NATIONAL NEWS

Inatasan na ni Pangulong Ferdinand Marcos Junior sa Department of Agriculture na tiyakin ang mabilis na paghahatid ng lahat ng uri ng suporta para sa mga magsasaka upang maiwasan ang anumang pagkaantala ngayong “planting season.”

Ipinag-utos din ni pangulong marcos sa Department of Budget and Management na iprayoridad ang agriculture sector at tiyakin ang napapanahong budgetary support.

Sa panig naman ng D.A., binigyang-diin nito na sa pamamagitan ng tamang tulong sa ‘pataba, de-kalidad na binhi at teknolohiya’, maaaring palakasin ng mga magsasaka at gawing mahusay ang kanilang pagiging produktibo.

Mahalaga anila ang napapanahong pamamahagi ng binhi at fertilizers upang maiwasan ang mga pagkaantala at mapalawak o mapalaki ang potensyal na ani.

Kinuwestyon ng Kamara ang pagtuturo ng sexual education sa mga bata partikular na sa elementarya.

Sa panayam ng DWIZ, binigyan-diin ni House Basic Education and Culture Committee Chairman at Pasig City Representative Roman Romulo na bagama’t hindi pa isang ganap na batas ang Comprehensive Sexuality Education Act, iginigiit anya ng Department of Education ang section 14 ng responsible parenthood and Reproductive Health Act of 2012 o RH Law.

Sa ilalim ng section 14 ng RH Law, dapat magkaloob ang estado ng reproductive health education sa mga kabataan partikular na sa adolescence age at ang mga magtuturo hinggil dito ay dapat dumaan sa masusing pagsasanay. 

Kaugnay nito, pala-isipan din sa Kongresista kung paano ang ginagawang approach ng mga guro sa pagtuturo ng sexual education dahil anya makaka-apekto ito sa pag-iisip ng isang musmos. –  Sa panulat ni Kat Gonzales

Tinatayang mas lalakas pa ang ekonomiya ng Pilipinas hanggang sa 2026.

Batay sa latest world economic situation and Prospects report ng United Nations, inaasahan na ang gross domestic product ng bansa ay aangat pa ng 6.1% ngayong taon na tinatayang aabot sa 6.2% sa susunod na taon.

Tinawag ni un Department of economic and Social Affairs Officer Zhenqian Huang ang Pilipinas bilang isa sa “Strongest Growth Performer” sa mga bansa sa bahagi ng East Asian economies.

Aniya, malaking tulong sa pamamayagpag ng ekonomiya ng bansa ang malakas na domestic demand, puspusang public investments at ang positibong epekto ng mga investment policy reforms at paglakas din ng services sector.

Una nang inihayag ni NEDA Secretary Arsenio Balisacan na gumagawa na sila ng mga hakbang para mapatatag ang ekonomiya ng bansa. –  Sa panulat ni Jeraline Doinog

Aminado si Manila 6th District Representative Benny Abante na ayaw pang pag-usapan ng ilang lider ng kamara ang impeachment complaints laban kay Vice President Sara Duterte.

Ayon kay Cong. Abante, sang-ayon sa kanya ang ilang lider ng Kamara na huwag munang pag-usapan ang paghahain ng reklamo bago ang eleksyon o bago magtapos ang kasalukuyang kongreso.

Mas maigi anyang talakayin na lamang ito sa panibagong kongreso.

Matatandaang tatlong impeachment complaint ang inihain laban kay VP Duterte dahil sa sinasabing anumalyang paggasta nito sa confidential funds ng Office of the Vice President at Department of Education sa ilalim ng liderato nito.

Hindi pa siguradong POGO-free na ang Pilipinas.

Ito ayon kay Interior and Local Government Secretary Jonvic Remulla, ay sa kabila ng deadline na ibinigay ng pamahalaan noong katapusan ng 2024 kung saan dapat ay tigil-operasyon at sarado na ang lahat ng POGO sa bansa.

Ayon kay Secretary Remulla, patuloy pa rin nilang inaalam kung nagsara na ang lahat ng POGO sa bansa.

Sa kasalukuyan, mayroon pa aniyang 400 foreign POGO workers ang nakakulong sa bansa at nakatakdang ipa-deport sa lalong madaling panahon.

Kaugnay nito, hindi pa matukoy ng DILG Secretary kung nakaalis na ang lahat ng dayuhang trabahador ng POGO na nag-downgrade ng visa. - Sa panulat ni John riz Calata

Kumbinsido si Department of Interior and Local Government Secretary Jonvic Remulla na may naganap na grand conspiracy sa likod ng kontrobersyal na 990 kilograms drug haul ng Philippine National Police noong October 2022.

Maaalalang naaresto sa buy bust operation si PMSG Rodolfo Mayo sa Quiapo, Manila at nasamsam ang 6.7 billion na halaga ng illegal na droga.

Sa press briefing sa Malacañang, inilatag ng Department of Justice pagkasunod-sunod ng mga pangyayari at ang mga nakalap na ebidensya.

Iniulat rin ng ahensya na nasampahan na ng kaso ang nasa 30 mga pulis na sangkot sa naturang drug haul.

Napagalaman sa imbestigasyon na nagkaroon ng sabwatan sa pagitan ng mga generals at police personnel na kabilang sa naturang operasyon. –  Sa panulat ni john Riz Calata

Tinapos na ng National Bureau of Investigation ang  imbestigasyon kaugnay sa naging banta ni Vice President Sara Duterte laban kina Pangulong Ferdinand Marcos Jr., First Lady Liza Araneta Marcos at Speaker Martin Romualdez.

Ayon kay Prosecutor General Richard Fadullon, kasalukuyan nang pinag-aaralan ng Department of Justice ang inisyal na imbestigasyon ng NBI.

Paliwanag pa ni Fadullon na nakadepende sa magiging resulta ng evaluation kung magsasampa ng kaso laban sa bise presidente o ibalik sa NBI ang mga impormasyon para palakasin ang kaso upang hindi ibasura ng korte.

Patuloy naman ang pagtutulungan ng DOJ at NBI para maresolba ang naturang usapin.

Para naman kay Justice Undersecretary Raul Vasquez, ang isinasagawang ebalwasyon sa inisyal na imbestigasyon ng NBI ay bahagi ng case build up.

Kinumpirma ni Vice President Sara Duterte na seryoso niyang ikinokonsidera ang pagtakbo sa 2028 national elections.

Ito’y matapos matanong ng isang OFW sa Japan hinggil sa posibilidad na tumakbo siya sa 2028 polls.

Nabatid na nagtungo si VP Sara sa Japan noong weekend para sa isang private trip ngunit nakabalik rin agad sa bansa kahapon.

Sa naturang pagbisita, kinausap ng Bise Presidente ang ilan sa mga grupo ng OFWs sa nasabing bansa.

Hindi naman  binanggit ng Bise Presidente kung ano ang posisyong pinag-aaralan niyang takbuhan sa 2028.

Samantala, balak umano ni dating presidential Legal Counsel Salvador Panelo na patakbuhin si Senador Robin Padilla bilang pangulo sa 2028 sakaling hindi tumakbo si Duterte. –  Sa panulat ni Jeraline Doinog

Sorpresang nabakante ang chairmanship ng House Appropriation Committee sa unang araw ng pagbabalik session ng Kamara, kahapon.

Ito’y matapos ihain ni Presidential Son Ilocos Norte 1^st District Representative Sandro Marcos ang mosyon sa plenaryo upang ideklarang bakante ang posisyon na siyang hinahawakan ni Ako Bicol Partylist Representative Zaldy Co.

Kasunod nito, nagpasalamat naman si Co, sa mayorya ng kongreso sa pagtanggap sa kaniyang desisyon na magbitiw sa kaniyang pwesto dahil aniya sa kaniyang iniindang kalusugan kung saan kinakailangan na naiya itong tutukan.

Dagdag pa ng Kongesista, isang karangalan para sa kaniya ang magsilbi bilang tagapamahala ng naturang komite sa nakalipas na tatlong taon.

Pinagmamalaki rin aniya ang “Ayuda sa Kapos ang Kita o AKAP Program para sa mga Pilipino. –  Sa panulat ni Jeraline Doinog

Nagpasalamat si dating Pangulong Rodrigo Duterte sa Iglesia ni Cristo sa pag-oorganisa ng “National Rally for Peace” kahapon.

Sinabi ng dating Pangulo na ang naturang rally ang kinakailangan ng bansa ngayon at hindi impeachment.

Pinasalamatan din niya ang mga grupo at indibidwal na nagpapakita ng malasakit para sa bansa.

Para naman kay Vice President Sara Duterte ang nasabing aktibidad ng INC ay isang pagpapakita ng pagkakaisa at pananampalataya na ang tanging hangad lang aniya ay kapayapaan tungo sa kaunlaran ng bansa. –  Sa panulat ni Jeraline Doinog