NATIONAL NEWS

Aminado si Senate Committee on Ways and Means Chairman Sherwin Gatchalian na makaaapekto ang peace rally na isasagawa ng Iglesia ni Cristo kung uusad ba impeachment laban kay Vice President Sara Duterte.

Sa panayam ng DWIZ, ayon kay Senador Gatchalian, ito ay dahil papalapit na ang eleksyon at malaki ang epekto ng INC sa resulta ng halalan.

Hinimok naman ng mambabatas ang publiko na isantabi muna ang pulitika at ituon ang pansin sa higit na mas kailangan ng bansa.

Hinimok naman ng mambabatas ang publiko na isantabi muna ang pulitika at ituon ang pansin sa higit na mas kailangan ng bansa.

Kaugnay nito, iginiit ni Senador Gatchalian na malaya ang publiko na ipabatid ang kanilang mga pananaw. –  Sa panulat ni John Riz Calata

Mababawasan ang mga ikakasang programa at proyekto ng Office of the Vice President ngayong taon bunsod ng pagtapyas ng kongreso sa kanilang budget.

Ayon kay Vice President Sara Duterte, ginawang limitado na lamang nila ang mga proyekto at programa nila upang maraming Pilipino pa rin ang maging beneficiaries nito.

Gayunman, sinabi ni VP Sara na pinag-uusapan pa nila ang mga gagawing proyekto na mapakikinabangan pa rin ng mga Pilipino. –  Sa panulat ni Alyssa Quevedo

Inihahanda na ang pag-uuwi sa labi ng Pinay na pinatay ng kanyang asawa sa Slovenia.

Ayon kay Department of Foreign Affairs Undersecretary Eduardo De Vega, nakikipag-ugnayan ang Philippine Embassy sa Vienna tungkol sa repatriation ng labi ni Marvil Facturan.

Matatandaang pinatay si Facturan, 27-anyos ng kanyang asawang Slovenian, na si Mitja Kocjancic, habang nasa bakasyon sa Bled, Slovenia noong December 29, 2024.

Batay sa ulat may history ng mental health problems ang suspek na naaresto at dinala sa psychiatric hospital.

Kinondena ng Commission on Filipinos Overseas ang pagpatay sa Pinay ilang araw lamang matapos ang pasko noong nakaraang taon. –  Sa panulat ni Jeraline Doinog

Iginiit ni Senate Committee on Ways and Means Chairman Sherwin Gatchalian na dapat masubukan ng pamahalaan ang lahat ng paraan upang mapababa ang presyo ng bigas.

Sa panayam ng DWIZ, sinabi ni Senador Gatchalian na ito ay kasunod ng anunsyo ng Department of Agriculture na target nitong magtakda ng maximum suggested retail price sa imported rice.

Ipununto rin ni Senador Gatchalian ang kahalagahan ng enforcement, at pagmo-monitor sa presyo ng bigas. –  Sa panulat ni John Riz Calata

Nilinaw ng Department of Agriculture na hindi sila magdedelklara ng food security emergency sa bans.

Binigyang-diin ni Agriculture Spokesman, Assistant Secretary  Arnel De Mesa, walang rice shortage at walang extraordinary spike sa retail prices na magpapatupad nito.

Maaari lamang aniya gamitin ng DA ang Section 6 Republic Act 12078 o ang Agricultural Tariffication Act kung matutugunan ang dalawang kondisyon, una, may kakulangan sa supply ng bigas at pangalawa, may pambihirang pagtaas ng presyo.

Dagdag pa ng DA Official na inaasahang lalo pang bababa ang presyo ng retail ng bigas dahil downtrend din ang gastos nito sa international market.

Iginiit pa ni Asec. De mesa na gumagawa na ng ibat ibang paraan anga pamahalaan para mas mapababa pa ang presyo ng mga pangunahing bilihin partikular na ang bigas. –  Sa panulat ni Jeraline Doinog

Posibleng may kaugnayan sa pagsasara ng mga POGO ang serye ng pandurukot sa mga Chinese national sa Maynila, Bulacan at Calabarzon.

Ayon kay PNP Regional Office 3 Director Brig. Gen. Jean Fajardo, isa ito sa tinitingnan nilang anggulo matapos ang POGO ban na naging epektibo noong December 31.

Nakikipag-ugnayan na aniya sila sa anti-kidnapping group at kinumpirma nitong may mga insidente ng kidnapping sa Chinese nationals at lumalabas na kapwa chinese ang sangkot dito.

Sinabi ni brig. Gen. Fajardo na bagama’t nakakalaya ang iba matapos magbayad ng ransom, may ilan namang pinapatay at nawawala pa.

Idinagdag pa ng PNP Official na maaring dala ito ng away sa lokasyon o lugar na pagtatayuan ng maliliit na POGO hub dahil na rin sa pinaigting na guerilla operations ng mga otoridad. –  Sa panulat ni Laica Cuevas

Nananatili bilang urgent national concern ng mayorya o katumbas ng 56% ng mga Pilipino ang pagkontrol sa inflation o bilis ng pagtaas ng mga bilihin at serbisyo.

Batay ito sa Tugon ng Masa survey ng OCTA Research noong huling bahagi ng 2024, kung saan bumaba ito ng 10% mula sa 66% noong third quarter.

Nasa 44% din ng mga Pilipino ang nagsabing dapat pagtuunan ng pansin ng gobyerno ang access sa murang pagkain habang 36% ang nagsabi na dapat taasan ang suweldo ng mga manggagawa.

Naitala naman bilang most urgent personal concern ng mga pinoy ang mabuting kalusugan na nakakuha ng 70%.

Ginawa ang survey sa pamamagitan ng face-to-face interviews sa 1,200 respondents na may edad 18 pataas noong November 10 hanggang November 16.-  Sa panulat ni Laica Cuevas

Pinanghihinayangan ni Senador Ronald Dela Rosa ang mga aral at karanasang maaring maibahagi ng mga dating Presidente ng bansa matapos ang balasahan sa National Security Council.

Ayon kay Senador Dela Rosa, bagama’t karapatan ni Pangulong Ferdinand Marcos Jr. ang magtanggal ng mga miyembro ng NSC, sayang aniya ang mga payong sana’y maibibigay ng mga dating opisyal lalo na pagdating sa usaping segurudad. –  Sa panulat ni Laica Cuevas

Iginiit ni Senador Ronald Dela Rosa na dapat magpakatotoo si Pangulong Ferdinand Marcos Jr. kung ano talaga ang kanyang paninindigan sa usaping impeachment laban kay Vice President Sara Duterte.

Ayon sa Senador, mahirap na ‘tila nanghuhula ang mga tao kung ano ang paniniwalaan dahil iba ang sinasabi ng pangulo sa kanyang ginagawa.

Kaugnay nito, kumbinsido rin si Senador Dela Rosa na anuman ang maging desisyon ng Pangulo, malaking impluwensya rito si House Speaker Martin Romualdez. –  Sa panulat ni Laica Cuevas

Kumpiyansa ang Department of Social Welfare and Development na makakamit ng pamahalaan ang target na single digit poverty rate hanggang sa taong 2028.

Ayon kay  Social Welfare Undersecretary Edu Punay, kaya itong maabot sa susunod na tatlong taon, sa tulong ng mga programa ng gobyerno at suporta mula sa international organizations.

Bagama’t hindi sinabi ni Usec. Punay kung anong mga hakbang ang kanilang gagawin para makamit ang single digit poverty rate, binigyang-diin ng opisyal ang kahalagahan ng pagbuo ng desisyon na nakabatay sa mga datos.

Sa tulong aniya ng mga konsultasyon at pag-aaral, hindi imposibleng mapababa ng administrasyong Marcos sa single-digit ang poverty level sa bansa. - Sa panulat ni Laica Cuevas