NATIONAL NEWS

Sinuportahan ng Lead Chairman ng House Quad Committee ang ikinakasang imbestigasyon ng Department of the Interior and Local Government sa war on drugs ni dating Pangulong Rodrigo Duterte dahil bukod sa bigo umanong nasugpo ang ilegal na droga ay naging dahilan ito ng lumalang corruption sa hanay ng Philippine National Police.

Una nang sinabi ni DILG Secretary Jonvic Remulla na magsasagawa sila imbestigasyon dahil lumalabas na nagkaroon ng grand conspiracy sa PNP para itago ang criminal activities sa loob ng organisasyon.

Ayon kay  Surigao Del Norte Rep. Robert Ace Barbers, isang patunay aniya dito ang pagsasampa ng mga kaukulang kaso laban sa 30 Police Officers kasama na ang dalawang General hinggil sa gawa-gawang raid sa Tondo Manila noong 2022.

Bukod sa pagtatakip sa criminal activities sa PNP Officers, tututukan din sa imbestigasyon ng DILG ang sinasabing reward system na unang inamin ni dating Police Colonel Royina Garma sa Quad Committee ng Kamara.

Giit pa ni Barbers na dahil sa reward system, lumala ang ‘criminal enterprises’ sa loob ng institusyon na naatasang magpatupad ng batas. –  Sapanulat ni Jeraline Doinog

Binigyan-diin ng Department of Justice na walang epekto sa kanilang ginagawang imbestigasyon kaugnay sa sinasabing banta ni Vice President Sara Duterte laban sa buhay ni Pangulong Ferdinand Marcos, Jr. ang isinagawang malawakang rally ng Iglesia ni Cristo.

Ayon kay Justice Secretary Jesus Crispin Remulla, immune sa anumang political pressure ang ginagawa nilang imbestigasyon.

Pantay-pantay anya ang lahat sa batas at hindi maaaring magbigay ng pabor sa iba dahil lamang sa posisyon.

Giit pa ng Kalihim,  kalayaan ng mga miyembro ng iglesia ni cristo ang nasabing pagtitipon.

Samantala, kinumpirma ng DOJ na nagpapatuloy pa rin ang kanilang imbestigasyon hinggil ng extrajudicial killings. –  Sa panulat ni Kat Gonzales

Nananatili ang posisyon ni Pangulong Ferdinand Marcos Jr. kontra sa impeachment kay Vice President Sara Duterte.

Ito ang tugon ng Malakanyang hinggil sa epekto ng peace rally ng Iglesia ni Cristo.

Ayon kay Executive Secretary Lucas Bersamin, hindi nagbabago ang posisyon ni PBBM, na hindi dapat ma-impeach si Vice President Duterte.

Matatandaang hinarang ni Pangulong Marcos ang ikinakasang impeachment laban sa Bise Presidente.

Katuwiran nito, pag-aaksaya lamang ng panahon ang pagpapatalsik sa puwesto kay Duterte.

Hindi naman kasi aniya mababago ang buhay ng mga pilipino kung mai-impeach ang Pangalawang Pangulo.

Giit pa ng Palasyo, maraming mas mahahalagang kailangang gawin para sa bayan. – mula sa ulat ni Gilbert Perdez (Patrol 13)

Kapwa bumaba ang trust at performance ratings nina Pangulong Ferdinand Marcos Jr., at Vice President Sara Duterte.

Batay sa fourth quarter tugon ng masa survey ng OCTA Research, nakakuha si Pangulong Marcos ng 65% na trust rating, na mas mababa sa 69% na rating nito noong ikatlong quarter.

Nasa 64% naman ang nakuhang performance rating ni pbbm, na mas mababa kumpara sa 66% sa nakalipas na quarter.

Bumulusok naman sa 49% ang trust rating ni VP Sara, na nabawasan nang 10% mula sa 59% na nakuha nito noong nakalipas na quarter.

Bumaba rin ang performance rating ng bise presidente sa 48% mula sa 52% noong ikatlong quarter.

Isinagawa ang survey noong November 10 hanggang November 16, 2024, sa 1,200 respondents edad 18 pataas.

Pinag-aaralan na ng Department of Agriculture kung ire-rekomenda nito na tanggalin ang executive order no. 62 na nagtatapyas sa taripa ng imported  na bigas at iba pang agricultural products.

Sa harap ito ng ulat na bumaba na ang presyo ng bigas sa international market.

Ayon kay Agriculture Spokesman at Assistant Secretary Arnel De Mesa, depende sa mga pangyayari ay maaring ibalik ang dating 35% na taripa, mula sa kasalukuyang 15% matapos ipatupad ang EO 62 noong Hulyo 2024.

Bagama’t marami pa aniyang proseso at dapat isaalang-alang bago maibalik ang dating taripa, pinag-aaralan nila ang lahat ng posibilidad at makikipag-ugnayan sila sa iba pang ahensya para pag-desisyunan ang nasabing usapin. – Sa panulat ni Laica Cuevas

Pinaalalahanan muli ng Department of Social Welfare and Development ang publiko kaugnay sa mga kumakalat na fake news kaugnay sa AKAP cash assistance.

Ito’y matapos may kumalat na text message na nagsasabing makakatanggap ng tatlong libong pisong cash assistance mula sa ayuda para sa kapos ang kita program kapalit ng pagbibigay ng mobile number.

Binigyan-diin ng DSWD, walang katotohanan ang nasabing text message dahil anila ang akap ay isang programa na nakalaan lamang para sa mga indibidwal na kabilang sa low-income category tulad ng mga manggagawa o empleyado na minimum wage earners.

Paliwanag pa ng departamento, hindi basta-bastang nagbibigay ng outright cash, dahil ang mga kwalipikadong benepisyaryo ng programa ay dumadaan sa pagsusuri at rekomendasyon ng dswd social worker. –  Sa panulat ni Kat Gonzales

Naniniwala si House Assistant Majority Leader Rep. Jude Acidre, na puno at sawa na ang publiko sa isyung kinasasangkutan ng mag-amang sina Vice President Sara Duterte, at dating Pangulong Rodrigo Duterte.

Kasunod ito ng inilabas na survey ng Social Weather Station, na 41% ng mga Pilipino ang pabor sa impeachment complaint laban kay VP Sara.

Sa datos naman ng Pulse Asia Survey, 61% naman ang pabor at suportado ang imbestigasyong ikinakasa ng quad committee ng kamara hinggil sa war on drugs campaign na ipinatupad ng nagdaang administrasyon sa ilalim ng pamumuno ni dating pangulong duterte kung saan, libu-libong biktima ang nasawi.

Ipinunto ng Kongresista na pagod na ang taumbayan sa Duterte-style politics na isang kultura ng kawalan ng pananagutan, mga pamamaraang nananakot, at mga desisyong pinapanigan ang kapangyarihan sa halip na pagsilbihan ang taumbayan.

Nanawagan naman si Cong. Acidre ng isang matibay na hakbang upang mapanagot ang mga Duterte sa kanilang mga maling nagawa sa kanilang tungkulin maging sa mamamayan.

Iginiit ng mambabatas ang pangangailangan ng bagong uri ng pamumuno na may patas, pananagutan, at nirerespeto ang batas.

Dapat anyang magsilbing paalala ang resulta ng survey  na buhay ang demokrasya ng bansa. –  Sa panulat ni Kat Gonzales

Tiniyak ni House Speaker Martin Romualdez na ipagpapatuloy ng kamara ang mga imbestigasyon na naglalayong pababain ang presyo ng bigas at iba pang pagkain at kuryente.

Ginawa ni Speaker Romualdez ang pangako sa pagbubukas ng sesyon ng 19th Congress.

Ayon sa lider ng Kamara, kaakibat ng mabuting pamamahala ang transparency at accountability ang mababang kapulungan ang nangunguna sa prinsipyong ito.

Sa mga susunod anyang linggo ay magsasagawa sila ng oversight hearings upang matiyak na nagagamit sa tama ang pera ng taumbayan.

Kabilang sa tututukan ng Kamara ang issue ng smuggling at hoarding na naka-apekto sa mga magsasaka at dahilan ng pagtaas ng presyo ng pagkain maging ang 206 billion pesos na disallowed expenditures ng National Grid Corporation of the Philippines.