NATIONAL NEWS

Kinumpirma ng Philippine Consulate General sa hong kong na sangkot sa pagnanakaw sa ang ilang mga turistang Pilipino sa nasabing bansa.

Ayon sa nasabing konsulado, kabilang ang ilang mga Pilipino sa naitalang 12% pagtaas sa mga kaso ng shoplifting sa nakalipas na taon.

Kaugnay nito, ilang mga Pilipinong turista rin ang nabibiktima  naman ng pandurukot.

Kaugnay nito, nagpaalala ang Philippine Consulate General sa lahat ng mga pupunta sa hong kong na sumunod sa mga batas ng nasbing bansa.

Sa ilalim ng hong kong theft ordinance, ang pagnanakaw o theft ay may parusang multa at pagkakabilanggo hanggang 10 taon. –  Sa panulat ni Kat Gonzales 

Nakatengga pa rin sa Kamara ang tatlong impeachment complaint laban kay Vice President Sara Duterte.

Sa panayam ng DWIZ, sinabi ni Gabriela Partylist Representative Arlene Brosas, na hanggang ngayon ay hindi pa rin umuusad sa Office of the Secretary General ang tatlong inihain na impeachment.

Maliban dito, inaabangan pa rin anya ng mga mambabatas kung kailan ihahain ang ika-apat na impeachment complaint laban sa pangalawang pangulo.

Umaasa naman ang kongresista na mabibigyan ng hustisya ang mga Pilipino hinggil sa usapin ng paglustay o paggamit ng pondo ng confidential funds ng Office the Vice President.

 Namayagpag ang trust at satisfaction ratings nina Pangulong Ferdinand Marcos Jr. at House Speaker Martin Romualdez.

Batay sa fourth quarter Tugon ng Masa survey ng OCTA Research, nakakuha si Pangulong Marcos ng 65% na trust rating, na mas mababa sa 69% na rating nito noong ikatlong quarter.

Nasa 64% naman ang nakuhang performance rating ni PBBM, na mas mababa kumpara sa 66% sa nakalipas na quarter.

Nakapagtala naman ng 58% na trust rating si Speaker Romualdez, mas mababa ng 3% sa naunang survey habang napanatili ang 59% na satisfaction ratings.

Samantala, bumulusok naman sa 49% ang trust rating ni VP Sara, na nabawasan nang 10% mula sa 59% na nakuha nito noong nakalipas na quarter.

Bumaba rin ang performance rating ng Bise Presidente sa 48% mula sa 52% noong ikatlong quarter.

Isinagawa ang survey noong November 10 hanggang November 16, 2024, sa 1,200 respondents edad 18 pataas.

Nasa ika-walong pwesto na ngayon ang Davao City sa listahan ng ‘Most Congested City’ sa buong mundo.

Batay sa 2024 Tomtom Traffic Index, umaabot ng halos 33 minuto ang travel time kada 10 kilometro sa nasabing lungsod.

Naitala rin ng Davao City ang 495 na congestion level.

Nasa ika-14 na pwesto naman ang Maynila, na may travel time na 32 minuto kada 10 kilometro.

Ginawa ang assessment sa mga lungsod sa 62 mga bansa batay sa daloy ng trapiko, travel time, at oras na nakokonsumo ng mga commuter dahil sa traffic.

Napagkasunduan ng Bicameral Conference Committee na ibalik ang pagpapatupad ng single license plate policy sa mga motorsiklo.

Sa pinal na bersyon ng panukala na nag-aamiyenda sa Motorcycle Crime Prevention Act, hindi na oobligahin ang pagkakabit ng dalawang plaka sa motorsiklo.

Iginiit ni Senador JV Ejercito na mas mainam nang may plaka ang lahat ng motorsiklo kaysa obligahing dalawa, ngunit hindi naman ito naibibigay ng Land Trasportation Office.

Sinabi naman ni Senador Francis Tolentino na ilalagay na lamang ang plaka sa likod ng mga motorsiklo.

Maliban dito, ibinasura rin ng mga mambabatas ang panukalang lagyan ng Radio Frequency Identification o RFID stickers ang harapan ng mga motor at ibinaba na rin ang multa sa paglabag sa nasabing batas. –  mula sa ulat ni Cely Ortega-Bueno (Patrol 19)

Tinutulungan pa rin ng Presidential Anti-Organized Crime Commission ang tinaguriang “POGO babies” o ang maliliit na anak na naiwan ng mga pinalayas na Foreign POGO workers.

Sinabi ni PAOCC Executive Director Gilbert Cruz na dahil sa POGO ban, karamihan sa mga Pilipinong magulang ng pogo babies ay nawalan din ng kabuhayan, dahil kalimitan sa kanila ay nagta-trabaho sa mga scam hubs tulad sa household, sa kusina, at maintenance ng gusali.

Sa ngayon ay may binabantayan ang PAOCC ng mahigit 20 POGO babies, at ang pinaka-bata sa mga ito ay dalawang buwan, ang pinakamatanda ay dalawang taon, habang mayroon pang tatlo na ipinagdadalang-tao pa lamang ng kanilang mga ina.

At dahil hindi maaaring abandunahin ang POGO babies, sinabi ni Cruz na ang PAOCC na mismo ang nagbibigay sa kanila ng tulong, at kalimitan sa kanilang hinihingi ay pang-gatas at diaper, pambayad sa upa ng apartment, at pang-ospital.

Matatandaang libu-libong foreign POGO workers ang umalis na sa bansa noong nakararaang taon matapos ipagbawal ni Pangulong Ferdinand Marcos Junior. –  mula sa ulat ni Giblert Perdez (Patrol 13)

Humiling si Kingdom of Jesus Christ Pastor Apollo Quiboloy sa Pasig Regional Trial Court Branch 159 na makapag-piyansa sa kasong qualified human trafficking.

Ayon kay Attorney Israelito Torreon, Abugado ni Pastor Quiboloy, mahina ang mga ebidensya na inihain laban sa Religious Leader.

Nakatakda namang isagawa bukas, Enero a-16 ang susunod na pagdinig.

Samantala, pinagbawalan namang dumalo ang religious leader sa isang live television interview kaugnay sa kaniyang paghahain ng Certificate of Candidacy para sa pagka-senador sa darating na halalan.

Inisa-isa ni dating Senador Antonio Trillanes iv ang mga tila “krimen” na nagawa ni Vice President Sara Duterte matapos ang malawakang national rally for peace ng Iglesia ni Cristo.

Ayon kay Trillanes, una na rito ang pagwawaldas ng Bise Presidente sa daan-daang milyong pera ng bayan sa Department of Education at Office of the Vice President.

Pangalawa, aniya ay may ill-gotten wealth sa daang milyong piso si VP Sara; pangatlo, sinasabing tumanggap ng pera sa drug lord at panghuli, nagbanta  pa itong ipapatay si Pangulong Ferdinand Marcos, First Lady Liza Arabneta Marcos at House Speaker Martin Romualdez.

Kasunod nito, binanggit ng dating Senador na mayroong pagtitipon na dadluhan ang  magdalo partylist bilang pagsuporta sa impeachment complaints laban sa Bise Presidente. – Sa panulat ni Jeraline Doinog

Muling nagpahayag ng suporta ang Partido Demokratiko Pilipino kay Vice President Sara Duterte kasunod ng mga inihaing impeachment complaint laban sa kanya.

Nakapaloob sa manifesto na kinokondena rin ng partido ang impeachment efforts laban kay VP Sara at iginiit na wala itong basehan at ‘politically motivated.’

Binigyang diin pa ng PDP na nagpapakita rin ito ng pag-abuso sa constitutional mechanisms.

Nanindigan din ang partido na ang impeachment ay bahagi ng serye ng mga pag-atake, na naglalayong sirain ang pamumuno at tiwala ng publiko kay VP Sara.

Naniniwala ang isang Political Analyst na si Prof. Dennis Coronacion, na may pulitika sa likod ng peace rally ng Iglesia ni Cristo.

Ito’y sa kabila ng sinabi ng INC na non-partisan ang isinagawa nilang aktibidad at pagsuporta lamang sa naunang pahayag ni Pangulong Ferdinand Marcos Jr., na walang maidudulot na kabutihan ang impeachment complaint laban kay Vice President Sara Duterte.

Ayon kay Prof. Coronacion, kahit saang angulo aniya tingnan ay may pulitikang nakapaloob sa nasabing rally.

Inihalimbawa ng Political Analyst ang pagsama ng ilang mga senador sa rally na uupo bilang mga senator-judges sakaling matutuloy ang pag-usad ng complaint.

Naniniwala naman si Prof. Coronacion na ang mistulang ‘show of force’ ng INC ay makaka-apekto sa desisyon ng mga senatorial candidates. – Sa panulat ni Jeraline Doinog