NATIONAL NEWS

Pinawi ng World Health Organization ang pangamba ng publiko sa paglobo ng respiratory infections ngayong taglamig, lalo sa China.

Nilinaw ni WHO Spokesperson Margaret Harris na normal lamang ang pagdami ng respiratory infections, partikular ng human metapneumovirus (HMPV) sa Northern Hemisphere ngayong winter.

Sa katunayan anya ay mas mababa ang hospital utilization ngayong 2025 kumpara noong isang taon at hindi na rin naman bago ang HMPV na taong 2001 pa unang natukoy.

Nobyembre pa nagsimulang tumaas ang kaso ng HMPV na kadalasan naman sa mga malalamig na bansa, gaya sa America at China.

Sa kabila nito, kontrolado pa sa mga nasabing lugar ang dumaraming kaso ng seasonal respiratory diseases.

Bumaba ang bilang ng mga Pilipinong walang trabaho sa bansa nuong Nobyembre ng nakaraang taon.

Batay sa datos ng Philippine Statistics Authority (PSA), sumadsad sa 3.2% o katumbas ng 1.66 milyong Pilipino ang walang trabaho sa nasabing buwan.

Mas mababa ito kumpara sa 3.9% unemployment rate nuong Oktubre sa kaparehong taon.

Maliban dito, bumaba din ang underemployment rate sa 10.8% o katumbas ng 5.35 milyong Pilipino mula sa 12.6% nuong Oktubre ng nasabing taon.

Samantala, umakyat naman 96.8% ang bilang ng mga Pilipinong may trabaho o katumbas ng halos 50 milyon katao.

Mas mataas ang nasabing bilang kumpara sa 96.1% employment rate na naitala nuong Oktubre ng 2024. – sa panulat ni Alyssa Quevedo

Mistulang dinepensahan ng Malakanyang ang taas-contibution ng Social Security System na epektibo na nagyong buwan.

Ayon kay Executive Secretary Lucas Bersamin, dumaan sa masusing pag-aaral ang nasabing SSS contribution hike kaya’t hayaan na muna itong magpatuloy hanggang lumabas ang magiging resulta.

Ang naturang contribution rate hike ay huling bugso ng serye ng pagtaas ng kontribusyon sa ilalim ng Republic Act no. 11199 o ang Social Security Act of 2018, na nagtulak sa mandatory contribution mula 12% noong 2019 hanggang 15% ngayong taon.  – Panulat ni Jeraline Doinog mula sa ulat ni Giblert Perdez (Patrol 13)

Nananatiling propesyunal ang hanay ng Armed Forces of the Philippines sa kabila ng sinasabing ‘political intrigue’ matapos ang balasahan sa National Security Council.

Ayon kay AFP Spokesperson Colonel Francel Margareth Padilla, kung tatanungin kung mayroong hidwaan, isa lang itong pangkaraniwang kaso ng intriga sa pulitika.

Wala aniya itong ibig sabihin at nananatiling nagkakaisa at tapat ang security sector sa ilalim ng konstitusyon at sumusunod sa chain of command.

Kaugnay nito, itinanggi rin ni NSC Assistant Director General Jonathan Malaya ang mga naturang alegasyon at iginiit ang walang patid na suporta ng national security establishment para sa pamumuno at kaayusan ng bansa.

Nanawagan si dating Executive Secretary Atty. Vic Rodriguez sa publiko na maging mapagmatiyag at bantayan ang kalayaan sa gitna ng mga aksyon ng pamahalaan.

Ayon kay Atty. Rodriguez, usap-usapan na ang posibleng pagbabalik ng martial law kasunod ng biglaang reorganization sa National Security Council, bago matapos ang taong 2024.

Sa inilabas na kautusan ni Pangulong Ferdinand Marcos Jr., ang Executive Order 81 na naglalayong palakasin ang mga umiiral na polisiya na nakakapaekto sa national security.

Sa ilalim ng nasabing kautusan, tinanggal bilang miyembro ng NSC at NSC Executive Committee ang vice President at mga dating Pangulo ng bansa.

Nilinaw naman ng NSC na ang muling pagsasa-ayos sa council ay hindi indikasyon ng anomang labanan sa sektor ng seguridad sa bansa. –  Sa panualt ni Jeraline Doinog

Nanindigan si Executive Secretary Lucas Bersamin na walang moral authority si dating Presidential Legal Counsel Atty. Salvador Panelo na batikusin ang pagreorganisa ni Pangulong Ferdinand Marcos Jr., sa National Security Council.

Ayon sa Kalihim, naalala niyang itinulak ni Panelo noong panahong nagsilbi ito sa administrasyong Duterte, na tanggalin bilang miyembro ng NSC si dating Vice President Leni Robredo.

Tinawag naman ni Executive Sec. Bersamin na malisyoso ang pahayag ni dating Presidential Spokesman Harry Roque, na ang nasabing hakbang ay bilang paghahanda sa pagpapatupad ng martial law.

Tiniyak ng Kalihim na wala ito sa plano ni PBBM at tanging prayoridad nito na magpatupad ng mga programa na magpapabuti sa pamumuhay ng mga Pilipino at magpapasigla sa ekonomiya ng bansa.

Binigyang diin pa ng Kalihim na dapat maunawaan ng lahat na ang nsc ay isang advisory body para sa Pangulo bilang Commander-in-Chief, at responsibilidad din ng presidente na tiyakin na  ang lahat ng kasapi nito ay kanyang mapagkakatiwalaan.

Nilinaw naman ni Executive Sec. Bersamin na hindi ibig sabihin nito ay hindi dapat pagkatiwalaan si Vice President Sara Duterte.

Gayunman, dahil aniya sa takbo ng mga pangyayari ngayon, kailangan ng Pangulo nang buong pagtitiwala at kumpiyansa sa kanyang mga kasamahan sa konseho. - mula sa ulat ni Giblert Perdez (Patrol 13)

 Ibinunyag ng Bloomberg Wire Agency na matagal nang ninanakaw ng Chinese-State Sponsored Hackers ang mahahalagang impormasyon sa Office of the President.

Ayon sa ulat, kabilang dito ang military documents na may kaugnayan sa territorial dispute ng Pilipinas at China sa West Philippine Sea.

Inilunsad anila ito ng hacking group na APT41, at pinupuntirya ang tanggapan ni Pangulong Ferdinand Marcos Jr, iba pang ahensya ng pamahalaan, hospital networks at organisasyon bilang bahagi ng kanilang pag-e-espiya.

Sa kabila nito, sinabi ni DICT Secretary Ivan Uy na bagama’t may mga pagtatangka na nakawin ang government data, hindi naman aniya nako-kompromiso ang mahahalagang datos ng pamahalaan. –  Sa panulat ni Laica Cuevas

Muling iginiit ng Commission on Elections na hindi dapat pangasiwaan o impluwensiyahan ng sinumang pulitiko ang pamimigay ng tulong ng iba’t ibang ahensya ng pamahalaan.

Ayon kay COMELEC Chairman George Erwin Garcia, papayagan nila ang pamamahagi ng ayuda sa kabila ng election ban ngunit mahigpit ang paalalang dapat gawin lamang ito ng mga empleyado ng kinauukulang ahensya.

Humihingi din ng paunawa ang COMELEC sa publiko sa abala na maaring idulot ng ilang public projects na hindi maaring ipagpaliban sa kabila ng pagbabawal dito tuwing halalan.

Samantala, hinimok naman ni COMELEC Spokesman John Rex Laudiangco ang mga kwalipikadong indibidwal na maghain na ng Certificate of Authority to Carry Firearms, dahil epektibo na ang gun ban sa linggo, Enero 12. – Sa panulat ni Laica Cuevas