NATIONAL NEWS

Inatasan ng Philippine National Police ang mga tauhan nito na pangalagaan ang dignidad ng pulisya lalo na sa nalalapit na midterm elections.

Ayon kay PNP Chief General Rommel Marbil, hamon sa pulisya ang gagawing pagbabantay sa darating na 2025 midterm elections.

Ipinunto ni General Marbil na mahalagang yaman na hindi dapat masira ng anumang tukso o maling impluwensya  ang integridad ng mga pulis.

Dagdag pa ng Hepe ng pulisya na hindi dapat magpaapekto ang sinumang miyembro ng pambansang pulisya sa mga politiko.

Gayunman, pinuri ni General Marbil ang dedikasyon ng pulisya, kasabay ng paghimok na magkaisa upang mapanatili ang tiwala at respeto ng publiko. – Sa panulat ni John Riz Calata

Target ng Department of Agriculture na magpatupad ng maximum suggested retail price sa mga imported na bigas.

Ito’y bahagi pa rin nang pagsusumikap ng pamahalaan na mapababa ang presyo ng bigas sa mga pamilihan.

Ayon kay Agriculture Secretary Francisco Tiu-Laurel Jr., hindi na dapat aabot ng 60 pesos ang kada kilo ng imported rice sa merkado dahil maituturing na itong ‘profiteering’.

Sa pamamagitan anya ng MSRP, matutukoy kung hanggang magkano lang dapat ang pinakamataas na bentahan ng imported rice.

Target naman ng Kalihim na mailabas ang guidelines o panuntunan kaugnay rito bago matapos ang Enero. –  Sa panulat ni John Riz Calata

Itinakda ng National Human Settlements Board ang maximum 2.3 percent increase sa upa para sa residential units na may monthly rate na 10,000 pesos o mas mababa.

Ang maximum increase sa monthly rentals para sa subject residential units ay epektibo simula January 1 hanggang December 31, 2025, base sa NHSB resolution 2024-001.

Inaprubahan ng NHSB, bilang nag-iisang policy-making body na responsable sa pagtatakda ng overall policy directions at  program development sa iba’t ibang key shelter agencies, mula sa rekomendasyon ng National Economic and Development Authority, ang bagong resolution  noong December 2024.

Nilagdaan ni Undersecretary Henry Yap ang resolution para sa Department of Human Settlements and Urban Development, bilang kinatawan ni Secretary at NHSB Chairman Jose Rizalino Acuzar.

Ang rental cap ay ipinatutupad upang maprotektahan ang housing tenants sa lower-income brackets at iba pang benepisyaryo mula sa sobra-sobrang rent increases alinsunod sa Republic Act 9653 o Rent Control Act of 2009.

Maaaring hindi kampante si Pangulong Ferdinand Marcos Jr. sa ilang mga miyembro ng National Security Council.

Ito ang nakikitang dahilan ng Political Analyst na si Professor Edmund Tayao kung bakit ni-reorganisa ng pangulo ang nasabing konseho, na tumatalakay sa usaping pansiguridad ng bansa.

Kaugnay nito, ipinaubaya na ni Prof. Tayao sa publiko kung paano babasahin ng taumbayan ang naging desisyon ng pangulo na repasuhin ang listahan ng mga kasapi sa NSC.

Nabatid na kabilang sa mga inalis na miyembro nito ay sina Vice President Sara Duterte at ilang dating pangulo ng Pilipinas. – Sa panulat ni john Riz Calata

Tiniyak muli ng pamahalaan na maibibigay sa mga karapat-dapat na recipients ang financial assistance ng pamahalaan sa pamamagitan ng ilang mga programa gaya halimbawa ng AKAP program.

Ayon kay DOLE Undersecretary Benjo Benavidez, bukod sa may sinusundang guidelines sa pagpapatupad nito ay subject din sa coa audit ang halaga na ginugugol dito.

Binigyan-diin ni Usec. Benavidez na madaling makita kung qualified ang isang benepisyaryo at kapag napatunayan anya nilang hindi pala dapat tumanggap, ay ipinababalik nila ang ayudang naibigay at ibinabalik sa kaban ng bayan.

Giit pa ng DOLE Official, maraming pagkakataon na may binawian sila ng ayuda, lalo na noong panahon ng pandemya. Mayroon din silang binawian dahil sa dobleng tulong na natanggap ng isang recipient.

Ipinunto ng opisyal na nararapat lamang, lalo’t ang salaping gamit dito ay taxpayers’ money na aniya’y dapat magamit sa tamang paraan. –  Sa panulat ni Kat Gonzales

Hinimok ni Senator Lito Lapid ang mga kasamahang senador na aprubahan ang kanyang senate bill no. 1471 na naglalayong ideklara ang Quiapo, maynila bilang isang National Historical-Cultural Heritage Zone.

Ayon kay Senador Lapid, malaki ang ambag ng quiapo sa kasaysayan, kultura, relihiyon, sining at ekonomiya ng bansa, at ang kahalagahan ng pag-preserba sa natatanging yaman nito.

Mahalaga anya ang nasabing lugar sa turismo at tradisyon, na nagsilbing sentro ng kalakalan bago pa dumating ang mga dayuhang mananakop.

Inihalimbawa ng mambabatas ang mga makasaysayang lugar tulad ng minor basilica of the black nazarene, san sebastian church at masjid al-dahab, maging ang plaza miranda kung saan isang pambobomba noong 1971.

Layunin ng panukalang batas na buhayin muli ang quiapo bilang sentro ng ekonomiya at lumikha ng mga bagong pasyalan habang pina-ngangalagaan ang kasaysayan at kultura nito. – Mula sa ulat ni Cely Ortega-Bueno (Patrol 19)

 Maghihigpit na ang Land Transportation Office  hinggil sa paggamit ng seatbelt bilang bahagi ng road safety measures.

Ayon kay LTO Chief Assistant Secretary atty. Vigor Mendoza, inatasan na niya ang lahat ng regional directors at district office heads na gawin na nila ang lahat ng hakbang  partikular na ang paggamit ng social media at iba pang platforms upang hikayatin ang mga motorista na gumamit ng seatbelt.

Makikipagtulungan din aniya sila sa mga transport group; paaralan; at iba pang stakeholder upang maipakalat ang impormasyon at komunikasyon para sa mga drayber at pasahero ng paggamit ng seatbelt.

Maliban dito, magpapa-deploy din ang nasabing ahensya ng mga enforcers at makikipag-ugnayan sa iba pang law enforcement agencies.

Dagdag pa ni Asec. Mendoza, agresibo rin nilang itutulak ang stop road crash program kung saan makikipag-ugnayan din sila sa mga lokal na pamahalaan at sa mga organisasyong pangkomunidad para sa nasabing kampanya. –  Sa panulat ni Alyssa Quevedo

Iginiit ni Senate Committee on Ways and Means Chairman Sherwin Gatchalian na maraming nabunyag na kahinaaan sa proseso ng Pilipinas matapos ang imbestigasyon sa mga iligal na POGO sa bansa.

Isa na aniya rito ang mga pekeng birth certificate na nakuha ng mga dayuhang pogo worker at ginamit para sa pekeng citizenship at pagbili ng mga ari-arian sa Pilipinas.

Bagama’t aminadong malaking gastos sa panig ng pamahalaan ang pagbabago sa sistema ng pagkuha ng birth certificate, kailangan aniya itong gawin para matuldukan ang pagkalat ng mga pekeng dokumento sa bansa. – Sa panulat ni Laica Cuevas