NATIONAL NEWS

Kasado na ngayong buwan ang pagpapatupad ng one percent contribution rate hike ng Social Security System.

Ayon kay SSS President at CEO Robert Joseph De Claro, ang pagtataas ng kontribusyon ay alinsunod sa Republic Act no. 11199 o ang Social Security Act of 2018.

Ang kontribusyon anya ay tataas sa 15% mula sa kasalukuyang 14%.

Kasabay nito, inanunsyo ni SSS President De Claro na tataas din ang minimum monthly salary credit sa P5,000 mula P4,000 habang ang maximum MSC ay aakyat din sa 35,000 pesos mula sa 30,000 pesos.

Ipinunto ng SSS Official na ang hakbang na ito ay bahagi ng mga reporma upang manatiling matatag ang pondo ng ahensya. - Sa panulat ni Kat Gonzales

Pinag-aaralan na ng Food and Drug Administration ang pagpapalawig ng booklet-free rule para sa 20% na discount sa gamot para sa mga Persons with Disabilities, bukod pa sa senior citizens.

Ayon sa FDA, nagpupulong na ang kanilang mga opisyal para talakayin ang inisyatiba ng Department of Health para sa pag-i-isyu ng Administrative Order 2024-0017.

Matatandaang bago ito, kinakailangang ipakita ng mga senior citizen ang kanilang booklet sa mga botika para makuha ang 20% discount sa mga over-the-counter na gamot at medical devices.

Nagsisilbi rin itong paraan para makita ng pharmacists kung binibili ng mga lolo at lola ang tamang dami ng iniresetang gamot.

Bagama’t nire-require ang mga PWD sa kaparehong kautusan, wala pang inilalabas na administrative order ang DOH para isama ang mga ito sa booklet-free rule. –  Sa panulat ni Laica Cuevas

Posibleng magkaroon ng bawas-singil sa kuryente ngayong Enero hanggang Pebrero.

Ayon kay Energy Regulatory Commission Chairperson at Chief Executive Officer atty. Monalisa Dimalanta, ito’y bunsod ng ikinakasang refund ng Meralco sa kanilang mga konsyumer.

Bunsod anya ang nasabing refund ng sobrang nasingil nito mula 2022 hanggang 2024 na nagkakahalaga ng 16 billion pesos.

Gayunman, iginiit ni Chairperson Dimalanta na hanggang sa ngayon ay hindi pa naghahain ng kanilang petition for refund ang Meralco.

Nakikitang dahilan ng opisyal kaya hindi pa nakakaghain ng petisyon ang Meralco ay dahil hindi pa nila ganap na naisasaayos ang rate reset na siyang kanilang prayoridad sa unang anim na buwan ng taon.

Binigyan-diin ng ERC Chief na kinakailangan ng maitakda ang rate reset lalo pa’t magtatapos na ang termino ng dalawang commissioner nito ngayong taon. –  Sa panulat ni Kat Gonzales

Pumalo sa record-high na P16.09 trillion pesos ang utang ng pilipinas sa pagtatapos ng November 2024.

Ayon sa Bureau of Treasury, mas mataas ito ng 0.4% o P70.7 billion pesos kumpara sa national debt noong Oktubre.

Ito’y dahil sa net financing at epekto ng paghina ng piso.

Sa kabuuang utang, P10.92 trillion pesos ang domestic debt, habang umabot naman sa P5.17 trillion pesos ang external obligations o perang inutang sa ibang bansa.

 Kumpiyansa si Transportation Secretary Jaime Bautista na maipatutupad ng kagawaran ang infrastracture flagship projects ng administrasyong Marcos sa kabila ng mga isyu sa pondo at right-of-way acquisitions.

Bagama’t aminadong may epekto ito sa mga proyekto lalo na at nabawasan din ang budget para sa foreign-assisted projects, mapopondohan pa rin aniya ito gamit ang loan proceeds.

Sa inaprubahang 2025 General Appropriations Act, nakakuha ang dotr ng 87.245 billion pesos, mas mababa ng mahigit kalahati o 52% sa budget proposal nitong 180.89 billion pesos.

Kabilang sa malalaking proyekto ng DOTR ang North-South Commuter Railway, Metro Manila Subway Project, MRT lines 4 at 7, LRT line 1 Cavite Extension, at Philippine National Railways (PNR). –  Panulat ni Laica Cuevas

Tinalakay sa kauna-unahang full cabinet meeting ng admninistrasyong Marcos ngayong taon ang 16 na flagship projects o malalaking proyektong pang-imprastraktura sa ilalim ng Department of Transportation.

Sa press briefing sa Malacañang, sinabi ni Transportation Secretary Jaime Bautista na kabilang sa mga proyektong kailangang maipatupad bago matapos ang termino ni Pangulong Ferdinand Marcos Jr., ang North-South Commuter Railway Project na magsisimula sa Clark International Airport hanggang Calamba, Laguna.

Ayon pa sa Kalihim, kabilang din sa mga proyektong ito ang MRT-4 at MRT-7;

Gayundin ang LRT line 1 extension project; Cebu International Container Port Terminal, PNR South Long-Haul Project, at Mindanao Railway Project.

Aminado naman si Sec. Bautista na may mga hamon silang kinakaharap sa ibang mga proyekto kaya naantala ang pagpapatupad nito.

Sa kabila nito, tiniyak ng Kalihim na nagpapatupad na sila ng mga hakbang para makausad ang mga nasabing proyekto at matiyak na maipatutupad ang mga ito bago matapos ang termino ni Pangulong Marcos. –  Mula sa ulat ni Giblert Perdez (Patrol 13)

Maliban sa nagtataasang presyo ng mga bilihin, lalo ng pagkain, namemeligro na ring lumaki ang gastos sa pagpapagamot ni Juan at Juana Dela Cruz ngayong taon.

Batay sa survey ng WTW Global Medical Trends survey, inaasahang sasampa sa 18.3% ang medical cost sa pilipinas ngayong taon, ang ikalawang pinaka-mataas sa Asia-Pacific, kasunod ng Indonesia.

Kabilang sa itinurong dahilan ng mataas na gastos sa pagpapagamot ang pagdami ng mga nangangailangan o nag-a-avail ng health services, lumalaking hospital at clinic costs, maging ang mas mahal na professional fees at madalas na pagkakasakit.

Bukod dito, nag-triple na rin o lumobo sa 4.2 billion pesos ang lugi ng health maintenance organization industry sa pilipinas noong 2023 kumpara sa 1.4 billion noong 2022 bunsod ng dumaraming binabayarang claims at benefits.

Para matugunan ang lumalaking utilization, inadjust na ng HMO presyo ng kanilang serbisyo taon-taon.

 Inanunsyo ni Canadian Prime Minister Justin Trudeau na magbibitiw na ito sa pwesto bilang lider ng Liberal Party.

Ayon kay Prime Minister Trudeau, dahil sa “Internal fighting” ay naniniwala siya na hindi na niya magawa ang maging lider na kakatawan ng kayang partido sa susunod na halalan.

Mananatili si Trudeau bilang Prime Minister at Lider ng Liberal habang suspendido ang parliamento ng Canada hanggang Marso hangga’t wala pang hinihirang na bagong lider.

Nabatid na labing isang taong naging Lider si Trudeau at siyam na taon na namuno bilang Prime Minister sa Canada.

Matatandaang kaliwa’t kanan ang panawagang magbaba sa pwesto ang Canadian Prime Minister mula sa nasasakupan nito sa gitna ng bumabagsak na public opinion polling, maging sa sariling caucus nito. – Sa panulat ni Jeraline Doinog