NATIONAL NEWS

Naglabas na ang pamunuan ng Simbahan ng Quiapo ng ilang panuntunan at paalala sa lahat ng mga deboto ng Poong Hesus Nazareno.

Kabilang sa mahigpit na paalala sa mga deboto na huwag sumampa sa sa andas o sa karuwahe na kinalalagyan ng Black Nazarene; huwag magdala ng maraming bitbitin.

Kung magdadala ng bag, piliin ang transparent para madaling mainspeksyon; at huwag magdala ng alak o nakalalasing na inumin, habang pinapayagan naman ang mga deboto na maghagis ng kanilang panyo upang ipunas sa imahen ng Poong Nazareno;

Panatilihin ang kabanalan sa misa at iwasan makalikha ng anumang makakaagaw ng atensyon; at panatilihin ang kalinisan sa Quiapo Church at Quirino Grandstand.

Sakali namang makararamdaman ng hindi maganda, mas mabuting manatili na lamang ang deboto sa gilid ng daan at lumapit sa mga health assistance desk .

Magaganap ang inaabangang Traslacion sa Enero a-nuwebe ng  40 taong imahen ng Poong Hesus Nazareno bilang bahagi ng taunang kapistahan nito. –  Sa panulat ni Jeraline Doinog

Nakatakdang imbestigahan ng Bureau of Immigration ang ulat na wala na sa bansa ang sinasabing hitman ng Davao Death Squad, kasama ang pamilya nito gamit ang pekeng identity.

Ayon sa report, nagtago ang pamilya ni Edgar Matobato sa ilalim ng proteksyon ng mga pari at lumipat sa isang catholic church kung saan ay nagtrabaho ito bilang isang hardinero.

Dagdag pa sa report, lumipad patungong Dubai ang nasabing pamilya kung saan ay sumakay ulit sila ng eroplano patungo sa hindi nabanggit na bansa.

Hindi naman binanggit sa nasabing report kung sino ang nagbigay ng pekeng dokumento sa pamilya matobato at kung paano ito nakapuslit palabas ng bansa.

Matatandaang, isa si Matobato sa mga tumestigo laban kay dating Pangulong Rodrigo Duterte kaugnay sa Davao Death Squad. –  Sa panulat ni Alyssa Quevedo

Sinimulan na ng pamahalaang panlalawigan ng Bohol ang imbestigasyon kaugnay sa nadiskubreng paninira ng coral reef sa Brgy. Tangnan sa Panglao.

Ayon kay Governor Erico Aristotle Aumentado, ang mga coral reef na sinira ng mga diver na tumuntong sa coral ay bahagi ng napaling dive site.

Kaugnay nito, nangako si Aumentado na gagawa ng ligal na aksyon ang kanilang panig laban sa mga nasa likod ng pagkasira ng mga coral reef.

Ang mga nasabing diving site sa panglao ay bahagi ng Panglao Island Protected Seascape at protektado ng Expanded National Integrated Protected Areas System. –  Sa panulat ni John Riz Calata

 Pinabulaanan ng Department of Social Welfare and Development na mayroong alokasyon mula sa Ayuda para sa Kapos ang Kita Program (AKAP) para sa mga mambabatas.

Ito’y kasunod ng kontrobersyal na isyu na sinasabing may 5 bilyong pisong alokasyon ng AKAP para sa Senado habang 21 bilyong piso ang sinasabing nakalaan para sa House of Representatives.

Ayon kay Social Welfare and Development Assistant Secretary Irene Dumlao, dadaan pa rin sa assessment at proseso ng ahensya ang irerekomendang benepisyaryo ng mga mambabatas.

Giit pa ni Asec. Dumlao, sila mismo ang pangunahing implementor ng AKAP Program. –  Sa panulat ni Alyssa Quevedo

Kasalukuyan nang pinoproseso ng department of foreign Affairs at Philippine Embassy sa Abu Dhabi ang mga documentary at administrative requirements para sa agarang pagpapauwi sa mahigit 200 Pilipino na ginawaran ng pardon sa United Arab Emirates.

Batay sa anunsyo ng DFA, umabot sa 220 pinoy ang napalaya matapos silang mabigyan ng pardon bilang bahagi ng pagdiriwang ng ika-53 taong National Day ng UAE.

Binigyang diin ng ahensya, na ito ay resulta ng direktang pakikipag-usap ni Pangulong Ferdinand Marcos Jr., kay his Excellency Sheikh Mohammed Bin Zayed Al Nahyan noong Nobyembre nang nakaraang taon.

Nabatid na ang mga napalayang Pinoy ay nahaharap sa iba’t ibang kaso sa nasabing bansa.

Matatandaang noong June 2024, nasa 143 Pilipino rin ang nabigyan ng pardon kasabay ng pagdiriwang ng Eid Al-Adha.  -Mula sa ulat ni Gilbert Perdez (Patrol 13)

 Asahan na ang mas malamig na panahon ngayong Enero lalo na sa Hilagang Luzon sa oras na lumakas pa ang northeast monsoon o amihan.

Ayon sa pagasa, pumalo sa 14.4 degrees celsius ang temperatura sa Baguio kahapon enero-a-sais kumpara nuong linggo na may 14.6 degrees na temperatura.

Sinundan naman ito ng Tanay, Rizal na nakapagtala ng 19 degrees celsius.

Samantalang nasa pagitan naman ng 22 degrees celsius hanggang 30 degrees celsius ang naitala sa Metro Manila. –  Sapanulat ni Alyssa Quevedo

Mas maraming serbisyo na ang magagamit ng mga miyembro ng PhilHealth.

Ito ang inanunsyo ni Dr. Israel Francis Pargas, Health Finance Senior Vice President ng PhilHealth, kung saan nagdagdag pa ng 50% sa benefits package para sa mga miyembro nito bago pa man aniya magtapos ang taong 2024.

Halos lahat aniya ng case rates ay tumaas kung saan hiwalay dito ang kidney transplant package na dati ay 600,000 pesos na aabot naman na hanggang dalawang milyong piso ngayong 2025.

Habang aabot naman sa 530,000 pesos ang benefit package  ng angioplasty procedure  o may sakit sa puso mula sa dating 30,000 pesos benefit package.

Dagdag pa ni Dr. Pargas, maging ang mga pasyenteng dinala sa emergency room na hindi naman na-admit o na-confine ay babayaran na rin ng PhilHealth.

Mayroon na rin aniyang package ang PhilHealth sa primary health care tulad ng dental health care para sa oral prophylaxis, oral examination at paglalagay ng fluoride kasama na rin ang emergency tooth extraction o bunot ng ngipin sa 15 laboratory. –  Sa panulat ni Jeraline Doinog

Pinuna ng Commission on Audit ang Social Security System  dahil sa kabiguan nitong kolektahin ang higit 93 billion pesos na halaga ng premium contributions mula sa mga deliquent employer noong 2023.

Napag-alaman ng COA na nakakolekta lamang ang SSS ng 4.581 nillion pesos o 4.89% ng kabuuang 93.747 billion pesos established collectibles.

Nabatid din ng COA na 103 employer lamang na may delinquent accounts na nagkakahalaga ng 95.308 million pesos  ang nag-avail ng installment plan.

Ayon sa COA, posibleng indikasyon ito ng liniency  o pagiging maluwag sa kolesyon.

Dahil dito, napagkaitan ang SSS ng pondo para sa ibat-ibang benepisyo.

Para naman sa SSS, sinabi nito sa COA na ginagawa nila ang makakaya parara mag-remit ang mga kumpanya.

Sa kabila nito, tuloy naman ang 15% contribution rate hike ng ahensya simula ngayong buwan kung saan 10% ang sasaluhin ng employer, 5% naman sa empleyado. –  Sa panulat ni Jeraline Doinog

Tahasang itinanggi ng ilang miyembro ng Young Guns Bloc ng Kamara na may kinalaman sila sa sinasabing ika-apat na impeachment complaint laban kay vice President Sara Duterte.

Ayon kay Zambales Rep. Jay Khonghun walang pagkilos sa panig ng young guns para sa panibagong impeachment complaint.

Para naman kay Lanao Del Sur Rep. Zia Alonto Adiong, wala siyang ideya kaugnay sa nasabing isyu dahil abala rin siya matapos namayapa ang kaniyang ina.

Sabi naman ni Tingog Party-List Rep. Jude Acidre, kararating lang niya ng pilipinas at wala siyang nakuhang anumang balita tungkol sa paghahain ng reklamo.

Maging si 1-rider Party-List Rep. Rodge Gutierrez na miyembro ng young guns at bahagi ng minorya ay wala rin nalalaman tungkol sa sinasabing ika-apat na impeachment complaint.

Giit pa Cong.  Gutierres na hindi niya pa nakikita ang naunang tatlong reklamo na inihain laban kay VP Sara.

Una ng inihayag ni House Secretary General Reginald Velasco na may maghahain ng impeachment complaint kung saan pangungunahan ito ng nasa 10 hanggang 12 mambababatas mula sa majority at minority na kinumpirma naman ni House Minority Leader France Castro. –  Sa panulat ni Jeraline Doinog

Nilinaw ng National Security Council na may karapatan at kapangyarihan si Pangulong Ferdinand Marcos Jr., na magpalit ng mga miyembro ng National Security Council kung kailan nito gusto.

Ito, ayon kay NSC Assistant Director General Jonathan Malaya sa gitna ng mga kuwestiyon ng mga kritiko sa inilabas na Executive Order no. 81 ng Pangulo na nag-aalis kay Vice President Sara Duterte at dalawang dating Pangulo sa komposisyon ng NSC.

Ayon kay Gen. Malaya, discretion ng Presidente na magpalit ng mga miyembro ng NSC gaya ng ginawa ng ibang dating mga Pangulo ng bansa.

Wala aniyang kinalaman ang isyu sa China sa inilabas na kautusan ni PBBM dahil ang desisyon ay sarili nitong pagpapasya.

Sa nasabing EO no. 81 na pirmado ng Presidente na mahalagang masiguro ng mga miyembro ng council na mapanindigan at maprotektahan ang soberanya at pambansang seguridad ng bansa. – Sa panulat ni Jeraline Doinog