sa Mindanao.

Ginawa ang survey mula December 12 hanggang 18, 2024 sa 2,160 respondents edad 18 pataas sa pamamagitan ng face-to-face interviews. –  Sa panulat ni Laica Cuevas

Umakyat na sa 85 ang nahuli ng mga otoridad dahil sa paglabag sa election gun ban kaya’t pumalo na sa walumpu’t anim na baril ang nakumpiska ng Philippine National Police.

Sa datos ng PNP, nakumpiska ang 41 unauthorized na baril mula sa mga police response operations; 30 ang nakuha mula sa mga checkpoint; 10 sa buy-bust operations habang 4 naman dahil sa search warrant at isa ang natagpuang inabandona.

31 mula sa nasabing bilang ay mga revolvers; labing dalawa ang point 45 caliber pistols;  labing dalawa ang point 9 MM pistols;  tatlong shotguns at isang rifle habang dalawampu’t pitong iba pang uri ng fire arms ang nakumpiska.

Karamihan sa mga naaresto ay mula sa Central Luzon; sinundan ng Metro Manila; Ilocos Region; Cagayan Valley; Calabarzon; Western Visayas; at Bangsamoro Autonomous Region in Muslim Mindanao (BARMM). – Sa panulat ni Alyssa Quevedo

Sinabon ni Deputy Majority Leader at Iloilo Rep. Janette Garin sa pagdinig ng House Supercommittee ang Department of Agriculture at iba pang kaukulang ahensya ng gobyerno.

Ito’y dahil sa kabiguan pa rin na mapababa ang presyo ng bigas at iba pang produktong agrikultura.

Sa pagdinig ng Quinta Committee iginiit ni Garin na paulit-ulit na ang ang sinasabi ng mga opisyal ng DA at iba ahensya pero wala pa ring epektibong solusyon sa mataas na presyo ng bigas, pagkain at kasama na rin ang kuryente.

Iginiit pa ni Cong. Garin na makabubuting gamitin ng kamara ang oversight power nito para panagutin ang mga opisyal at kawani ng gobyerno na responsable sa pagpapahirap sa buhay ng mga filipino.

Binatikos din ng mambabatas na kung saang planeta galing ang 58 pesos na maximum suggested retail price  para sa imported na bigas.

Paano aniya mapapababa ang presyo ng bigas kung mismong ahensya ng agriculture ang nagpapako nito sa mataas na halaga. – Sa panulat ni Jeraline Doinog

Pinuna sa pagdinig ng kamara ang ipatutupad na maximum suggested retail price o s-r-p ng department of agriculture sa mga imported na bigas.

Ayon kay House Deputy Minority Leader at Act Teachers Partylist Representative France Castro, hindi solusyon ang maximum SRP sa pagpapababa ng presyo ng bigas sa merkado.

Naniniwala si Congresswoman Castro, na mas kailangan ng “Emergency action” upang tugunan ang pagsirit ng bigas sa bansa.

Samantala, iginiit naman ni Quinta Comm Overall Chairman Joey Salceda, na masyadong mataas ang singkwenta’y otso pesos na maximum SRP para sa imported na bigas. – Sa panulat ni Alyssa Quevedo

Mayroon ng alinlangan ang ilang Kongresista hinggil sa pagpapatalsik sa pwesto kay Vice President Sara Duterte, matapos ang isinagawang peace rally ng religious group na Iglesia ni Cristo.

Ito’y ayon sa Political Analyst na si Dr. Froilan Calilung kung saan ayaw anyang malagay sa alanganin ang mga kredibilidad ng mga nasabing mambabatas na tatakbo sa 2025 midterm elections.

Dagdag pa ni Dr. Calilung, maaaring dahil sa nakita ng mga mambabatas na dami ng bilang ng mga dumalo sa nasabing rally ay baka makaapekto sa darating na halalan ang kanilang pagsali sa ikinakasang impeachment laban sa Bise Presidente.

Matatandaang mayroon ng nakabinbin na tatlong impeachment complaint ang Kamara laban kay VP Duterte. –  Sa panulat ni Alysssa Quevedo

Bumagsak ang ranking ng Pilipinas sa global banana exports noong 2024.

Batay sa ranking ng United Nations’ Food and Agriculture Organization, mula sa dating pangatlo, naging pang-apat na puwesto ang Pilipinas.

Ilan naman sa mga nakita ng department of agriculture ay ang magkakasunod na bagyo sa bansa noong nakaraang taon.

Gayunman, nangunguna pa rin ang Pilipinas sa banana expoerter sa asya.