NATIONAL NEWS

Nilinaw ng religious group na Iglesia ni Cristo na ang isinagawang rally ay hindi isang pang-politika kundi ang pagkakaroon ng kapayapaan at pagkakaisa sa bansa.

Ayon kay INC Spokesman Edwil Zabala, wala silang inimbita na indibidwal o grupo na may kinalaman sa pulitika upang lumahok sa nasabing event.

Wala rin aniya silang inendorso na kandidato ngayong 2025 midterm election.

Gayunman, umaasa ang INC, na matitigil na ang hidwaan sa politika at magbigay atensyon na lamang sa pagbibigay programa at serbisyo sa mga Pilipino. –  Sa panulat ni Alyssa Quevedo

Iniatras na ni dating Ilocos Sur Governor Chavit Singson ang kaniyang kandidatura sa pagka-senador.

Ayon sa dating Mambabatas, mayroon siyang kumplikasyon sa kalusugan na galing sa kaniyang mga gamot na iniinom.

Hindi aniya biro ang pangangampanya maging ang ang trabaho sa senado.

Nakatakdang tumakbo si Singson bilang independent candidate sa pagka-senador sa midterm election. –  Sa panulat ni Jeraline Doinog

Muling ipinanawagan ng Trade Union Congress of the Philippines, ang pinaka-malaking samahan ng mga manggagawa sa bansa, ang pagpasa sa 150 peso legislated across-the-board daily wage hike.

Ipinunto ng TUCP na kailangan ng mga obrero ang naturang umento sa gitna na rin ng increase sa private sector na inaprubahan ng 15 mula sa 16 na rehiyon.

Ayon kay TUCP. Vice President Luis Corral, napapanahon na ang dagdag sahod bunsod ng tumataas na presyo ng pagkain, singil sa kuryente, SSS contribution at naka-umang pa ang fare hike sa LRT-line 1.

Una nang naghain ng petisyon ang LRT-1 Operator na Light Rail Manila Corporation para sa kanilang hirit na dagdag singil na hanggang 15 pesos sa pasahe.

Tiniyak ng Department of Agriculture ang patuloy na pagpapalakas ng mga hakbang nito para makabili ang publiko ng mas abot-kayang presyo ng bigas.

Ito’y sa pamamagitan ng pagpapalawak sa Rice-For-All Program at pagbubukas ng dagdag na Kadiwa ng Pangulo kiosks sa mga palengke at istasyon ng tren.

Sa ilalim ng programa, makabibili ang mga consumer ng 45 peso per kilo para sa 5% na durog na bigas, 40 para sa 25 percent na durog habang 36 pesos para sa 100% na durog o tinatawag na sulit rice.

Nakalaan naman ang 29 peso rice program para sa mga mahihirap, senior citizens, solo parents, may kapansanan at mga katutubo na may limit na 10 kilo kada buwan sa bawat benepisyaryo.

Ayon kay Agriculture Secretary Kiko Laurel, layunin ng inisyatibong ito na matiyak na mananatili ang opsyon ng murang bigas para sa mga mahihirap na pamilya.

Nakipag-usap na rin anya ang d.a. Sa mga LGU Sa buong Metro Manila para maibenta ang imbak ng National Food Authority sa presyong 38 pesos per kilo.

Aminado si Senate Committee on Ways and means Chairman Sherwin Gatchalian na mahirap sugpuin ang smuggling sa bansa.

Sa panayam ng DWIZ, ayon kay Senador Gatchalian, ito ay sa gitna ng pagtaas ng kaso ng pagpupuslit ng mga iligal na produkto sa bansa.

Dagdag pa ng mambabatas, hindi nalang sigarilyo ang ipinupuslit sa bansa kundi pati langis at mga nagamit nang damit.

Sinabi rin ni Senador Gatchalian na dahil sa mga hindi nagbabayad ng excise tax ay lumalaki ang foregone revenue sa bansa. –  Sa panulat ni John Riz Calata

Tiniyak ng Philippine Health Insurance Corporation ang patuloy na pagbibigay at pagpapalawak ng mga benepisyo nito para sa PhilHealth members.

Ayon kay PhilHealth senior vice president at Spokesman, Dr. Ish Pargas, ipatutupad nila ang mga bagong benepisyo sa kabila ng agam-agam dahil sa kawalan ng subsidiya mula sa pamahalaan.

Bukod sa epekto ng subsidy cut, aminado si Dr. Pargas na may ilan pang kinakaharap na hamon ang ahensya. –  Sa panulat ni John Riz Calata

Welcome kay Senate Committee on Ways and Means Chairman Sherwin Gatchalian na pahabain ang termino ng mga kasalukuyang Barangay at Sangguniang Kabataan Officials.

Sa panayam ng DWIZ, sinabi ni Senador Gatchalian na ito ay dahil dalawang taon lamang ang termino ng mga kasalukuyang Barangay Officials dahil mababatid na iniurong botohan sa mga ito.

Dagdag pa ng mambabatas, kailangang pang pag-aralann ang nasabing panukala. –  Sa panulat ni John Riz Calata

Pinayuhan ng Commission on Elections ang mga 2025 national and local elections aspirants na iwasan ang pangangampanya sa peace rally ng Iglesia ni Cristo, ngayong araw.

Ayon kay COMELEC Chairman George Erwin Garcia, huwag sanang gamitin ng politko ang religious activity na gagawin ng INC.

Gayunman, nilinaw ni Chairman Garcia na hindi na sila magmo-monitor kung may mga mangangampanya sa nasabing prayer rally.

Naniniwala aniya siya na ang mga pulitiko at kandidatong rumerespeto ay mas pinagpapala. –  Sa panulat ni John Riz Calata