NATIONAL NEWS

Iginiit ni house committee on Appropriations Chairperson at Ako Bicol Party-List Rep. Elizaldy Co ang kahalagahan na matulungan din ng pamahalaan ang mga minimum wage earners sa gitna ng tumataas na presyo ng bilihin.

Ayon kay Cong. Co, nagrereklamo na rin ang mga minimum-wage earner gaya ng food chain service crew, grab drivers at maging mga nasa pribadong sektor dahil ang tinutulungan lamang aniya ng gobyerno ay ang mga walang trabaho o pinakamahihirap na pamilya.

Dahil dito, binuo ng mga mababatas ang ayuda  para sa kapos ang kita program o akap program na ipinatutupad ng Department of Social Welfare and Development at pinaglaanan ng pondo ng kamara sa ilalim ng pamumuno ni Speaker Ferdinand Martin Romualdez. –  Sa panulat ni Jeraline Doinog

Muling nagbabala ang Commission on Elections sa mga politikong susubukang mangampanya ngayong Nazareno 2025.

Ayon kay COMELEC Chairman George Garcia, kailangang mag-ingat ang mga politikong tatakbo ngayong 2025 midterm election sa pagpopost at pagsasagawa ng caridad, tulad ng pamamahagi ng pagkain dahil maaaring maidiskwalipika ang mga ito.

Kaugnay nito, nananawagan din si Rev. Father Rufino ‘Jun’ Secson, Rector at Parish Priest ng Minor Basilica at  National Shrine of Jesus Nazareno sa mga politiko na igalang ang nasabing okasyon.

Una nang nagpahiwatig ng pagkadismaya ang COMELEC hinggil sa mga politikong nagpapalabas na ng mga advertisements bago pa man magsimula ang campaign period. –  Sa panulat ni Alyssa Quevedo

Patung-patong na problema ang kinakaharap ni Vice President Sara Duterte matapos itong alisin ni pangulong marcos bilang miyembro ng National Security Council,  kamakailan.

Habang maaari namang maharap pa ito sa ikaapat na panibagong impeachment complaint sa Kongreso.

Ayon kay House Secretary General Reginald Velasco, ilang miyembro na ng mayorya sa kongreso ang nagpahiwatig na maghahain ng ikaapat na impeachment complaint laban sa Bise-Presidente.

Aniya, ang gusto ng ilang mambabatas ay umusad na ang mga nakahaing impeachment complaint ngunit mismong si Pangulong Ferdinand Marcos jr. Ang tutol dito.

Hindi naman pinaglanan ni Velasco ang mga nasabing mambabatas na planong maghain ng isa pang impeachment complaint laban kay VP Sara.

Nag-ugat ang mga reklamo laban sa Pangalawang Pangulo dahil sa hindi nito maipaliwanag kung saan ginastos ang 125 million pesos na confidential funds noong 2023.  – Sa panulat ni Jeraline Doinog

Magsasagawa ng kilos protesta ang tatlong complainant na naghain ng impeachment complaint laban kay Vice President Sara Duterte.

Ito ayon kay dating Bayan Muna Rep. Teddy Casiño, kasunod ng pagpupulong ng mga complainant kung saan pinag-usapan nila ang susunod na hakbang habang lumalapit ang pagtatapos ng 19th Congress.

Sa isasagawa anilang kilos-protesta ay ipapanawagan nila sa pamunuan ng Kamara na bigyang aksyon ang mga  inihaing reklamo upang mapapanagot si VP Sara sa maling paggamit ng pondo.

Dagdag pa ng dating Kongresista, nais lang nila na ipadala na ng speaker ang kanilang complaints sa Committee on Justice para ito ay mapag-usapan at mapag-desisyon na.

Muli namang magbubukas ang sesyon ng kamara sa susunod na Linggo, Enero 13 na magsasara sa Pebrero 7 upang bigyang daan ang simula ng kampanya ng mga tumatakbo sa pagkasenador. –  Sa panulat ni Jeraline Doinog

Suportado ng 41% ng mga Pilipino ang pagpapatalsik kay Vice President Sara Duterte.

Sa resulta ng SWS survey, 35% naman ng mga Pilipino ang kontra impeachment habang 19% ang undecided.

Ayon pa sa 46% ng repondents, dapat nang tanggalin ang Bise-Presidente dahil sa kabiguan nitong ipaliwanag ang paggasta sa kontrobersyal na confidential funds ng kanyang mga tanggapan.

Naitala ang pinakamataas na percentage ng pabor sa impeachment sa Balance Luzon, sinundan ng National Capital Region at Visayas habang pinakamababa naman sa balwarte ng mga Duterte sa Mindanao.

Matatandaang, inihain ng iba’t ibang grupo ang tatlong impeachment complaint laban sa Pangalawang Pangulo na in-endorso naman ng anim na miyembro ng kamara. - Sa panulat ni Laica Cuevas

 Lalarga na ang malalaking pagbabago sa Pantawid Pamilyang Pilipino Program (4Ps) ngayong taon kung saan isasama na ang ‘first 1,000 days’ bilang bahagi ng programa.

Ito ang sinabi ni DSWD Spokesperson at Assistant Secretary Irene Dumlao matapos aprubahan ni Pangulong Ferdinand Marcos Jr. ang kanilang proposal.

Bilang bahagi ng bagong patakaran, ipinaliwanag ni Asec. Dumlao na magkakaroon ng karagdagang conditional cash grants ang 4Ps beneficiaries na may buntis o batang may edad zero hanggang dalawang taon.

Ipinunto ng opisyal na layunin ng mga hakbang na hindi lamang tugunan ang agarang pangangailangan ng mga benepisyaryo kundi bigyan din sila ng kakayahang mag-transition o mag-exit sa programa na may mas maayos na antas ng pamumuhay. – Sa panulat ni Laica Cuevas mula sa ulat ni Gilbert Perdez (Patrol 13)

Pirmado na ni Pangulong Ferdinand Marcos jr. ang Implementing Rules and Regulations (IRR) ng Republic Act no. 12021 o ang Magna Carta of Filipino Seafarers.

Ito’y matapos maisapinal ng Department of migrant Workers at Maritime Industry Authority ang IRR alinsunod na rin sa itinakdang 90-araw sa ilalim ng section 97 ng nasabing batas.

Ayon kay Pangulong Marcos, sa ilalim ng batas at IRR ay itatatag ang one-stop shop para sa seafarers, na magpapasimple ng mga proseso.

Laman nito ang mas detalyadong gabay para sa implementasyon ng batas, kabilang na ang mga probisyon sa employment standards, social protection, kalusugan, kaligtasan, skills training, at suporta sa pamilya.

Isa ang Magna Carta of Filipino Seafarers sa mga pangunahing panukalang batas na isinulong ng administrasyong Marcos na layuning tiyakin ang karapatan, kapakanan, at dignidad ng mga Marinong Pilipino. –  Sa panulat ni Laica Curva

 Arestado ng Bureau of Immigration ang aabot sa apatnaraang indibidwal na pinaniniwalaang illegal aliens na sangkot sa POGO operations at scamming activities sa Paranaque City.

Ayon kay Immigration Commissioner Joel Anthony Viado, malinaw ang kautusan ng Pangulo na total pogo ban kaya’t sinumang susuway ay maaaresto at ipapa-deport.

Bahagi aniya ang operasyon ng mas pinaigting na pagsisikap laban sa iligal na aktibidad upang matiyak na lahat ng foreign nationals sa bansa ay sumusunod sa batas.

Sumasailalim na sa booking proceedings ang mga naturang indibidwal at pansamantalang pangangasiwaan ng ahensya habang naghihintay ng deportation proceedings. –  Sa panulat ni Laica Cuevas

Iginiit ng Department of Health na hindi kailangang magpatupad ng lockdown o isara ang border ng bansa dahil sa mga sinasabing ulat ng Human Metapneumovirus (HMPV) outbreak sa ilang bahagi ng china.

Batay sa huling ulat nitong nakaraang linggo,  sumirit ang kaso ng HMPV sa mga kabataan sa hilagang bahagi ng China.

Ayon kay Health Assistant Secretary Albert Domingo, hindi na bago ang HMPV dahil nuong nakaraang taon lamang ay mayroon silang naitalang 284 cases nito sa Pilipinas.

Hindi lamang din anya nakukuha sa China ang nasabing sakit at mayroon din nito sa ibang bansa, dahil lumalabas ang sakit na ito tuwing panahon ng taglamig.

Gayunman, pinaalalahanan ni Asec. Domingo ang publiko na mag-ingat pa rin at palakasin ang immune system upang maiwasan ito. – Sa panulat ni Alyssa Quevedo

Pinahintulutan na ng Commission on Elections ang pagpapatupad sa ilang programa ng pamahalaan tulad ng Ayuda para sa Kapos ang Kita Program (AKAP), 4Ps, AICs at iba pang welfare programs sa kabila ng election ban.

Sa bisa ng isang memorandum, pinagbigyan ng COMELEC ang kahilingan ni Social Welfare Secretary Rex Gatchalian na i-exempt ang mga programa mula sa 45-day spending ban para sa may 2025 midterm elections sa ilalim ng ilang kondisyon.

Mahigpit na ipinagbabawal ng poll body ang pangingialam o kahit pagpunta lamang ng mga kandidato o pulitiko tuwing may payout o pamamahagi ng ayuda, at dapat na mag-draft ang dswd at ipatupad ang guidulines para sa implementasyon ng mga programa.

Sa ilalim ng election code, ipinagbabawal ang paglalabas ng pondo ng mga ahensya ng pamahalaan tuwing election period bilang pagtiyak na hindi ito magagamit ng mga kandidato para sa kanilang pangangampanya.

Gayunman, pinahihintulutan ng comelec resolution 11060 ang “Social welfare and services projects at housing-related projects” na magpatuloy sa kabila ng kautusan basta’t nakakuha ang mga ahensya ng Certificate of Exemption mula sa COMELEC. –  Laica Cuevas